ང་རང་མལ་ལས་ལངས་དུས་འོད་སྣང་འཚེར་བཞིན་པའི་སྐར་ཕྲན་ཐར་ཐོར་འགའ་ད་དུང་མཁའ་དབྱིངས་སུ་སིག་སིག་ངང་གྲང་འདར་རྒྱག་པ་དང་འདྲ་ལ།སྦྲ་འདབསཀྱི་ནོར་ནག་ཚོགས་ཀྱིས་ད་དུང་སྐྱུག་ལྡད་བྱེད་བཞིན་ཉལ་འདུགསྐབས་དེར་གྱེས་བྲལ་གྱི་གདུང་བ་དྲག་པོ་ཞིག་སྐྱེས་པ་ནི་ངའི་ཁ་དོག་སྣ་ལྔ་བཀྲ་བའི་དབྱར་གནང་གི་འཚོ་བ་མཇུག་རྫོགས་པ་དེ་རེད།རྟ་བདུད་དབང་པོའི་འཛུམ་ཟེར་སྦྲ་འདབས་སུ་དལ་གྱིས་འཕྲོས་མ་ཐག་ཕ་ལགས་ཀྱིས་བསང་ཆེན་སྤྲིན་དཀར་འཐིབས་འདྲ་ཞིག་ཕུད་རྗེས།བྱིའུ་ཚོགས་མཁའ་རུ་འཕུར་བ་ལྟ་བུའི་རླུང་རྟ་བར་མེད་དུ་གཏོར་བཞིན་ཀི་བསྭོའི་ལྷ་རྒྱལ་ལོ་དང་བཅས་ཏེ་ང་རང་ལྷ་ཀླུ་གཉན་གསུམ་ལ་སྐྱབས་བཅོལ་ཞུས།ངས་མ་ལགས་ཀྱིས་སྔ་མོ་ནས་གྲ་སྒྲིག་བྱས་ཡོད་པའི་འོ་བཅུད་ཀྱི་ཞོགས་ཟས་ཞིམ་མངར་ཅན་དེ་ཟོས་རྗེས།ཕ་མ་དང་གཉེན་ཉེ་རྣམས་ཀྱི་རེ་བ་ཁྲི་ཕྲག་ཁུར་ཏེ་ཕ་ལགས་དང་མཉམ་དུ་ལྗིད་ཏིག་ཏིག་གི་གོམ་ཁ་རི་ལམ་གྱ་གྱུའི་སྟེང་དུ་བསྒྱུར།གྱེས་གདུང་གི་ཚོར་སྣང་ནི་དགུན་ལྗོངས་ཀྱི་ཁ་བ་བཞིན་འཁྱག་སིབ་སིབ་ཏུ་ངའི་སེམས་སྟེང་དུ་བབས་བྱུང་།དལ་ཅག་གེར་ལྷིང་འཇགས་ཀྱི་རི་ལམ་དེད་ནས་མདུན་དུ་ཆས་ནའང་ངའི་དྲན་འཛིན་གྱི་སྣང་ངོར་འདུ་འཛིས་ཁེངས་པའི་ཕ་ཡུལ་གྱི་རྣམ་པ་དེ་ཡང་དང་ཡང་དུ་འཁོར་ཡོང་།
     རི་འདབས་ལ་བསླེབས་རྗེས་ཐོག་མར་ངའི་མིག་ལམ་དུ་སྣང་འོང་བ་ནི་གོས་ལྗང་ཡུག་གཅིག་ཐང་ལ་བཏིངས་འདྲའི་སྤང་ཐང་ཆེན་མོ་དེ་རེད།རྟ་ནོར་ལུག་གསུམ་དང་རི་སྐྱེས་སྲོག་ཆགས་རྣམས་ཕ་གཞིས་གཡང་ས་འདི་རུ་བག་ཕེབས་ངང་བཅུད་ལྡན་གྱི་རྩྭ་ཆུར་རོལ་ཅིང་།རྒྱང་རིང་ནས་བྱ་དང་བྱིའུ་རྣམས་ཀྱིས་སྙན་འཇེབས་ཀྱི་གསུང་སྐད་སྒྲོག་གིན་འདུགཡན་ལག་བརྒྱད་ལྡན་གྱི་རྫ་ཆུ་བསིལ་མས་ཤང་ཤང་གི་གླུ་སྒྲ་སྒྲོག་བཞིན་རྒྱང་རིང་བྱང་ཕྱོགས་སུ་བཞུར་བ་རེད།ཕ་ལགས་དང་ངེད་གཉིས་ཀྱིས་རྒྱབ་ཀྱི་ཁུར་པོ་ས་ལ་ཕོག་ཅིང་།དྭངས་ཤིང་གཙང་བའི་རྫ་ཆུའི་འགྲམ་དུ་ཁ་ལག་གཙང་མ་བཀྲུས་རྗེས།རྫ་ཆུ་བསིལ་མ་ཧུབ་འགའ་འཐུངས་པ་ན་ལུས་ངལ་བ་དང་སྐོམ་གདུང་ཐམས་ཅད་སེལ་ནས་སྨྲ་མི་ཤེས་པའི་ཚོར་སྣང་སྐྱིད་པོ་ཞིག་སྐྱེས་འོངས།བསིལ་ཞིང་འཇམ་པའི་དྲི་བཞོན་བུ་མོས་མེ་ཏོག་གི་བསུང་ངད་ཁྱེར་ནས་ངའི་གདོང་ལ་བྱིལ་བྱིལ་བྱས་པས།ང་ལ་སྔར་ལས་ལྷག་པའི་ཚོར་བ་སྐྱིད་པོ་ཞིག་བྱིན།ང་རང་བདེ་ཞིང་སྐྱིད་པའི་ཞིང་ཁམས་འདི་དང་བྲལ་ན་མི་འདོད་པར་མ་ཟད།ཕ་མའི་བྱམས་བརྩེ་ཡིས་ཁེངས་པའི་ཁྱིམ་གཞིས་དང་དེ་བས་ཀྱང་བྲལ་ན་མི་འདོད་པའི་ཚོར་སྣང་དྲག་པོ་ཞིག་རྒྱུད་ལ་ངང་ངམ་ཤུགས་ཀྱིས་སྐྱེས་བྱུང་།
     དེ་ནས་ཕ་ལགས་དང་ངེད་གཉིས་སྤང་ཐང་གི་རྐང་ལམ་ཕྲ་མོ་དེད་ནས་རྫ་ཆུ་བསིལ་མའི་བཞུར་སྒྲ་དང་ལྷན་དུ་མདུན་ཕྱོགས་སུ་གོམ་ཁ་བསྒྱུར་བ་ཡིན།སྔོན་ཆད་ངེད་ཕུ་ནུ་དང་ཁྱིམ་མཚེས་ཚང་གི་རྩེད་གྲོགས་རྣམས་ཀྱིས་གནས་དེ་རུ་ཆུ་རྩེད་བྱས་པ་དང་།རྐྱང་རྒོད་གཡེར་བ་འདྲ་བའི་རྟ་ཕོར་ཞོན་ནས་རྟ་རྒྱུག་འགྲན་སྡུར་ཡང་སྤེལ་མྱོང་།དངོས་གནས་སྤྲོ་སྐྱིད་ལྡན་པའི་ལོ་ཟླ་དེ་དག་ཡིད་ཀྱི་མེ་ལོང་ངོས་སུ་གློག་བརྙན་བཞིན་དུ་ཤར་བྱུང་།ངས་རང་གི་ཕ་ཡུལ་གྱིས་ད་དུང་བདག་ལ་འདི་ལྟ་བུའི་སྤྲོ་སྐྱིད་ཀྱི་ལོ་ཟླ་ཞིག་སྟེར་ཐུབ་ན་ཅི་མ་རུང་སྙམ།
     དུས་ཚོད་རིང་པོ་ཞིག་མ་འགོར་བར་ཕ་ལགས་དང་ངེད་གཉིས་ལུང་མདོའི་ལམ་ཆེན་དུ་བསླེབས།ཅུང་ཙམ་བསྒུགས་པ་ན་རླངས་འཁོར་གྱི་དུང་སྒྲ་ཐོས་འོངས་པ་དང་ང་རང་བསམ་གཞིག་གི་ཁྲོད་ནས་དཀྲོགས་བྱུང་།ངས་ལག་པ་ཡར་བཀྱགས་པ་ན་རླངས་འཁོར་དེའང་དལ་བ་དལ་བུར་ངའི་མདུན་དུ་བསྡད།ངས་སེམས་པ་ཕ་ཡུལ་ལ་འཁྲེང་བཞིན་རླངས་འཁོར་དུ་བུད་པ་ན་རླངས་འཁོར་གྱིས་གྱེས་བརྡ་གསལ་ལྷང་ལྷང་ཞིག་བསྒྲགས་པ་དང་མཉམ་དུ་ཕ་ལགས་ཀྱི་རྒྱབ་གཟུགས་དེའང་རླངས་འཁོར་གྱི་རྗེས་ནས་རིམ་བཞིན་མི་སྣང་བར་གྱུར།ངས་རླངས་འཁོར་གྱི་དྲ་མ་ཕྱེས་པ་ན་བསིལ་འཇམ་གྱི་རླུང་བུ་ཞིག་དལ་གྱིས་ལྡང་འོངས།ཁྲི་གདུགས་ཉི་མ་ཆུ་འཛིན་གྱི་གསེབ་ནས་འཛུམ་དམུལ་ལེར་མངོན་ཞིང་རྫ་ཆུ་སྔོན་མོས་སྔར་མེད་ཀྱི་གླུ་སྒྲ་སྒྲོག་པ་ནི་བདག་ལ་སྐྱེལ་མ་བྱེད་པ་དང་ཀུན་ནས་མཚུངས།ངས་སླར་ཡང་རྒྱང་རིང་གི་ཕ་ཡུལ་ལ་ལྟ་བཞིན་དུས་དང་རྣམ་པ་ཀུན་ཏུ་སློབ་སྦྱོང་ལ་འབད་པ་བྱས་ནས་མ་འོངས་པ་ན་རང་ཉིད་ཀྱི་ཡོད་ཚད་ཕ་ཡུལ་གྱི་འཛུགས་སྐྲུན་ལ་འབུལ་སྙམ་བྱུང་།