༡

ཨ་མ་ཞེས་འབོད་འཛིན་མའི་ཁྱོན་ཀུན་འདིར། །

བདག་མེད་བློས་བཏང་བྱམས་

བརྩེའི་མ་མ་དང་། །

རང་ལས་གཞན་གཅེས་བྱང་ཆུབ་

སེམས་དཔའ་སྟེ། །

ཨ་མའི་རང་བཞིན་བསྔགས་པའི་

གནས་མཆོག་ཡིན། །

༢

ད་ལྟ་ཕྱི་མིག་མདའ་མོ་འཕངས་པ་ན། །

བུ་ཕྲུག་དག་གིས་ཤེས་བྱའི་སྦྲང་རྩི་མཆོག །

ཡོངས་སུ་རོལ་ཕྱིར་སྤང་དཀའི་ཕ་ཡུལ་དང་། །

ཡུན་དུ་འདྲེས་པའི་འཚོ་བར་གྱེས་ཕྱག་འཚལ། །

༣

དེ་དུས་འབྲོག་གི་ལས་ལ་ནང་བྱན་ཆུད། །

ཕ་ས་མ་མཚེར་སེམས་ཀྱི་གཅེས་ནོར་སྒོམ། །

རྟ་ནོར་ལུག་གསུམ་མིག་ཟུང་ལས་ཀྱང་གཅེས། །

དབྱར་དགུན་སྟོན་དཔྱིད་ཨ་མའི་

ལོངས་སྤྱོད་ཡིན། །

༤

རི་ཀླུང་ཐང་གསུམ་ཨ་མའི་གར་སྟེགས་ཡིན། །

གཙང་ཆབ་སྔོན་མོ་ཨ་མའི་ཕྱི་ཐག་ཡིན། །

ཁ་བ་དཀར་པོ་ཨ་མའི་སེམས་རྒྱུད་ཡིན། །

མཐའ་མེད་ནམ་མཁའ་ཨ་མའི་ཁོག་རྒྱ་ཡིན། །

༥

གདོད་མའི་གཉུག་གཤིས་ལྷན་སྐྱེས་

ཡོན་ཏན་མངའ། །

འབྲོག་ཁྱིམ་ཕལ་བའི་དྲོད་ཁོལ་འབྱུང་ས་དང་། །

འབྲོག་གི་ལས་ལ་བརྩོན་པས་

འཇུག་མཁན་དང་། །

འབྲོག་མོ་རྣལ་མའི་ངང་ཚུལ་

མངོན་མཁན་ཡིན། །

༦

ཕལ་བའི་ཁྱིམ་ཚང་ཕལ་བའི་བུ་མོ་ལ། །

ཕལ་བའི་ཕུགས་བསམ་ཕལ་བའི་རེ་སྙེག་སྟེ། །

ཕལ་བའི་མཛེས་སྡུག་བསྐྲུན་ལ་

བྱང་མཁས་མས། །

ཕལ་བའི་ཁྱིམ་གཞིས་བསྐྱངས་ཏེ་

དུས་ཚོད་ཡོལ། །

༧

བདེན་ནོ་བདེན་ནོ་ཨ་མའི་ལང་ཚོའི་འོད། །

ཁྱིམ་གཞིའི་བདེ་སྡུག་ཆེད་དུ་

ཕངས་མེད་བཏང་། །

ཨ་མས་དུས་ཀྱི་གཅེས་ནོར་འདང་ཆེན་ཡང་། །

ཁྱིམ་འདིའི་དར་ཆ་མཁའ་རུ་

བསྒྲེང་ཕྱིར་མཆོད། །

༨

དེ་ལྟར་ཨ་མས་རིན་ཐང་བོར་སོང་ཞེས། །

ལེ་བདའ་བགྱིས་པའི་ལབ་གླེང་མཐོང་བ་མེད། །

ཨ་མའི་བདེ་སྡུག་ཅེས་ཀྱང་བརྗོད་མཁན་མེད། །

གཞིས་ཁྱིམ་དར་རྒུད་ཨ་མའི་ཡོད་ཚད་ཡིན། །

༩

མ་གཞི་ཨ་མ་ལགས་ཀྱི་སེམས་དབུས་སུ། །

ཁྱིམ་འདིའི་ལས་ཀ་གཙུག་ཏུ་བཀུར་བར་སྤྲོ། །

ཟ་མ་གཡོས་སྦྱོར་མཁས་ཤིང་ལས་ལ་བརྩོན། །

ཁྱིམ་གྱི་རང་ཚུགས་འཛིན་མཁན་ཨ་མ་ཡིན། །

༡༠

ཁྱོ་གར་བློ་སེམས་གཉིས་མེད་དཀར་རྐྱང་ཡིན། །

ཕྲུ་གུར་སྒེར་སེམས་འཛིན་མེད་

བརྩེ་བས་བསྐྱངས། །

ཁྱིམ་མཚེས་དབྱེན་དཀྲུག་མེད་པར་

མཐུན་ལ་བསྟུན། །

གྲོགས་ཀྱི་མཛའ་བརྩེ་གཙང་པོའི་

རྒྱུན་བཞིན་རིང་། །

༡༡

དུས་ཀྱི་འཁོར་ལོས་ཨ་མའི་ལང་ཚོ་བཅོམ། །

བརྩེ་བའི་གཟི་བྱིན་སྔར་བཞིན་ཉམས་པ་མེད། །

ཁ་ཁོག་གཉིས་མེད་ཕྱི་ནང་གསང་མེད་ཀྱིས། །

ངེད་ཅག་བརྩེ་བའི་རྙི་ལས་མངགས་པ་མེད། །

༡༢

ཨ་མའི་ཅུང་ཙམ་སྒུར་པའི་སྐུ་གཟུགས་དེས། །

རང་གཞན་ཀུན་ལ་བརྩི་བཀུར་

དགོས་གལ་དང་། །

བྱམས་སེམས་ལྷུག་པར་གྲོལ་བའི་

ཞལ་རས་ལས། །

འགྲོ་རྣམས་བདེ་བརྟན་སྡུག་བྲལ་

བཏང་སྙོམས་སྨོན། །

༡༣

ཨ་མའི་དུང་ལོའི་སྐྲ་དཀར་མཇལ་བ་ན། །

དགེ་བརྩོན་སྡིག་སྤང་དགོས་ཞེས་

སྐུལ་དང་མཚུངས། །

ལོ་ཟླས་བྲིས་པའི་གཉེར་རིས་རེ་རེས་ཀྱང་། །

བརྩོན་པའི་ཆུ་རྒྱུན་མ་གཅོད་འབོད་དང་འདྲ། །

༡༤

རེད་རེད་ཨ་མ་བྱང་ཆུབ་སེམས་པ་རེད། །

བྱམས་བྱམས་རང་ལས་གཞན་ལ་

བྱམས་པ་རེད། །

ནམ་ནམ་ཞར་ཞར་དགའ་བ་འཕེལ་བའི་གཞི། །

ཡུན་ཡུན་བརྟན་ཅིང་འཚོ་བའི་

སྨོན་ལམ་འདེབས། །

༡༥

ན་ཚོད་མཐོན་པོ་རི་བོར་འགྲན་ན་ཡང་། །

ཞོགས་པའི་སྐྱ་རེངས་མ་གསལ་སྔ་རོལ་ནས། །

ཨ་མ་ཁ་ཏོན་དགེ་སྦྱོར་གནས་ལ་ཞུགས། །

ལོ་དང་ཟླ་བའི་བར་ལ་སྨོན་ལམ་གཙང་། །

༡༦

ཨ་མ་ལགས་ནི་སེམས་ལ་འཁོར་ཙམ་གྱིས། །

ང་ཡི་སྒྱིད་ལུག་དང་ནི་གུ་དོག་སོགས། །

སྐྱོན་རྣམས་མེ་ལོང་ནང་ལ་གསལ་བ་བཞིན། །

ངོ་རེ་གནོངས་ཤིང་འགྱོད་བཤགས་

གནས་ལ་གཞོལ། །

༡༧

ཨ་མའི་ཡོན་ཏན་བརྗོད་ན་ཚར་མེད་རེད། །

ཨ་མའི་རླབས་ཆེན་གླེང་ན་ཟད་རྒྱུ་མེད། །

འདི་དག་ནམ་མཁའི་ཀློང་ལ་

ཤོང་ཐབས་དབེན། །

ང་ཡིས་ཟུར་ཙམ་བྲིས་པས་ག་ལ་རྫོགས། །

༡༨

ད་ནི་སྨོན་ལམ་བསྡུས་པས་རྫོགས་པར་བྱ། །

དལ་འབྱོར་མི་ལུས་རྙེད་པའི་སྐལ་

བཟང་འདིར། །

འཇིག་རྟེན་ཤེས་བྱ་ཐམས་ཅད་

རྟོགས་དཀའ་རུང་། །

ཨ་མའི་ཡོན་ཏན་ཆ་ཤས་འབྱོར་ན་བསམ། །

༡༩

ཨ་མའི་དད་སེམས་གཙང་མར་

གེགས་མེད་ཤོག །

དགེ་བའི་ལས་ལ་བར་དུ་མ་ཆོད་ཅིག །

བྱམས་སེམས་དྭངས་མ་ཡུན་དུ་

བརྟན་གྱུར་ཅིག །

སྙིང་རྗེ་རིས་མེད་རྟེན་འདིར་འཚོ་གྱུར་ཅིག །

༢༠

འགྲོ་རྣམས་ཀུན་ལ་ཨ་མའི་བྱམས་བརྩེའི་འོད། །

འཕྲོས་ཏེ་ནད་མུག་འཁྲུག་རྩོད་ཞི་བ་དང་། །

ལོ་ལེགས་བདེ་སྐྱིད་འབྲས་བུ་

འཕེལ་གྱུར་ཅིག །

ཞི་བདེའི་དཔལ་ལ་རོལ་བའི་

ཤིས་གྱུར་ཅིག །