ཁྱོད་ཀྱི་ནང་སེམས།

དུ་སྤྲིན།        2021-08-17

ཁྱོད་རང་མེ་ཏོག་ཅིག་ཡིན་ཏེ།

འདབ་མ་རེ་རེས་འདམ་མྱགས་ཀྱི་དྲི་མ་བཀྲུས་ནས།

ས་གཞི་ལ་མཛེས་སྡུག་གི་ཁ་དོག་བཏབ།

ཉི་ཟླའི་འོད་ཕུང་གིས་གསོས་ཤིང་།

ཉི་ཟླའི་འོད་ཕུང་ལ་ཆགས།

ཁྱོད་རང་ཕྱེ་མ་ལེབ་ཅིག་ཡིན་ན།

དེ་ནི་སྤྱིར་བཏང་གི་ཕྱེ་མ་ལེབ་མ་ཡིན་པར།

དགུན་གྱི་གྲང་ངར་ཁུར་ཐུབ་པའི་ཕྱེ་མ་ལེབ་ཅིག་ཡིན།

རི་གྲོང་ཆུང་ཆུང་དེ་ནས་འཕུར་ཞིང་།

སླར་ཡང་རི་གྲོང་ཆུང་ཆུང་དེ་རུ་

ལོག་ཡོང་བའི་ཕྱེ་མ་ལེབ་ཡིན།

ཁྱོད་རང་ཕ་ཡུལ་དང་བར་ཐག་རིང་བའི་སྟབས་ཀྱིས།

ཁྱོད་རང་གི་སེམས་སུ་ཕ་ཡུལ་གྱི་ཁ་དོག་ལྗིད་ཏིག་གེར་ཡོད།

ཕ་ཡུལ་དྲན་པའི་ཉིན་ཞག་གི་ཕྲེང་བ།

ལོ་ཟླའི་བསྟར་ལ་བརྒྱུས་དོན།

ཁྱོད་རང་ལོ་ཚོད་རྒས་སོང་བས་རེད།

ཡང་ན་ཁྱོད་རང་ལོ་ཚོད་ཧ་ཅང་ཆུང་སོང་བས་རེད།

ས་རུབ་རྗེས།

ཁྱོད་རང་དྲན་པའི་ར་སྐོར་དུ་ཚུད་ནས།

ཆང་ཕོར་བ་གང་གིས་ནང་སེམས་གསོ་བཞིན་ཡོད་དམ།

དེ་ལྟར་མ་ཡིན་ན།

ཁྱོད་རང་ཐག་རིང་ནས་ཁེར་རྐྱང་ངང་བཏེགས་ཏེ།

ཟླ་འོད་ཁོ་ན་ལ་སེམས་པ་བརླན་དོན་ག་རེ་ཡིན།


  • ལེ་ཚན་སྔོན་མ།:ཚེ་ཕྱེད།
  • ལེ་ཚན་རྗེས་མ།:ཁྱོད་ཀྱི་ཡོད་ཚད་ང་ཡི་ཡིན།