རླུང་བུ་ནག་པོ་ལ་ཁའི་ཡུལ་ནས་འཚུབ།།

སྤྲིན་གྱི་མེ་ཏོག་ལ་ཁའི་མི་ཡིས་བཏོགས།།

སེམས་ཀྱི་རྟ་ཕོ་སྒང་ཁའི་རི་ལ་བརྟད།།

རྨུ་ཐག་ལུང་པ་སེམས་ཀྱི་སྒྲུང་གཏམ་པ།།

བགྲེས་པོ་ཚེ་རིང་མ་གཏོགས་སུ་ཨེ་ཡོད།།

མག་མོག་རྒོངས་ཀའི་ཡུལ་གྱི་སྙན་ངག་པ།།

སེམས་ཀྱི་རླུང་བུ་བཞོན་པའི་སྙན་ངག་པ།།

མུ་ཏིག་ལུས་སུ་བརྒྱན་པའི་ཡར་ཀླུང་ལ།།

སྒྱུ་འཕྲུལ་རི་མོའི་གཏོར་བའི་ཡི་གེའི་ཚོགས།།

མདུད་སྣེ་སེམས་ཀྱིས་མ་ལྷོད་སྙན་ངག་པ།།

སྒོ་ཁའི་མེ་ཏོག་འདབ་མ་མགོ་ལྕོག་ལྡེམ།།

ཡར་སྟེང་སེམས་པའི་ངོ་བོ་དལ་གྱིས་ལྡེམ།།

ལྡེམ་ལྡེམ་ངག་གི་མཛེས་དཔལ་ཁྱོད་ལ་ཕུལ།།

ཆོ་འཕྲུལ་ཟླ་བ་རྒྱས་པའི་གནས་སུ་འཇུག།

སྣང་བའི་ཕོ་བྲང་ཞེས་བྱ་མཐོང་ཚུལ་ལབ།།

རྟོག་སྒྲུང་ལས་སུ་ཞུགས་པའི་བར་སྐོར་ལམ།།

རྟ་ཕོ་ལོང་བ་ཞིག་གི་བརྟད་ཐག་འདི།།

འདི་ནས་མཐོང་བའི་ལྷ་སའི་རྟ་ཕོ་ཞིག།

དྲན་པའི་ནང་དུ་རི་མོ་དགུ་རུ་སྒྲིལ།།

བདག་གི་གཡུ་རྐྱང་ཟེར་བའི་རྟ་ཕོ་དྲན།།

ཚོར་བ་མི་གཡོ་ལས་ཀྱི་ཆུ་བོའི་འགྲམ།།

དལ་གྱིས་རྒྱུ་བའི་ཡིད་ཀྱི་སྒོ་སྲུང་ཞིག།

འཕྲུལ་བའི་ངག་ཅིག་ཁྱོད་ལ་བསྐུར་བ་དང་།།

གཞས་པ་ཡིན་ནམ་ང་ལ་མ་འདྲི་རོགས།།

ཁྱོད་ལ་བསྐུར་བའི་སེམས་ཀྱི་གཞས་ཤིག་འདུག།

དལ་དལ་ཞིག་ཏུ་ཚོར་བའི་མེ་སྒང་རྒྱག།

ཐ་སྙད་ཅིག་ཏུ་ཚིག་གི་གཏམ་རྒྱུད་བྲིས།།

གྲུ་གཟིངས་དེ་རུ་གཞས་པའི་དབྱངས་ཤིག་སྟེ།།

རྒྱུད་སྐུད་དྲུག་པའི་མེ་ཏོག་ཚལ་ཞེས་དང་།།

སྒྱུ་འཕྲུལ་འཐོར་བའི་གཞིས་ཀ་དེ་འང་ཡིན།།