གཅེས་ཕྲུག་ཚོ་དང་མཉམ་དུ་དུས་སྟོན་རོལ།

ཉི་མ་རྡོ་རྗེ།        2022-06-01

དྲུག་གཅིག་བྱིས་པའི་དུས་ཆེན་ལ་རྟེན་འབྲེལ་ཞུ།

དཔྱིད་ཀྱི་རྒྱལ་མོ་ཡུལ་འདིར་འབྱོར་དང་ལྷན།།

བཀྲ་ཤིས་དུས་བཟང་དྲུག་པའི་ཚེས་གཅིག་ཤར།།

སློབ་རའི་ནང་དུ་དགའ་བའི་བྲོ་གར་འཁྲབ།།

བྱིས་པའི་གདོང་ནས་འཛུམ་གྱི་མེ་ཏོག་གྲོལ།།

དབྱངས་ཀྱི་དྭངས་མ་ཀ་ཁའི་ལ་གཞས་ལེན།།

བཅུ་ཕྲག་རིག་པའི་འོ་མཚོར་ངོམ་མེད་ཞུགས།།

ཤུལ་བཞག་ནོར་བུའི་གསུང་ཆོས་བཅུད་བཟང་ལེན།།

བྱིས་པ་དུས་ནི་སློབ་ཁང་ནང་ནས་འདའ།།

ཁྲ་ཐར་ཐར་གྱི་དཔྱོད་ཤེས་རྣམ་རིག་ལྡན།།

ལང་ཚོའི་ཟེའུ་འབྲུར་གསོན་ཤུགས་གསར་པ་རྒྱས།།

རིག་པའི་ཚལ་ལ་གཤོག་རྩལ་འཕུར་ལྡིང་བགྱིས།།

བྱིས་པའི་དུས་འདི་སློབ་ལ་འབད་པའི་དུས།།

ཐོ་རེངས་སྐར་ཆེན་ཤར་དུས་ཡར་ལ་ལངས།།

དཔེ་ཀློག་སྙན་མོའི་དབྱངས་རྟ་སློབ་རར་ཁྱབ།།

ཕུགས་འདུན་སེམས་སུ་འཆང་བའི་བྱིས་པ་ཚོས།།

ནམ་ཞིག་སྙན་པའི་གྲགས་པ་རྒྱང་ལ་འཇོག།

འཆད་རྩོད་རྩོམ་གསུམ་ལས་ལ་རྒྱུན་དུ་བརྩོན།།

གཞན་ཕན་ལྷག་བསམ་བཟང་པོས་སློབ་གསོ་གནང་།།

བྱམས་བརྩེའི་ཁ་ཏ་ཕ་མ་ལས་ཀྱང་ལྷག།

བྱིས་པའི་དུས་འདི་དགེ་རྒན་བཟང་པོས་བསྐྱངས།།

སྐབས་འགར་མ་རབས་པྲ་ཚགས་བྱ་བ་བསྒྲུབས།།

དུས་ཐོག་ལས་བྱ་དུས་འགྱངས་ཤོར་ནས་ལྷག།

སློབ་ཁྲིད་དུས་སུ་ཁ་གཡེང་མིག་གཡེང་གིས།།

གཅར་རྡུང་ཉོ་བའི་དུས་ཀྱང་རེ་འགར་ཡོད།།

དང་ཐོག་ཀ་ཁ་འབྲི་དུས་ཞ་སྨྱུག་འཛིན།།

སློབ་འབྲིང་སྒོ་གླེགས་འགྲིམ་དུས་ལྕགས་སྨྱུག་འཛིན།།

ལང་ཚོའི་དཔྱིད་དཔལ་རྒྱས་པའི་བློ་གྲོས་དེ།།

སྙུ་གུའི་འགྱུར་བ་འདི་དང་ལྷན་དུ་འགྲོགས།།

སློབ་གྲོགས་ཕན་ཚུན་བར་ལ་མཐུན་སྒྲིལ་ཟབ།།

ཀུན་ལ་དགའ་བའི་འཛུམ་མདངས་སྟོན་ལ་མོས།།

སྤྱི་ཚོགས་ཕན་བདེ་བསྐྲུན་པའི་སྤྱོད་བཟང་དེར།།

ཚང་མས་མཐེ་མོ་བསྟན་ནས་བསྟོད་ར་གཏོང་།།

གསེར་ལས་དཀོན་པའི་ན་ཆུང་ལང་ཚོ་དེ།།

ཤེས་བྱའི་བདུད་རྩི་འཐུང་བའི་ལས་ལ་ཞུགས།།

མདུན་ལྗོངས་གསར་པ་བསྐྲུན་པའི་འདུན་པ་ལྟར།།

ཤེས་རིག་དགའ་ཚལ་གླིང་ལ་འཇུག་པར་གྱིས།།

ཁོད་ཡངས་བཀོད་གཙང་ཉམས་དགའི་དབུས་དཀྱིལ་ན།།

ཁང་བརྩེགས་མཐོན་པོ་སྐར་ཁུང་གསལ་ལམ་མེར།།

སློབ་ལ་བརྩོན་པའི་ཁོར་ཡུག་བཟང་པོའི་ནང་།།

ནད་མེད་ཚེ་རིང་ཡོང་བའི་སྨོན་འདུན་ཞུ།།



  • ལེ་ཚན་སྔོན་མ།:བྱིས་པའི་དུས་ཆེན་བསུ་བའི་གླུ།
  • ལེ་ཚན་རྗེས་མ།:མི་ཉག་རྡོ་ར་དཀར་མོའི་སློབ་གྲྭའི་དྲུག་གཅིག་བྱིས་པའི་དུས་ཆེན་གྱི་ཆེད་བསྒྲིགས་རྩོམ་ཡིག།