ཨ་ནུ་དད་ཞེན། 2021-08-20
ཟབ་ཡངས་ཆུ་གཏེར་འཕྱུར་བའི་རླབས་ཀྱི་རྩེར།།
བསོད་ནམས་སྤྲིན་གྱི་མེ་ཏོག་སྒྱུ་འཕྲུལ་ལས།།
མངོན་ཤེས་དྲུག་ལྡན་མཁྱེན་རབ་འཛུམ་པ་མོ།།
ཆུ་འཛིན་དཀར་པོའི་གློག་ཕྲེང་དྲ་བ་ཅན།།
མཛེས་སྡུག་འདབ་བརྒྱ་གྲོལ་བའི་ཆུ་སྐྱེས་གདན།།
ལེགས་བྲིས་སྡུག་གུ་རང་བྱུང་དཔལ་དུ་ཚེས།།
སྒེག་འཛུམ་མེ་ཏོག་བཞད་པའི་ཟླ་མཛེས་མ།།
མཁའ་ཡི་མཛེས་བྱེད་འདྲ་བའི་ཡིད་འཕྲོག་མ།།
དམར་མདངས་མཆུ་སྒྲོས་བྱུ་རུའི་མེ་ཏོག་མདངས།།
རབ་དཀར་ཚེམས་ཀྱི་གེ་སར་འཛུམ་གྱིས་བཞད།།
ཚངས་དབྱངས་མགྲིན་པར་འཇོ་བའི་དབྱངས་ལྡན་མ།།
དྲི་ཟའི་ན་ཆུང་དབུས་ན་འཇོ་སྒེག་མཁན།།
དོན་ལྡན་ཚིག་གི་འབྱུང་གནས་ནོར་བུའི་གཏེར།།
མཉེན་ལྕུག་སོར་མོས་པི་ཝང་བཀྲོལ་བའི་འགྲོས།།
ལྷང་ལྷང་བཞུར་བའི་ཁྲོད་ན་འཇོ་སྒེག་ཅན།།
རིང་ནས་བརྩེ་བའི་ལྷ་མོ་ད་ཚུར་བྱོན།།
སྨིན་ལེགས་ཞལ་ཁྱིམ་ཟླ་བའི་དཀྱིལ་འཁོར་ལ།།
སྨིན་དཀྱུས་བུང་བའི་རྣམ་འགྱུར་རྫོགས་པ་ཅན།།
ཟུར་མིག་སྦྲང་རྩིའི་བཅུད་ལྟར་ཞིམ་པ་མོ།།
པདྨའི་བཞིན་ལ་གཡོ་ལྡན་བུང་བའི་མིག།
གནག་སྣུམ་ལྕང་ལོ་དཔུང་བའི་དབྱིངས་ན་ལྡེམ།།
ཟག་མེད་དུང་གི་མྱོས་བུམ་བྲང་ན་དོད།།
སྐྱིལ་ཀྲུང་དིང་འཛིན་སྒོམ་པའི་མཚོ་ལྡན་མ།།
མཐོན་མཐིང་རལ་བའི་རྩེ་ན་འོད་དཀར་ཅན།།
འོ་འཛིན་གཟེངས་སུ་དོད་པའི་ཟེའུ་འབྲུ་ལ།།
གྲོང་པའི་ཆོས་ཀྱིས་གཏན་དུ་མ་གོས་ཤིང་།།
ན་ཆུང་རྟུལ་ཞུགས་འཛིན་པའི་ལྷ་མོ་སྟེ།།
རོལ་སྒེག་གར་གྱིས་འགྱིང་བའི་དབྱངས་ཅན་མ།།
འཇམ་པའི་རེག་བྱ་པད་མའི་འདབ་ལས་སྐྱེས།།
བྱིན་རླབས་ཚན་ཁ་རིན་ཆེན་སྣ་ལྔའི་དཔལ།།
མཛེས་ལྡན་ཟླ་བའི་གཞོན་ནུའི་མདངས་ཅན་མ།།
ད་དུང་བདག་ལ་ངག་གི་དངོས་གྲུབ་སྩོལ།།
བིམ་པའི་ཞལ་སྒོར་ཨུ་པད་དྲི་ཡིས་ཁྱབ།།
རི་དྭགས་འདྲོགས་པའི་སྤྱན་ཟུང་མིག་གི་དཔྱིད།།
རབ་ཏུ་དགོད་ཅིང་གཟུགས་མཛེས་ཡིད་འོང་མ།།
རོལ་རྩེད་གར་གྱི་ཉམས་ལྡན་རི་དྭགས་མིག།
ཞལ་ཁྱིམ་པད་འདབ་གྲོལ་བའི་དཀྱིལ་འཁོར་ཅན།།
ཆགས་བྲལ་སྨིན་མའི་རྣམ་འགྱུར་གསལ་བ་ཅན།།
ལང་ཚོར་གཡེར་བག་ལྡན་པའི་ན་ཆུང་ཁྱེད།།
མིག་གིས་ལྟ་བས་མི་ངོམ་ཡིད་འཕྲོག་མ།།
ཟབ་ཡངས་རྒྱ་མཚོའི་རླབས་ཕྲེང་དབྱངས་ཀྱིས་སྐྱོམ།།
ཆོས་ཀུན་གླུ་རུ་ལེན་པའི་ལོངས་སྤྱོད་ཀྱིས།།
འགྲོ་ཀུན་དགའ་བའི་དང་བ་འདྲེན་བྱེད་མ།།
མ་ལྟར་བརྩེ་བ་ཁྱོད་ཀྱིས་བདག་གི་ངག།
རླངས་པ་ཐུལ་ཐུལ་འཁྱིལ་བའི་པད་མའི་གསེབ།།
ངང་བུའི་བུ་མོ་ཁྲུས་ལ་རོལ་དང་བསྡོངས།།
ལྷོ་ཕྱོགས་རྒྱ་མཚོའི་མཐོངས་སུ་རྩེན་པ་ཡི།།
ངག་དབང་ལྷ་མོ་ཉིད་དང་མཚུངས་པར་མཛོད།།
རྒྱ་མཚོ་ངོགས་སུ་ལྡེམ་པའི་ཆུ་སྐྱེས་བཞིན།།
དབྱངས་ཀྱི་ལོངས་སྤྱོད་ངག་གི་དཔལ་དུ་འཁྲུངས།།
རབ་དཀར་ཞལ་ཁྱིམ་མཛེས་པའི་ངང་ཚུལ་ནི།།
སྟོན་ཟླ་རྒྱས་པའི་དཔལ་ལས་ལྷག་པར་མཛེས།།
ཕྱག་སོར་རྒྱུད་སྐུད་དབྱངས་ཀྱིས་གར་ལ་སྤྱོན།།
ངག་གི་གདངས་སྙན་ཁམས་གསུམ་དགའ་བ་སྐྱེད།།
རྒྱུད་ལྡན་པི་ཝང་ལྷོད་ཀྱིས་བཀྲོལ་བ་ཡིས།།
ཚངས་དབྱངས་སྙན་པའི་གདངས་ཀྱང་ཟིལ་གྱིས་གནོན།།
རྣམ་དཔྱོད་ཤེས་རབ་ཟབ་པའི་ཁྱོན་ཡངས་ལ།།
ཐབས་ཤེས་ཉི་ཟླ་ནམ་མཁའི་དབྱིངས་དང་སྡེབ།།
ཆོས་ཀུན་ཐུགས་སུ་གསལ་བའི་མཁྱེན་རབ་དཔལ།།
ཟབ་ཡངས་རྒྱ་མཚོའི་འཇིངས་ལྟར་དཔག་དཀའ་བ།།
སྙན་ཚིག་ངག་གི་མེ་ཏོག་འཁྲུངས་བ་ལ།།
དད་པའི་སོར་པད་རྣམ་ཀུན་སྤྱི་བོར་ལེན།།
ཚིག་སྦྱོར་ཚུལ་ལ་རྨོངས་པའི་བུ་ཆུང་གིས།།
དབྱངས་ཅན་ལྷ་མོའི་སྐུ་གསུངས་ཐུགས་ལ་འདུད།།
རྩོམ་གསར། 10