ང་རང་འཁོར་བའི་ངོས་ཀྱི་ཟླ་བ་སྟེ། །

འོད་ནི་མི་ཚོགས་སེམས་ཀྱི་རླབས་དཀར་ཡིན། །

ཁེར་ཧྲེང་འཚོ་བའི་ལམ་ཐག་རྒྱང་ལ་འཐེན། །

མི་ཚེའི་མེ་སྟག་ཕྲ་མོ་གཟིམ་ལ་ཉེ། །

ཚོར་བའི་རླབས་དཀར་འཕྱོ་བའི་སེམས་པ་རེ། །

འདས་ཟིན་ལོ་རྒྱུས་ངོས་སུ་བཞུར་བ་ན། །

ན་ཟུག་དབྱིངས་ལ་འཐེན་པའི་སྨྲེང་གླུ་དང་། །

ཕངས་སེམས་རི་མོ་ནག་ནོག་ཅི་ཡང་འཆར། །

ཡིད་ནི་སྤྲིན་དཀར་ཕོན་པོའི་རྡེ་འུ་ཡིན། །

སྐད་ཅིག་གློག་གི་མཛའ་མོ་སེམས་པ་ཡིན། །

མ་ཟིན་བྱ་བའི་ཁྲོད་ནས་རབ་རིབ་ཡིན། །

འདོད་ཆགས་ཚེར་མའི་གསེང་ནས་དྭངས་དྭངས་ཡིན། །

ད་ནི་རང་གི་ལམ་བུ་རྒྱང་ལ་འཐེན། །

སེམས་པའི་ལྕེ་ཡིས་ཤེས་བྱའི་བུ་རམ་ལྡག །

འདི་ཕྱི་དམུ་ཐག་སྐས་ཀྱི་ཐེམ་པ་རེ། །

བསོད་ནམས་ལས་ཀྱིས་བརྒལ་བར་བྲེལ་སྣང་འཆར། །

ཨེ་མ་འཁོར་བ་འདི་ཡང་བཙོན་དོང་མིན། །

འཁོར་བའི་ལྷ་མོ་འདི་དག་ཐར་པ་ཡིན། །

འཁོར་བའི་ཕྱི་ཤུན་འདི་ནི་འཚོ་བ་ཡིན། །

འཁོར་བའི་ནང་སྙིང་དེ་ནི་བདེ་བ་ཡིན། །

ཡོད་མེད་སྐད་ཆ་དེ་དག་རྫུན་མ་ཡིན། །

དོན་དམ་སེམས་པས་ཟིན་ན་དངོས་ཡོད་ཡིན། །

ལམ་བུ་ཀྱག་ཀྱོག་སེམས་པའི་གཞུང་ལ་འཐེན། །

བདེན་རྫུན་བློ་ཡི་ངོས་སུ་སྤུར་བར་རྩོམ། །

ཨ་ཧོ་ཆོས་ལ་གོམས་པའི་རང་རྒྱུད་དེ། །

ད་ལྟ་བསམས་ན་ཁྲེལ་གཞུང་གུད་དུ་རྒྱུ། །

ནམ་ཞིག་རྒྱ་ལས་གྲོལ་ཏེ་སེམས་ངོ་བཙལ། །

མཐར་ཐུག་ཐར་པའི་རི་སུལ་འགྲིམ་སྙིང་ཆེ། །

འདབ་ལོའི་ངོས་སུ་ཟིལ་བ་ཐར་ཐར་འཐོར། །

ཟིལ་ཐིགས་རེ་རེ་མེ་ཚེའི་ཁུད་ན་འཕྱོ། །

ཐ་སྙད་རླངས་པ་ཁ་སྤུའི་ནང་ན་འཚེར། །

དོན་དམ་དབུ་བ་དཀར་པོ་སེམས་སུ་འཇོ། །

མངོན་རྗེས་ཚད་མའི་ཐག་ནག་ཞགས་པ་དེ། །

བདག་འཛིན་གླང་སྨྱོན་དར་མའི་སྐེ་ལ་བསྐོན། །

ཡིན་མིན་བློ་ཡི་སྒྲོ་འདོགས་རབ་རོབ་དག །

ཡང་དག་རིགས་པའི་བར་ནས་གསལ་བར་བྱ། །

རང་སེམས་མེ་ལོང་གསལ་བའི་ངོས་ཡངས་ལ། །

ནག་ནོག་ས་རྡུལ་སྐྱ་བོ་བྱི་དོར་བྱ། །

གནས་ལུགས་ཨ་ཡིག་དཀར་པོའི་ཕྱི་ནང་ནས། །

དོན་དམ་སེམས་ངོ་འདི་ལ་རང་ངོ་འཛིན། །

ཧད་ཀྱིས་བལྟས་ན་རང་སེམས་རང་ལ་དབང་། །

སེམས་ཀྱི་ངོས་སུ་མཛུབ་མོས་ཡང་ཡང་བཙུགས། །

གཞི་ཡི་གནས་ལུགས་རང་རྒྱུད་དམ་པ་ཡིན། །

སོ་སོར་བཞག་ན་འཁྲུལ་སྣང་འཕྱོ་ཉེན་གདའ། །

ཨེ་མ་སྤྲིན་དཀར་འདབ་མ་མཁའ་རུ་རྒྱུ། །

སོས་ཀའི་དུས་སུ་ལྗང་གཞོན་སྤང་ལ་ཡན། །

ཧ་ཅང་མཚར་སྣང་འཆོར་བའི་སྒྱུ་འཕྲུལ་དག །

རྒྱུ་འབྲས་གནས་ལུགས་གསལ་བའི་དན་རྟགས་ཡིན། །

ཕྱི་མའི་ལམ་ཁ་མུན་པ་ནག་ནོག་ཅེས། །

སུ་ཞིག་གིས་ཀྱང་བདེན་དཔང་སྟོན་ཐུབ་མེད།

ད་ལྟའི་འདི་སྣང་འཁྲུལ་བའི་གནས་ལུགས་དེ། །

རང་གིས་རང་ལ་བཞག་པ་ཨེ་ཡིན་བསམ། །

གཏན་ཚིགས་རྨི་ལམ་ངོས་སུ་རྒྱང་རིང་རྨིས། །

དོན་དམ་སྒེའུ་ཁུང་དེ་ཉིད་གཞན་ལ་གཡར། །

ཐང་སྟོང་ཕྱེ་མའི་ནང་ནས་རང་ཉིད་བཙོག །

ཕྱི་མའི་ལམ་ཁ་རྟག་པའི་མཚོ་མོར་ཐིམ། །

གློ་བུར་ངེས་འབྱུང་རྩྭ་མགོའི་ཟིལ་བ་ཡིན། །

རྐྱེན་ཕྲ་དོག་པོ་རེ་ཡིས་གཏོར་ནུས་པས། །

ཆུ་ཡི་གཉེར་མ་ལས་ཀྱང་མི་རྟག་ན། །

འདི་འདྲའི་ངེས་འབྱུང་ཙམ་གྱིས་ཆོག་མི་བྱ། །