༡

འདི་ཕྱིའི་མེ་ཏོག་རྙིད་པའི།།

བར་དོ་མེ་འོབས་སྒྲ་མེད།།

སྨན་གྱི་རོ་རེག་ལྟ་བུའི།།

སྨན་སྡུག་ཅི་ལ་ཡོད་དམ།།

ད་སྡུག་ད་སྐྱིད་མི་ཚེ།།

མེ་ཚག་ས་ལ་ལྷུང་འདྲ།།

ཨ་གར་ལྗོན་པ་ལྟ་བུའི།།

མི་དེ་ལྷ་ཡི་ལྷ་རེད།།

མཚོ་ཆེན་མཚོ་ཆུང་ངང་བ།།

ཞེ་འཁྲིལ་རྨི་ལམ་དམར་བོ།།

མདང་གསུམ་གོད་ཆག་ཐ་ཟད།།

ཁྱེད་ཞལ་སྐལ་བཟང་མེ་ཏོག།

མྱུར་ཞལ་མཇལ་བའི་སྐལ་བཟང་།།

བདག་ལ་སྩོལ་ཅིག་སྡུག་གུ།།

སྙིང་གི་སྡུག་གུ་མེ་ཏོག།

དཀར་དམར་མདངས་ལྡན་ཨུག་ཆོས།

ཨུག་ཆོས་ལྷ་ཡི་མེ་ཏོག།

སྤྱང་མོའི་ནུ་མའི་མཚན་འཛིན།།

མེ་ཏོག་མེ་ལོང་ནང་གི།

བརྩེ་བ་མཚོན་པའི་བརྡ་ཡིག།

བརྡ་ཡིག་གང་ལ་བྲིས་ཀྱང་།།

བརྩེ་བའི་ཐབ་རྡོ་སུམ་ཚུགས།།

ཉེས་པའི་ཁ་སྒོ་མེད་ཅིང་།།

སེམས་པས་སྲུང་དུ་མེད་ལ།།

རྣམ་དག་གོས་ཀྱི་རི་མོར།།

བྲིས་ཀྱང་ནོག་པ་དཀའ་འོ།།

༢

འཁོར་བའི་ནང་རོལ་དག་ཏུ།།

སེམས་པ་མེ་ལ་ཤོར་སོང་།།

ང་ཡི་སེམས་པའི་མེ་ཆེན།།

གསོད་ན་ཁྱེད་ཀྱི་སེམས་པ།།

གཡོ་བའི་སྒྱུ་མའི་གར་ཆུང་།།

ང་ལ་བསྒྱུར་དགོས་གལ་རེད།།

མིན་ན་མེ་ཏོག་ཨུག་ཆོས།།

ལན་འགའ་བཏོག་པའི་སྣང་བ།།

ང་ཡི་ནང་སེམས་སྦྲི་ལ།།

འོ་མའི་ཚུལ་དུ་ཕོབས་ཤིག།

ཆར་བའི་ཚུལ་དུ་བོབས་ཤིག

གཅིན་པའི་ཚུལ་དུ་ཐོངས་ཤིག

མེ་ལྕེ་རབ་ཏུ་ཚ་བའི།།

ཐབ་གའི་ནང་གི་མེ་ལྕེ།།

ཁྱེད་དང་འུ་གཉིས་བར་ལ།།

ཡང་ཡང་འབར་ཡང་ཆོག་ལ།།

ཡང་ཡང་མ་འབར་ཆོག་གོ།།

༣

ཉིན་ལ་ཁ་གྲངས་ཡོད་ལ།།

སེམས་ལ་བརྩིས་པ་ཡོད་རེད།།

གནས་དེ་དག་ཞིང་མ་རེད།།

སྡིག་སྒྲིབ་འཁུར་བའི་འཁོར་བ།།

འཁོར་བའི་ན་ཆུའི་ནང་དུ།།

དཀར་ཆ་དམར་ཆ་བྱས་ནས།།

འུ་ཅག་སོ་སྐྱེས་ཕོ་མོ།།

འགྲོ་བ་སྔོན་གྱི་ལས་རེད།།

སྔོན་གྱི་བསགས་པའི་ཚོགས་རེད།།

ཚོགས་ལ་འགྱུར་དུ་ཡོད་ཅིང་།།

བསོད་ནམས་ཟད་དུ་ཡོད་པས།།

རང་ལམ་རང་གི་མཐོང་བའི།།

ཞེན་རིག་ཡོད་མདོག་མ་སྟོན།།

རྗེས་གྲུབ་ཚད་མའི་ངོ་བོ།།

འུ་ཅག་སུ་ལ་མེད་ཅིང་།།

ཉོན་མོངས་མེ་ལྕེ་འཁུར་བའི།།

འུ་ཅག་འགྲོ་བ་རྐྱང་རེད།།

འགྲོ་བ་སྲིད་པའི་རྩེ་ནས།།

དམྱལ་བ་མནར་མེད་བར་རེད།།

ད་རེས་མི་ཚེ་འདི་ག།

འགྲུལ་བཞུད་འགྲོ་ཐེངས་གཅིག་རེད།།

འདི་ནི་ངེས་འབྱུང་མིན་ལ།།

སེམས་ཀྱི་འཆར་ཚུལ་དེའོ།།

༤

གེ་སར་འབྲུག་མོ་གཉིས་ལ།།

བརྩེ་བའི་མེ་ཏོག་ཡོད་དམ།།

ཟླ་བཟང་སྒྲོལ་མའི་ཞལ་ལ།།

དུང་གི་ཟླ་བ་ཤར་འདུག།

ཡེ་ཤེས་ལྷ་མོ་དང་ནི།།

དོན་གྲུབ་རྒྱལ་ལོ་སོགས་ཀྱང་།།

དེ་མཚུངས་བསྐལ་བའི་བར་དུ།།

བརྩེ་གླུ་དགུ་སིང་དྲུག་འགྱུར།།

ངག་གི་རྡང་ཆར་བཀལ་ནས།།

མེས་པོའི་གླུ་སྐད་ཟེར་བཞིན།།

ངག་ལ་འགུག་མཁན་རྐྱང་རེད།།

དེ་བས་ཁ་སང་དེ་རིང་།།

བརྩེ་བའི་ཞལ་ངོ་མཐོང་ནས།།

ཞལ་ངོར་ཉི་མ་དྲོ་བའི།།

མི་ཞིག་གང་དུ་མེད་དོ།།