སྤྲིན་དཀར་པོའི་སྲིང་བལ་རླུང་གིས་གཏོར།།

རླུང་བསེར་བུའི་བང་ཁ་འཕྲུལ་ལ་སྦྲེལ།།

འཕྲུལ་ལྷུ་ལག་བསྒྲིགས་ནས་མཁའ་ལ་འཕུར།།

དགུང་ཨ་སྔོན་དཀྱིལ་ནས་གླུ་རེ་ལེན།།

འབྲུག་ཕོ་ཆུང་མ་མཐོང་མ་རྙེད་ཐལ།།

བྱ་རྒོད་པོ་མ་རིག་མ་ཟིན་ཐལ།།

དེ་ཡིན་ཡང་གནམ་གཅོད་ཚོར་བ་འདི།།

ལས་ད་ཐེངས་མྱོང་བར་ཡིད་རེ་སྤྲོ།།

སྤྲིན་བང་རིམ་དགུ་ཡི་ཡང་སྟེང་ན།།

གནམ་སྔོན་པོའི་ཁ་ཞེང་རྒྱང་ལ་འཐེན།།

གསེར་ཉི་འོད་ལྷམ་མེར་སྤྲིན་གསེབ་བརྟོལ།།

སྤྲིན་དཀར་པོ་སྲིང་བལ་སྤུངས་པ་འདྲ།།

བྱ་རྒོད་པོའི་གཤོག་འགྱུར་རླུང་ལ་བཅོལ།།

ལུས་རིན་ཆེན་ཨ་སྔོན་རྒྱན་དུ་སྤྲས།།

རླུང་སྤུ་གྲིའི་རྣོ་ལ་ལུས་མཆོད་ཕུལ།།

སྤྲིན་དཀར་པོའི་ཡང་སྟེང་ནས་སུ་འཆའ།།

འབྲུག་ཕོ་ཆུང་ཕེབས་བཞུད་ཨ་སྔོན་ཡིན།།

སྒོས་ཨ་སྔོན་མཐོངས་ཀྱི་ཡང་སྟེང་ཡིན།།

སྤྲིན་དཀར་ནག་འཁྲུག་སའི་ཡོལ་རས་ཡིན།།

གློག་དམར་པོ་འཁྱུག་སའི་རས་གཞི་ཡིན།།

མཐའ་མི་མཐོང་སྤྲིན་པའི་གདན་སྟེང་དུ།།

གསེར་ཉི་འོད་འཕྲོ་ཞིང་རླུང་བུ་ལྡང་།།

སྤྲིན་ཤམ་བུ་རླངས་པ་བཞིན་དུ་མཆེད།།

སྲིང་བལ་དཀར་སྟེང་ནས་གླུ་རེ་ལེན།།

སྒྲ་ལྡིར་སྒྲ་གཡུ་འབྲུག་སྔོན་མོ་བཞིན།།

རླུང་སྐྱི་བསེར་རྒོད་པོས་གཤོག་གཅོད་བཞིན།།

དྲང་མཁའ་ལ་འཕུར་ཅིང་ཐད་དུ་འཕུར།།

གཤོག་རང་དབང་ཚོར་འདི་སྤྲོ་བ་ལ།།

ལས་ཅི་འགྲུབ་དཀོན་མཆོག་ལྷ་ཡིས་མཁྱེན།།

ལས་ཅི་སྒྲུབ་རང་གི་ལག་ལ་རགས།།

དགོང་རིམ་པ་གསུམ་གྱི་ཡང་སྟེང་འདི།།

རེས་ད་ཐེངས་མཐོང་བར་ཉམས་རེ་དགའ།།

རྟེན་ད་ཐོབ་སྤྲིན་གསེབ་བརྟོལ་སྐལ་བྱུང་།།

བྱ་ཁྱུང་ཆེན་གཤོག་འགྱུར་ངོམས་འདྲ་བྱས།།

ལུས་སྣང་བ་ཨ་སྔོན་དབྱིངས་ནས་སྐྱིད།།

སེམས་བསམ་པ་དེ་དང་ལྷན་དུ་བཟི།།

ཨ་སྐྱིད་ལ་ཁྲོན་ཞབས་སྦལ་བ་ང་།།

ཨོ་ཧོ་ཧོ་གླེན་རྒན་འབྲོག་ཕྲུག་ང་།།

ལས་ཅི་བསམ་འགྲུབ་ཤོག་བླ་མ་ལྷ།།

དོན་ཅི་བྱས་འཁྱོངས་ཤོག་དཀོན་མཆོག་གསུམ།།