ཁྲག་གདོང་། 2022-10-21
ལུས་ལ་ཐོགས་པའི་ལས་ཀྱི་དར་ཐག་ཅིག །
ཕན་ཚུན་སྦྲེལ་ནས་ལོ་ཡིས་ལོ་མཐར་བཟུང་། །
ཁྲེལ་མེད་ལས་དང་མ་འདྲེས་ནམ་ཟླ་འདི། །
བག་ཡོད་ཚུལ་མཐུན་ནང་གི་གྲོགས་པོ་སྟེ། །
བཅོས་མའི་སྣང་བ་བོར་ནས་བས་མཐའ་རུ། །
འཚོ་བ་སྐྱིད་སྡུག་ཟུང་གིས་ཟིན་ཡང་རུང་། །
བརྩེ་བའི་འཛུམ་པ་ཡལ་བ་མེད་པའི་ངང་། །
ཆུང་གྲོགས་ཟླ་བ་གཞོན་ནུ་ཁྱེད་རང་ཡིན། །
ཟླ་བའི་མདངས་ལྟར་མཛེས་པ་མེད་ཀྱང་ཆོག །
ལུས་ཀྱི་ཕྱི་ནང་གཉིས་སུ་གྲོགས་ཁྱེད་མཆོག །
ངག་ནས་ཤོར་བའི་ཚིག་གི་མེ་ཏོག་རེ། །
ཡིད་དུ་ཨེ་འོང་ཞེས་ནས་ཁྱེད་ལ་འདྲི། །
ཡིད་སྙིང་མ་འགྱུར་ཀློང་གི་གྲོགས་ཁྱེད་དེ། །
སྣང་བ་རང་འགྲིག་ནང་དུ་འཕྲད་པ་ནི། །
ཚོར་བ་མི་འདྲ་སྣ་ཚོགས་བདག་ལ་བྱུང་། །
དེ་བས་གྲོགས་ཁྱེད་ཕྲན་ལ་འདང་ཆེ་ཡོད། །
བརྩེ་བའི་དམ་ཚིག་མ་ལྷོད་ཡུན་རིང་ཡིན། །
ཡུན་རིང་དུས་སུ་ཁྱེད་ནི་གཞན་པ་ལས། །
བྱམས་སྙིང་ཆེ་བའི་གྲོགས་པོ་དག་མ་ཡིན། །
ཡིད་ལ་ཆགས་པའི་མ་བཅོས་བརྩེ་བ་ནི། །
ཕྱི་གསལ་ནང་གསལ་ཞིག་གི་རྣམ་པ་སྟེ། །
འུ་གཉིས་བར་ལ་སྡིག་པའི་དྲི་མ་གོས། །
ཁྱེད་སེམས་དྭངས་མ་དེ་ལ་བདག་གི་ཡིད། །
དབང་མེད་ལས་ཀྱིས་འཕྲོག་སྟེ་ཡིད་དུ་འོང་། །
འདི་ཡང་གྲོགས་པོ་ཞིག་གི་མཚོན་རྟགས་ཏེ། །
ལས་ཀྱིས་བདག་ལ་དབང་བ་ཨེ་ཡིན་ཞེས། །
ཚིག་དང་ཚིག་གི་བར་དུ་ཡང་ཡང་འཁྱིལ། །
ཡིད་ལ་ཆགས་པའི་ངང་དུ་བདག་གིས་མྱོང་། །
སླད་མའི་ཚིག་དང་ཡིག་འབྲུ་མ་རྫོགས་ཤིང་། །
རྫོགས་མེད་དམ་ཚིག་རིང་མོ་སྔར་ལས་ཀྱང་། །
རྒྱུན་ཆད་བྲལ་ནས་ཁྱེད་ཀྱི་ལུས་ངག་ཡིད། །
ན་ཚ་གཏན་དུ་མེད་པས་འཚོ་ཐུབ་ཅིང་། །
རེ་བའི་རྨི་ལམ་གསོན་པོ་མཐར་ཐུག་པའི། །
སྨོན་ཚིག་གཙང་མ་དེ་དག་ལྷག་པའི་ལྷར། །
ཇི་ལྟར་བཅོལ་བ་ཇི་བཞིན་མངོན་དུ་འགྱུར། །
ཚེ་སྲོག་བྲག་ལྟར་བརྟན་པའི་སྨོན་ལམ་དེ། །
སྡིག་དང་སྒྲིབ་པ་བོར་ནས་ཁྱེད་ལ་ཕུལ། །
རྩོམ་གསར། 10