ཨ་མ་ལགས།  ང་རང་འཇིག་རྟེན་མི་ཡུལ་འདིར་ཁྱེད་ཀྱི་པང་ནས་ལྟེ་ཁྲག་འཕོས་ཏེ་ད་བར་དུས་ཀྱི་བགྲང་བྱ་ཉེར་བདུན་ལྷག་འདས་ཟིན།  ལོ་ཟླའི་འགྲོས་ནི་ཆུ་མོའི་རྒྱུན་བཞིན་བར་མེད་དུ་ཤབ་ཤུབ་ངང་ང་ཚོའི་ཉེ་འགྲམ་ནས་བགྲོད་དུས་ཨ་མའི་མཛུམ་ཞལ་ཟླ་འོད་ཞིང་ལ་གཉེར་མའི་ཆུ་རིས་ཤིག་ཤིག་དང་སྣག་སྣུམ་དབུ་སྐྲའི་ལན་བུར་ཁ་བའི་འདབ་མས་གཡོས་ནས་སྐྱ་ཕྱེད་སྔོ་ཕྱེད་དུ་འགྱུར་ཟིན་དུས་ང་ལ་ཐོབ་པ་ནི་སེམས་གཅོང་དང་སྨྲེང་བ་ལས་གང་ཡང་མ་མཆིས།
ཆུང་སྦར་མོ་གང་ནས་ད་བར་ཨ་མའི་བྱམས་སྐྱོང་དང་ཐུགས་བརྩེའི་དོ་འཁུར་འོག་གཅིན་སྐྱག་ལག་པས་འཕྱིད།  ཁ་ལུད་སྣ་ལུད་ལྕེ་ཡི་ལྡག    ཟ་མ་ཡག་ཡག་ཟ་མི་ནུས་བུ་ལ་བཞག    གྱོ ན་རྒྱུ་ཡག་ཡག་བུ་ལ་གཡོགས།  མདོར་ན།  རང་གི་བུ་ཕྲུག་གི་དོན་དུ་སེམས་ཁྲལ་ཚད་མེད་གནང་ཞིང་དགོང་འཕྱི་ཉལ་དང་ཞོགས་སྔ་ལངས་ཀྱི་ཁྱིམ་ལས་ཡོངས་སུ་བསྒྲུབས།  ཉིན་མོ་ཚ་གྲང་དང་ངལ་བ་ལ་མི་འཛེམ་པར་ཕྱི་རོལ་ཡུལ་དུ་ངལ་རྩོལ་ལས་ལ་གཞོལ།  ཨ་མ་ལགས།  ཁྱེད་ཀྱིས་བུ་ཕྲུག་ལ་བཅངས་པའི་དུང་ཞེན་ནི་སྐད་ཆ་ཚིག་ཅིག་གིས་བརྗོད་པར་དཀའ་ལ།  རྔུལ་ཁྲག་ལས་བརྗེས་པའི་དངུལ་སྒོར་ཡང་སེར་སྣ་མེད་པར་ཕྲུག་གི་ཆེད་དུ་གཏོང་གནང་མཛད།
            ཨ་མ་ལགས།  ད་ཆ་བུ་ཆུང་ང་རང་ཐག་རིང་མི་ཡུལ་དུ་སློབ་གསོའི་བྱ་བཞག་ཐོག་ལས་ཀ་བྱེད་བཞིན་ཡོད་པས་ཁྱེད་ཀྱི་སྐུ་མདུན་དུ་བསྙེན་བཀུར་ཞབས་ཏོག་སྒྲུབ་རྒྱུའི་གོ་སྐབས་ཤིན་ཏུ་དཀོན།  སེམས་ཉིད་དགུང་གཞུང་ཐང་དཀྱིལ་དུ་ལུས་པ་བཞིན་བཟོད་བསྲན་མི་ཐུབ་པའི་གྲང་རེག་གིས་ལུས་པོ་འདར་བ་དང་ཐུག་འཕྲད་དཀོན་པས་མཇལ་འདོད་བློ་ཡིས་སེམས་གཅོང་མིག་ཆུའི་ཐིགས་ཕྲེང་སེམས་ཁོང་རྒྱ་མཚོར་བཞུར།
ཨ་མ་ལགས།  ངས་སེམས་ཁོང་ནས་ཁྱེད་རང་དྲན་པའི་བརྗོད་བྱ་ནག་ནོག་ཡི་གེའི་གཟུགས་སུ་བཀོད་ནས་ཐལ་མོ་སྙིང་ཁར་སྦྱར་བཞིན་ཡིག་དྲུག་དབྱངས་སུ་གྱེར་ཏེ་བསྐྱབ་གནས་བླ་མར་བཅོལ་ནས་བདག་གི་བརྩེ་བའི་དྲིན་ཅན་ཨ་མར་ནད་མེད་ཚེ་རིང་ཡོང་ཞིང་།  སྐུ་འཚོ་བདེ་བར་གནས་པའི་བཀྲ་ཤིས་སྨོན་ལམ་སྙིང་ནས་ཞུ།