ཞོགས་པའི་ཉི་ཟེར་ཕྲ་མོ།།

རི་བོའི་ཕྲག་ནས་འཛུམ་དུས།།

ཨ་ཕས་མལ་ལས་ལོངས་ཞེས།།

ང་ལ་འབོད་བརྡ་བཏང་བྱུང་།།

དྲན་སྐུལ་གཏོང་བའི་དུས་ཚོད།།

གློ་བུར་ཉིད་དུ་གྲག་བྱུང་།།

བྱིས་པ་མལ་ལས་ལངས་ཏེ།།

ཁ་ལག་གཙང་མ་བཀྲུས་ཡོད།།

ཨ་ཕས་འཕྲུལ་རྟ་བཞོན་ནས།།

བྱིས་པ་སློབ་གྲྭར་བསྐྱལ་བྱུང་།།

ལམ་ཁའི་ལྕང་སྡོང་དག་གིས།།

མགོ་བོ་དུད་ནས་བལྟས་འདུག།

སློབ་གྲྭའི་སྒོ་གྱང་ངོས་སུ།།

རི་མོ་སྣ་ཚོགས་བྲིས་འདུག།

བྱིས་པའི་འཛུམ་ཆུང་གྱི་ལེར།།

སློབ་གྲྭར་བསུ་བ་བྲིས་འདུག།

རི་མོ་དེ་དག་མཐོང་བས།།

སྤྲོ་སྣང་སྐྱིད་པོ་བྱིན་སོང་།།

སློབ་གླིང་སྐྱིད་པོ་འདི་ག།

ང་རང་འཚར་སའི་ཡུལ་ཡིན།།

དྲིན་ཆེན་ཕ་ལོ་མ་ལོ།།

ཡུལ་ནས་བདེ་བར་བཞུགས་དང་།།

སློབ་གླིང་ཚལ་གྱི་བུ་ངས།།

སློབ་སྦྱོང་ཡག་པོ་བྱེད་ཡོང་།།

དགེ་རྒན་བསམ་བཟང་སྒྲོན་མས།།

བོད་ཡིག་ཡག་པོ་བསླབས་བྱུང་།།

དགེ་རྒན་སྤྱོད་བཟང་སྐྱབས་ཀྱིས།།

སློབ་གསོ་ཡག་པོ་བཏང་སོང་།།

སློབ་གྲྭའི་ཁོར་ཡུག་སྐྱིད་བྱུང་།།

རྩེད་རོགས་བྱིས་པ་མང་སོང་།།

གླིང་འདིས་བྱིས་པ་ང་ཚོ།།

འཚོ་བའི་རེ་བ་ཡིན་སོང་།།

བྱིས་པ་བྱིས་པ་ང་ཚོ།།

དགེ་རྒན་སེམས་ཀྱི་དྲོད་ཡིན།།

ཕ་མའི་སེམས་ཀྱི་སྙིང་ཡིན།།

བྱིས་པ་ང་ཚོ་སྐྱིད་བྱུང་།།

རྒྱ་ཡིག་སློབ་ཚན་ནང་གི།

གཏམ་རྒྱུད་སྐྱིད་པོ་དེ་དག།

ཕྱིར་ལ་ཡུལ་ལ་ཐོན་ན།།

ཕ་མ་གཉིས་ལ་བཤད་ཡོང་།།

བོད་ཡིག་སློབ་དེབ་ངོས་ཀྱི།།

གཏམ་དཔེ་ཚན་པ་ཁ་ཤས།།

ཨ་ཕས་ངག་ལས་གོ་མྱོང་།།

ཡིད་ལ་འཛིན་ཁ་བདེ་སོང་།།

ད་དུང་རྒྱ་ཡིག་ཁ་ཤས།།

ཞོང་ཏཱ་ཞོང་ཨར་གཉིས་ཀས།།

བཤད་པའི་སྐད་ཆའི་ནང་ནས།།

ལན་གཅིག་མིན་པར་ཐོས་མྱོང་།།

སློབ་གྲྭ་ཁ་དྲོ་བཀྲ་ཤིས།།

བྱིས་པའི་དུས་ཆེན་བསུས་བྱུང་།།

བྱིས་པ་ང་ཚོའི་སེམས་པ།།

དགའ་དགའ་སྤྲོ་སྤྲོས་ཁེངས་ཡོད།།

དགེ་རྒན་དགེ་རྒན་བཟང་པོ།།

སློབ་གྲོགས་སློབ་གྲོགས་བཟང་པོ།།

སློབ་གླིང་སླིབ་གླིང་སྐྱིད་པོ།།

ནམ་ཡང་ནམ་ཡང་མི་འབྲལ།།

ཕ་མ་གཉིས་ཀྱི་བཀའ་དྲིན།།

དགེ་རྒན་དམ་པའི་བཀའ་དྲིན།།

སློབ་གྲྭ་བཟང་པོའི་བཀའ་དྲིན།།

བཀའ་དྲིན་འདི་གསུམ་མི་བརྗེད།།