གུ་དོགས་པའི་མི་ཚེའི་བཤུལ་ལམ་འགྲིམས་དུས།  ཟིང་ཟིང་གི་འཁོར་བའི་ཀློང་ན་མ་ཎི་ཡིག་དྲུག་འདོན་པའི་ཕ་ཨ་ཁུ་དེ་ཚོ།  བརྗོད་མི་ཚར་བའི་གནའ་གཏམ་ཅིག་དང་བློར་མི་ཤོང་བའི་སྐྱོ་གར་ཞིག་ལ་ལས་འབྲེལ་བྱས་ཡོད་པ་དྲན།  དུས་དེང་སང་།  རྗེ་བླ་མའི་སྐུ་ལུས་དྲང་རུང་མགོ་ཞྭ་མོའི་དབུ་རྩེ་གཡོན་འདུག་ཡ－ཨ་མ་མགོན་མོ།
     ངས་དེ་རིང་ཁྱོད་ཀྱི་མདུན་ནས་པུས་མོ་སླ་ང་ས་རུ་བཙུགས་ཏེ།  ཆོས་སྐྱོང་སྲུང་མ་བཀུགས་ན་གཞུ་འདྲ་འདྲ་དང་དམར་ཆེན་གཏོར་མ་འཕངས་ན་མདའ་འདྲ་འདྲ་བྱས་ཏེ།  ཆོས་མི་ཤེས་སྡིག་པའི་རང་མཁར་བརྩེགས་ཤིང་སྒོམ་མི་ཤེས་གཏི་མུག་གུར་ལ་མི་ཕུབ་པའི་དམ་བཅའ་འཇོག
འཚོ་བའི་སྐྱ་རེངས་ཀྱི་མེ་ཏོག་འཐུ་བཞིན་མདོ་རིག་རྟ་བོའི་གོང་ཁ་དང་སྒོ་ཞིང་གྲུ་བཞིའི་རྣང་མའི་བར་ན་སྐྱོ་ཤུར་ཤུར་གྱི་གླུ་ཆུང་རེ་ལེན་པའི་སྟག་ཤར་དེ་ཚོ།  རྒས་རྒྱུ་མེད་པའི་རྨི་ལམ་ཅིག་གི་མཐའ་ན་དགའ་སྐྱོ་ཟུང་གི་མི་ཚེ་རི་མོ་འབྲི་བཞིན་པ་དྲན་ན།  དུས་དེང་སང་།  མི་ངན་གཡོ་སྒྱུ་ཅན་ལ་བློ་གཏད་ན་ཁྱི་རྒན་རྒྱ་ལི་ཞིག་གི་ངན་མཚང་རིག་གི་ཡ།－ཨ་མ་མགོན་མོ།
ངས་དེ་རིང་ཁྱོད་ཀྱི་མདུན་ནས་པུས་མོ་སླ་ང་ས་རུ་བཙུགས་ཏེ།མི་བརྒྱའི་མགོ་ནས་གཏམ་བཤད་དེ་རྟ་བརྒྱའི་གོང་ནས་ལྕགས་གཡུགས་ཤིང་།  སྔ་དཔེ་མགོ་ཡི་ཞྭ་དང་ཕྱི་དཔེ་རྐང་གི་ལྷམ་མི་བྱེད་པའི་དམ་བཅའ་འཇོག
    ཞིང་ས་གྲུ་བཞིའི་ཁ་དང་ཐང་སྨུག་སྦྲ་ཡི་མཐའ་ན་འཁྲེང་སེམས་ཀྱིས་ཕྱིར་མིག་ཡང་ཡང་བལྟ་བའི་སྨན་ཤར་དེ་ཚོས།  ལོ་རྒྱུས་བུ་མོའི་འཛུམ་མདངས་ལ་བལྟ་བའི་སྨན་ཤར་དེ་ཚོས།