འཇིག་རྟེན་གྱི་མི་སུ་ཞིག་ཡིན་རུང་། བདེ་བ་འདོད་ཅིང་སྡུག་བསྔལ་མི་འདོད་པ་ནི་ཆོས་ཉིད་ཅིག་རེད། འོན་ཀྱང་བདེ་བ་ཁོ་ནའི་ཆེད་ཅི་མི་སྙམ་པར་ཅི་དྲན་གང་དྲན་བྱས་ཚེ། ནམ་ཞིག་སྡུག་བསྔལ་གྱི་གཡང་ལ་ལྷུང་ངེས་པ་ནི་རྒྱུ་འབྲས་ཀྱི་རྣམ་གཞག་ཅིག་ཅིས་ཀྱང་རེད། དེ་བཞིན་དུ། ད་ལོར་ཡང་ཏོག་དབྱིབས་ནད་དུག་ཅེས་པའི་ནད་གདོན་འདིའི་རྒྱུ་བར་སྲོག་ཞུགས་ཏེ། འགྲོ་བ་མིའི་རིགས་ཀྱི་འགྲོ་འོང་དང་ཐོན་སྐྱེད་བཅས་ལ་བཀག་སྡོམ་བྱེད་པ་ནི་ལས་ཀྱི་མནར་གཅོད་ཐེངས་ཤིག་རེད་ཨང་།

དབྱར་གྱི་མེ་ཏོག་ལྷུག་པོར་མ་བཞད་པའི་ཡར་སྔོན་དུ། ད་ལོར་ཡང་ནད་དུག་འདི་ཧྲང་ཧེ་གྲོང་ཁྱེར་ནས་མགོ་བརྩམས་ཏེ་རྒྱལ་ཡོངས་ཀྱི་ས་གནས་སོ་སོར་མཆེད་ཅིང་། འབྲེལ་ཡོད་ལས་ཁུངས་དང་སྡེ་ཁག་གིས་ཀྱང་རིམ་བཞིན་བརྡ་སྦྱོར་སྤེལ་ཏེ། གྲོང་ཁྱེར་ཡོད་ཚད་འཇགས་རྣམ་གྱི་རྣམ་པར་བསྒྱུར་ཅིང་། མི་ཚང་མ་ཁྱིམ་ནས་སྡོད་དགོས་པའི་རེ་བ་བཏོན་མ་ཐག གྲོག་ཚང་བརྡོལ་བ་ལྟ་བུའི་མི་ཚོགས་དང་རླངས་འཁོར་གྱི་འུར་ཟིང་མཐའ་དག་ཀྱང་སྐད་ཅིག་ཏུ་འཇགས་ཤིང་། ལན་རེར་གཉིད་ཀྱི་ཞིང་ལ་འཁྱམས་པའི་སྐད་ཅིག་མ་དེ་དང་ཧ་ཅང་འདྲ། སྐབས་འདིར། མི་ཡུལ་གྱི་ཆེས་མཛེས་པའི་གོས་དཀར་ལྷ་མོ་རྣམས་ཀྱིས་མིག་མདུན་གྱི་དཀའ་ཁག་རྒྱབ་ཏུ་བསྐྱུར་ཏེ། སྟོབས་ཤུགས་ཡོད་ཚད་རིམས་ནད་འགོག་པའི་ལས་སུ་ཉིན་མཚན་དབྱེར་མེད་དུ་འབུལ་བ་ནི། བླ་མེད་ཀྱི་སྙིང་སྟོབས་རིགས་ཤིག་ཡིན་ལ། གཞན་དོན་གྱི་ཁུར་ཆེན་སྒེར་གྱི་ཕྲག་པར་ལེན་པའི་ལྷག་བསམ་ཞིག་ཀྱང་རེད། གལ་སྲིད། གོས་དཀར་གྱོན་པའི་ཁོ་ཚོ་དང་ཁོ་ཚོའི་སྙིང་སྟོབས་ཀྱིས་བསླངས་པའི་ལས་དེ་དག་མེད་ན། ང་ཚོའི་འཇིག་རྟེན་ལ་དྲོད་ཁོལ་ཡོད་མི་སྲིད་ཅིང་། སང་ཉིན་གྱི་ཉི་འོད་འཇམ་པོ་ཡང་སེམས་ཀྱིས་མྱོང་ག་ལ་ཐུབ། དེའི་རྐྱེན་པས། ང་ཚོས་རབ་ཏུ་ལྕི་བའི་ཁོ་ཚོའི་བཀའ་དྲིན་དེ་དག་ཚོར་འོས་ལ། ཤིན་ཏུ་དཀར་བའི་དད་སེམས་ལ་སྙིང་ནས་སློབ་སྦྱོང་བྱ་འོས་པ་ཞིག་ཅི་ལ་མིན་ཨང་།

མར་ཤེས་དྲིན་དྲན་དྲིན་གཟོ།།ཡིད་འོང་བྱམས་པ་སྙིང་རྗེ།། ཞེས་གསུངས་པ་བཞིན། གཞན་གྱི་བཀའ་དྲིན་དྲན་པའི་འདུ་ཤེས་ནི་རྒྱུ་འབྲས་ལ་དགའ་སྟངས་ཤིག་ཡིན་ལ། མཐར་གཏུག་ན་སྐྱེ་བོ་ཡ་རབས་ཤིག་ཡིན་པའི་རྟགས་མཚན་ཞིག་ཅི་ལ་མིན། དེའི་རྐྱེན་གྱིས་ཧ་ཅང་ཛ་དྲག་ཆེ་བའི་དུས་འདིར། ང་ཚོའི་བདེ་སྡུག་ལ་སེམས་ཁུར་བྱེད་ཀྱིན་པའི་མི་འདི་དག་སྙིང་དབུས་སུ་འཇོག་པར་འོས་ལ། ལྷག་པར་དུ་རང་ཉིད་ཀྱི་ཁྱིམ་མི་དང་ལྷན་འཛོམས་ཀྱི་སྐལ་བ་ཕྲ་བའི་གོས་དཀར་ལྷ་མོ་དག་རང་གི་ཉེ་མི་བཞིན་བཀུར་ཏེ། ཁོ་ཚོའི་སྙིང་སྟོབས་དང་ཅི་བྱས་ཀྱི་སྟོབས་ཤུགས་མཐའ་དག་ང་ཚོའི་སློབ་སྦྱོང་ལ་བརྩོན་པ་བསྐྱེད་པའི་སྒུལ་ཤུགས་སུ་བསྟེན་ཏེ།མ་འོངས་པར་རིག་གནས་ཡོད་ཅིང་། སྤྱོད་ལམ་ཡག་པོ། གཞན་གྱི་བཀའ་དྲིན་དྲན་ཞིང་གཟོ་ཤེས་པའི་མི་ཞིག་བྱས་ཏེ། དུས་རབས་ཀྱི་མི་ཚད་ལྡན་ཞིག་བྱེད་པ་ནི་བཟློག་མེད་ཀྱི་འགན་འཁྲི་ཞིག་རེད་དོ།།

མདོར་ན། ནད་དུག་གིས་གཅུན་པའི་ཁོར་ཡུག་ཁྲོད་དུ། ང་ཚོའི་མིག་མདུན་གྱི་དཀའ་ཁག་འདི་རི་བོའི་ལྟོས་དང་མཉམ་ཡང་། འཇིག་རྟེན་ནི་བྱམས་དང་བརྩེ་བས་ཁེངས་པའི་མི་ཡུལ་ཞིག་ཡིན་པའི་ཡིད་ཆེས་སྔར་བཞིན་མཛོད་དང་། ང་ཚོའི་ཉེ་འཁོར་གྱི་གོས་དཀར་ལྷ་མོས་གཙོས་པའི་མི་མང་པོ་ཞིག་གི་རོགས་རམ་དང་ལྷག་བསམ་གྱིས་ནད་དུག་གི་འཇིགས་པ་འདི་ལས་མྱུར་དུ་གྲོལ་ཐུབ་ཅིང་། རྒྱལ་ཡོངས་ཀྱི་མི་རིགས་སོ་སོའི་སྐྱེ་བོ་ཀུན་གྱི་ལག་རྡང་གཅིག་ཏུ་སྦྲེལ་ནས་མདུན་ནས་མདུན་དུ་བསྐྱོད་ན།བདེ་སྐྱིད་ཀྱི་སྐྱ་རེངས་ཤིག་སྲིད་པའི་ཁྱོན་དུ་འཕྲོས་ཏེ། སྔར་མེད་ཀྱི་འཛུམ་མདངས་དང་སྤྲོ་བའི་ཡོ་ལང་ཞིག་དཀྲིགས་ངེས་པ་ནི་གོར་མ་ཆག་གོ།།