དང་པོ། ཇ་བཤད།

གཡས་གསེར་སྐྱེམས་ནང་ལ་ཇ་སྣ་ཡོད།། ཇ་འདི་ཡི་འབྱུང་ཁུངས་བཤད་པ་ན།། ཤར་རྒྱ་ནག་བཀྲ་ཤིས་རི་བོ་ནས།། ཚོང་དཔོན་ནོར་བུ་བཟང་བོ་གཅིག། ལག་དོ་ཀརྨ་བཀྲ་ཤིས་གཉིས།། རྒྱབ་དྲེལ་མི་ཉག་འཚེར་མོ་གསུམ།། རྒྱ་ནག་པོའི་ཇ་གཡང་འབེབས་པའི་དུས།། ཉིན་རིའི་ཉིན་གྱི་ཤོག་དཀར་ཇ།། སྲིབ་རིའི་སྲིབ་ཀྱི་ཤོག་ནག་ཇ།། ཉིན་སྲིབ་བར་གྱི་ཤོག་དམར་ཇ།། ཇ་རབ་ཇ་ཡི་བླ་མ་དང་།། རྒྱ་ཇ་མེ་ཏོག་གཡང་འཛིན་གཅིག། ཏིལ་འབྲུ་ཇ་ཡི་དཔོན་པོ་གཉིས།། ཅན་ཤིང་ཇ་ཡི་དཔའ་བོ་གསུམ།། འབྲུ་དང་ཇ་ཡི་མ་བྱན་བཞི།། ལྷ་ཇ་ཇ་ཡི་གཡོག་མོ་ལྔ།། ཀོང་རྩི་ཇ་ཡི་གཡོག་དང་དྲུག། རྫ་ཆུ་བསིལ་མ་དེ་དང་བདུན།། འབྲི་མར་སེར་བོ་དེ་དང་བརྒྱད།། བྱང་ཚྭ་དཀར་ཡག་དེ་དང་དགུ།། དགུ་སེར་ཇ་ཡི་དགུ་དཀྲུག་བརྒྱབ།། ཇ་ཐེངས་གསུམ་བཞེས་དང་དབུ་འཕང་མཐོ།། དབང་བོ་གསལ་ཞིང་རིག་པ་རྣོ།། ལྷ་བླ་མས་གསོལ་ན་ཆོས་སྒོ་ཡངས།། གོང་དཔོན་པོས་གསོལ་ན་ཁྲིམས་སྒོ་ཡངས།། མ་སྲུ་མོས་གསོལ་ན་གནས་སྒོ་ཡངས།། བུ་ཚ་བོས་གསོལ་ན་དགྲ་མགོ་ནོན།། སྨན་བུ་མོས་གསོལ་ན་བག་འགྲོ་བྱེད།། ཆུང་བྱིས་པས་གསོལ་ན་རྩེད་ར་རྒྱས།། གཉེན་ཕོ་མོ་རྣམས་ཀྱིས་རེ་རེ་མཆོད།། རྟགས་དང་རྟེན་འབྲེལ་འགྲིག་ལེ་ཡིན།། ལས་དང་སྨོན་ལམ་བཟང་ལེ་ཡིན།།

གཉིས་པ། ཆང་བཤད།

གཡོན་དངུལ་སྐྱེམས་ནང་ལ་ཆང་སྣ་ཡོད།། ཆང་འདི་ཡི་འབྱུང་ཁུངས་བཤད་དགོས་ན།། ཕུན་སུམ་ཚོགས་པའི་ཐབ་ཀྱི་ནང་།། དམར་འོད་འཚེར་བའི་མེ་ཞིག་འབུད།། བཀྲ་ཤིས་འཁྱིལ་བའི་ཟངས་ཤིག་བཙུགས།། རྒྱུན་ཆད་མེད་པའི་ཆུ་ཞིག་བླུགས། ཨ་ཡག་ནས་ཀྱི་ཕ་དང་གཅིག། དར་ཡག་ནས་ཀྱི་མ་དང་གཉིས།། རྒྱ་སྨུག་ནས་ཀྱི་བང་མཛོད་གསུམ།། སེང་ཁྲི་ནས་ཀྱི་སྡེ་བ་བཞི།། སྨ་ར་ནས་ཀྱི་བླ་མ་ལྔ། ཁྲ་བོ་ནས་ཀྱི་ཞང་བོ་དྲུག། ནས་དཀར་ནས་ཀྱི་སྐྱ་བོ་བདུན།། དམར་ཁྲ་ནས་ཀྱི་གྲྭ་བ་བརྒྱད།། སྔོ་ཆུང་ནས་ཀྱི་རྒན་མ་དགུ། ཁ་ར་ནས་ཀྱི་གཡོག་མོ་བཅུ།། ལོ་གསུམ་བཙོས་པའི་ལོ་ཆང་ཡིན།། ཟླ་གསུམ་བཙོས་པའི་ཟླ་ཆང་ཡིན།། ཆང་ཐེངས་གསུམ་བཞེས་དང་དབུ་འཕང་མཐོ།། ཕ་ཡུལ་སྟོད་ཀྱི་བུར་དཀར་ཆང་།། ཚ་བ་རོང་གི་རྒུན་འབྲུམ་ཆང་།། རྫ་ཡུལ་རོང་གི་འབྲས་དམར་ཆང་།། ལོ་ལ་བཙོས་པའི་ལོ་ཆང་ཡོད།། ལོ་ཆང་ལོ་ཡག་ཁམ་པ་ཡོད།། ཟླ་ལ་བཙོས་པའི་ཟླ་ཆང་ཡོད།། ཟླ་ཆང་ཟིལ་མངར་ལྡན་པ་ཡོད།། ཞག་ལ་བཙོས་པའི་ཞག་ཆང་ཡོད།། ཞག་ཆང་ཞག་ལོ་མེ་འབར་ཡོད།། ཉིན་ལ་བཙོས་པའི་ཉིན་ཆང་ཡོད།། ཉིན་ཆང་བདུད་རྩི་བསིལ་མ་ཡོད།། དཀར་ཡོལ་བཀྲ་ཤིས་རྟགས་བརྒྱད་ནང་།། རྒྱལ་སྲིད་རི་མོ་སྣ་བདུན་ཡོད།། སེངྒེའི་མར་གྱི་ཁ་རྒྱན་ཡོད།། ཆང་ཐེངས་གསུམ་བཞེས་དང་དབུ་འཕང་མཐོ།། གཉེན་ཕོ་མོ་རྣམས་ཀྱིས་རེ་རེ་མཆོད།། རྟགས་དང་རྟེན་འབྲེལ་འགྲིག་ལེ་ཡིན།། ལས་དང་སྨོན་ལམ་བཟང་ལེ་ཡིན།།

གསུམ་པ། འོ་བཤད།

མདུན་དུང་སྐྱེམས་ནང་དུ་འོ་འདྲེན་ཡོད།། སེངྒེ་དཀར་མོའི་འོ་མ་གཅིག།། གཡུ་འབྲུག་སྔོན་མོའི་འོ་མ་གཉིས།། རྒྱ་ཚ་བ་མོའི་འོ་མ་གསུམ།། མ་ཧེ་ཁ་དཀར་འོ་མ་བཞི།། ཟལ་མོ་འབྲི་ཡི་འོ་མ་ལྔ།། ཁྱུང་དཀར་མཛོ་མོའི་འོ་མ་དྲུག།། འདོད་འཇོ་བ་ཡི་འོ་མ་བདུན།། གཡང་དཀར་ལུག་གི་འོ་མ་བརྒྱད།། ཚེ་ཚེ་ར་ཡི་འོ་མ་དགུ།། འོ་སྣ་ནང་གི་འོ་འདྲེན་དེ།། ཐེངས་གསུམ་བཞེས་དང་ཤ་ལོ་དཀར།། གཟུགས་པོ་སོས་ཤིང་ཁ་ཞིང་ཆེ།། རྩི་དང་རོ་བཅུད་ལྡན་པ་ཡོད།། བཀྲ་ཤིས་དུས་ཀྱི་སྨོན་ལམ་འགྲུབ།།