ཉིན་དེ་དག་ལ།ང་ཡང་ཡུལ་དང་གྱེས་ཏེ་ལེ་དབར་ལེ་དབར་གྱི་སར།དེབ་ཆུང་ཆུང་ཞིག་ལ་ཤི་འཐམ་རོ་འཐམ་བྱས་ནས་ཡོད།ཉིན་དེ་དག་ལ།ང་ལ་ཟླ་འོད་ལྟ་བུའི་འཛུམ་མདངས་ཡོད་པས་མུན་ནག་ལ་མི་ཞེད།ང་ལ་རང་ཉིད་ཀྱིས་བསྐྲུན་པའི་འཇིག་རྟེན་ཆུང་ཆུང་ཞིག་དང་།དེ་ལ་རྒྱུ་བའི་རི་དྭགས་ཁྱུ་གཅིག་ཡོད་པས་ཁེར་རྐྱང་ལའང་ཡེ་ནས་མི་སྐྲག ཁེར་རྐྱང་ནི། དགུང་ན་འཕགས་པའི་ཉི་མ་བཞིན།མཁའ་ན་འཕུར་བའི་བྱ་གླག་བཞིན།ས་ན་བཞད་པའི་མེ་ཏོག་བཞིན།དྲོ་སོབ་བེར་འདུག ལྷུག་ཤིག་གིར་འདུག ཁྲ་ཆིལ་ལེར་འདུག ཁེར་རྐྱང་ལ་རྟོད་ཐག་མེད་པས་བྱ་རྨྱང་བྱེད་སྟངས་ཤིག་ལ་གནམ་ས་བརྟོལ་ཆོག ཁེར་རྐྱང་ལ་སྣེ་མོ་མེད་པས་སྐོར་བ་རྒྱག་ཐེངས་ཤིག་ལ་རྒྱལ་ཁམས་ཉུལ་ཆོག ཁེར་རྐྱང་ལ་ཟམ་པའང་མེད་པས་ཆུ་བོ་བརྒལ་བའི་ཞོར་ལ་གཟུགས་པོ་ཡང་བཀྲུ་ཆོག ཚག་སྒྲ་ཚོབ་སྒྲ་ཇི་ལྟར་ཆེ་ཡང་ང་ཁེར་རྐྱང་ལ་མི་ཞེད།རྡག་སྒྲ་རྡིག་སྒྲ་ཇི་ལྟར་ཆེ་ཡང་ང་ཁེར་རྐྱང་ལ་མི་འཇིགས།རྒྱུ་མཚན་ནི། ཁེར་རྐྱང་ཞེས་པའི་ཡིག་འབྲུ་གཉིས་པོ་མ་གཞི་ནས་བདུད་རྒན་ཞིག་ཡིན་པས་སོ། རྒྱུ་མཚན་ནི། ཁེར་རྐྱང་གི་སྐབས་སུ་སེམས་ཀྱི་ཆུ་མོ་དེ་དྭངས་ཤོས་དང་ཀླང་པའི་ཞོ་མོ་དེ་མངར་ཤོས་ཡིན་པས་སོ།གང་ལྟར་ང་ཁེར་རྐྱང་ལ་མི་སྐྲག།དེ་ལས་ལྡོག་ཏེ་ང་ཁེར་རྐྱང་ལ་ལྷག་པར་དགའ།ཀྱེ་ཀྱེ། ཁེར་རྐྱང་ལགས། ཁྱེད་ཀྱི་ཞབས་པད་ཁྲི་ལོར་ནས་ཁྲི་ལོར་བརྟན་པ་ཤོག