ནམ་ཞིག་བྱེས་སུ་འཕུར་བའི་ཁྲུང་ཁྲུང་གཉིས།།

གཤོག་ཟུང་ཐོར་ཏེ་སོ་སོའི་འཕུར་ལམ་དེད།།

སེམས་གཅོང་དག་ནི་དགོང་ཀའི་ཉི་ནུབ་བཞིན།།

ཕྱིར་མིག་དག་ཀྱང་གཤོག་རྩའི་ཞེན་ཆགས་བཞིན།།

ལས་ཀྱི་བུ་ལོན་ངེས་མེད་རླུང་བུ་ཡིས།།

གཉོམ་ཆུང་སེམས་པ་འདི་ཉིད་ཕྱེད་དུ་གཏོང་།།

བློས་ཐུབ་ཁྱེད་ཉིད་རྒྱང་རིང་ཞེས་བྱ་བའི།།

རང་གི་སེམས་ཀྱི་གནས་དེར་སླེབས་པ་ན།།

འདུ་བྲལ་འདབ་ལོ་གྲངས་མེད་འཐོར་ཤུལ་གྱི།།

མཚོ་ཆུང་ཟླ་བ་འདྲ་བའི་མཚོ་མཐའ་རུ།།

འདས་སོང་ཕྱིར་དྲན་མཐའ་དག་མཚོན་བྱེད་ཀྱི།།

གཉོམ་ཆུང་ཕྱིར་མིག་ཙམ་ཞིག་འཇོག་པར་ཞུ།།

མཚོ་མཐའ་རླུང་བུས་བསྐོར་ཀྱང་མ་བསྐོར་ཀྱང་།།

སེམས་ཀྱི་མེ་ལོང་ཉིད་ནི་སྟོང་བར་ལུས།།

དམ་ཚིག་མཚོ་ཆུང་རླུང་གིས་མ་དཀྲུགས་ཀྱང་།།

འདུ་བྲལ་ཉི་ཟླ་འཁོར་བའི་ལས་སྐལ་གྱིས།།

ཉི་ནུབ་མཚམས་སྤྲིན་དག་ཀྱང་ལྐོག་ཏུ་ངུ་།།

ཉམ་ཆུང་སེམས་པ་འདི་གཉིས་ཅི་ཁག་ཨང་།

དམ་ཚིག་གཡུ་ཡི་མཚོ་ཆུང་སྔར་བཞིན་འཁྱིལ།།

སྨྲེང་བའི་ཆུ་རིས་འགའ་ཡང་ཡོད་སྙམ་ཤར།།

འདུ་བྲལ་སྐྱོ་བ་ཁུར་བའི་ངང་ཆུང་གཉིས།།

ལས་ཀྱི་ནམ་མཁའ་ཟད་པའི་སྲིད་པ་ནས།།

སོ་སོའི་ལས་མཐའ་དཀར་བའི་སྨོན་ལམ་ཙམ།།

ངག་མི་ཁྲོལ་ཡང་སེམས་སུ་ཡང་ཡང་བཟླས།།