སད་མ། 2022-05-25
མི་ཚེ་སྐྱོ་བས་བསྐྱལ་དགོས་སམ། །
འཚོ་བ་སྨུག་པས་འཛིན་དགོས་སམ། །
ལས་ཀྱི་ཐག་པས་བསྒྲོགས་ནས་བཟུང་། །
སྲིད་པའི་མེ་ཏོག་ཁེ་མཚར་པོ། །
རིང་ནས་འཇའ་རུ་གྲུབ་བམ་ཅི། །
སྣང་བ་ཆུ་བཞིན་འཁྱག་ན་ཡང་། །
ཁ་ཡིག་སྐོར་ལོག་སུ་ཡིས་བྱས། །
དབྱངས་ལ་འཁོར་བའི་བུང་བ་འགའ། །
རྣམ་ཤེས་འདར་བའི་ཟོལ་ཙམ་གྱིས། །
ཉི་མ་བྲལ་བའི་པདྨ་ལྟར། །
རིང་ནས་འདར་གྱིན་འདར་གྱིན་བྲེལ། །
སྲོད་ལ་བཏང་བའི་ཡིག་ཆུང་ཞིག །
རི་ཆུང་བྱ་དེས་མཐོང་ངམ་ཅི། །
དགའ་དུང་རིང་མོའི་འཚོ་བ་ཞིག །
དྲན་པའི་ངོས་ནས་སླར་ཡང་བསྐྱལ། །
རྩོམ་གསར། 10