ཐག་རིང་ཡུལ་དུ་བཞུགས་པའི། །བདག་གི་དྲིན་ཅན་ཨ་མས། །
ལག་འཁོར་མ་ཎི་བསྐོར་ནས། །བུ་ངར་བར་ཆད་མེད་པའི། །
གསོལ་བ་སྨོན་ལམ་འདེབས་བཞིན། །ཡིག་དྲུག་དབྱངས་སུ་གྱེར་ནས། །
ནད་མེད་ཚེ་རིང་ཡོང་བའི། །བཀྲ་ཤིས་སྨོན་ལམ་བསྐྱོན་གྱིས། །
དུང་དཀར་དབུ་སྐྲ་ལན་བུ། །བུ་ལ་བཅངས་པའི་དུང་ཞེན། །
གཉེར་མའི་གྲོག་ཤུར་སྟར་བསྒྲིགས། །བུ་ཆུང་དྲན་པའི་གདུང་དབྱངས། །
དྲན་སེམས་གདུང་བས་མནར་བའི། །ཐག་རིང་བུ་ཆུང་ང་ཡིས། །
དུས་ཆེན་ཤར་ཉེའི་མཚམས་འདིར། །སེམས་གཏམ་ཡི་གེར་བཀོད་ནས། །
ཨ་མའི་ཕྱོགས་ལ་བསྲིངས་ཡོད། །