བསང་དུད་ནམ་མཁར་འདྲེས་ཏེ།།

སྨུག་པའི་སྐེ་རགས་བཅིངས་ནས།།

ལུག་ཁྱུའི་མགུལ་རྒྱན་བཏེགས་འདྲའི།།

ཕ་ཡུལ་གསེར་གྱི་གཞོང་པ།།

མེ་ཏོག་དཔུང་རོགས་བྱས་ཏེ།།

རྩྭ་ལྗང་གདན་ལ་བཏིང་ནས།།

ཤུག་པའི་འཇའ་གུར་ཕུབ་འདྲའི།།

ཕ་ཡུལ་གསེར་གྱི་གཞོང་པ།།

རླུང་བུས་ལམ་བུ་བསྟན་ཏེ།།

སྒོ་ཁྱིའི་འབོད་བརྡ་གཏོང་བཞིན།།

སྒོར་དར་ཁ་བཏགས་འཐེན་འདྲའི།།

ཕ་ཡུལ་གསེར་གྱི་གཞོང་པ།།

ལྗོན་ཤིང་གོས་སུ་གྱོན་ཏེ།།

སྡོང་ལོས་ས་གཞི་གཡོགས་ནས།།

ཡལ་གའི་བསུ་མ་བྱེད་འདྲའི།།

ཕ་ཡུལ་གསེར་གྱི་གཞོང་པ།།

ནོར་ཁྱུས་སྒོ་སྲུང་བྱས་ཏེ།།

རྟ་ཕོས་བྱ་ར་བྱེད་བཞིན།།

རྨིག་སྒྲ་སྐར་ཚོགས་ཤར་འདྲའི།།

ཕ་ཡུལ་གསེར་གྱི་གཞོང་པ།།