འཇིག་རྟེན་མཐུན་འཇུག་དང་དེ་ལས་འདས་པའི་བརྩེ་དུང་མཐའ་དག་གི་ཐོག་མའི་ཀུན་སློང་གི་དབུ་ཁྱུད་ནི་ཁྱད་པར་གྱི་ཚོར་བ་ཞིག་གིས་བསྐྱེད་པའི་དབང་དུ་བཏང་ན་ཡང་། བརྩེ་དུང་གི་ཕྱི་ཐག་ནི་ཚོར་བ་ཁོ་ན་ཞིག་གིས་རྒྱུན་སྐྱོང་ཡུན་བརྟན་ཐུབ་པ་ཞིག་ཡེ་ནས་མ་ཡིན་པར། དེ་ནི་རྣམ་དག་གི་བརྩེ་བ་ལས་བལྟམས་པའི་གོམས་གཤིས་ཤིག་དང་། ལྷད་མེད་ཀྱི་དུང་བ་ལས་ཐོབ་པའི་ལྷག་བསམ་གྱི་འགན་འཁྲི་ཞིག་གིས་གཞུང་བསྲིངས་ཤིང་མགོ་རྔ་མཐུད་དགོས་པར་འདོད། ད་གཟོད་གཞོན་དུས་ཀྱི་སྙིང་སྡུག་དེ། རྒ་དུས་ཀྱི་ཚེ་ཡ་རུ་གྱུར་པའི་འཇིག་རྟེན་ཡིད་སྨོན་གྱི་བརྩེ་དུང་གི་གཏམ་རྒྱུད་གསོན་པོ་ཞིག་བཞེང་ཐུབ།

འཇིག་རྟེན་མི་ཞེས་པ་ནི་སྒེར་ཚུགས་རང་བཞིན་ཅན་ཞིག་ཡིན་པའི་དབང་གིས། མི་རེ་ལ་རང་ཉིད་དང་འཚམ་པའི་མཛེས་དཔྱོད་ཀྱི་ལྟ་བ་རེ་ཡོད་སྲིད་དེ། མིའི་མིག་ནང་གི་མཛེས་པ་ཀུན་མཆོག་གྱུར་ཡིན་པའི་ངེས་པ་གཞི་ནས་མེད། དེ་བས་རང་ཉིད་དང་འཚམ་ཞིང་རང་སེམས་མགུ་བ་དག་ནི་རང་ངོས་ཀྱི་མཛེས་ལེགས་མཆོག་གསུམ་ཡིན་པ་ཤ་སྟག་རེད། རང་སེམས་སོང་བའི་བུ་མོ། བུ་མོའི་ནང་གི་མཛེས་མ་ཡིན་ཟེར་བ་ཡང་དེའི་རྐྱེན་གྱིས་སོ། ། སྤྱིར་བརྩེ་དུང་ཟེར་བའི་ཐ་སྙད་རྡོག་རྡོག་འདི་འདོད་རྔམ་དང་ཆགས་སྲེད་ལས་ཁ་འབྲལ་ཐབས་མེད་པ་ཞིག་རེད། བརྩེ་དུང་གི་ཕྱི་ནང་གསང་གསུམ་ཡོད་ཚད་འདོད་རྔམ་དང་ཆགས་སྲེད་ཁོ་ན་ཡིན་པ་གཞི་མ་གྲུབ་ཀྱང་། འདོད་རྔམ་དང་ཆགས་སྲེད་མེད་པའི་བརྩེ་དུང་གསོན་པོ་ཞིག་སྲིད་པ་རྒས་པོའི་ཁ་ནས་བྱུང་བར་མ་གྱུར། བརྩེ་དུང་ཞེས་པའི་ཐ་སྙད་སྙན་པོ་འདིའི་རྒྱབ་རོལ་ན། འདོད་རྔམ་དང་ཆགས་སྲེད་དམར་རྗེན་དུ་ལུས་པའི་མཚན་མོ་བགྲང་གི་འཁུན་སྒྲ་ཡོད་སྲིད།

ང་ཚོའི་ནར་སོན་གྱི་ལོ་ཟླའི་ཁྲོད་ནས་དམར་ཆུང་སེམས་ཀྱི་རྟ་ཕོའི་ཁ་ལོ་ཡང་ཡང་ཤོར་སའི་སྨན་ཆུང་རེ་དང་། འདང་ཆེན་སྙིང་གི་སྒོ་གླེགས་ཡང་ཡང་རྡུང་བའི་སྟག་ཤར་རེ་འཕྲད་པ་ནི་བརྒལ་ཐབས་མེད་པའི་ནར་སོན་གྱི་བརྒྱུད་རིམ་ཞིག་དང་འཇིག་རྟེན་པ་ཡི་ཚུལ་ལུགས་ཤིག་གོ །

ཁོ་བོ་ཡང་དེ་ལྟར་ནར་སོན་གྱི་ལོ་ཟླའི་ཁྲོད་ནས་བརྒལ་ཐབས་མེད་པའི་བརྒྱུད་རིམ་དེ་དག་མ་བགྲོས་གཅིག་མཐུན་དང་། མ་བོས་རང་སླེབས་ངང་དང་ལེན་དགོས་པར་གྱུར། མོ་ནི་ཕྲན་དང་ལོ་ཡི་འཁོར་མོ་བཅུ་བདུན་ལྷག་རིང་གི་འབྲེལ་འདྲིས་ཡོད་པའིབུ་མོ་ཁྱད་པར་བ་ཞིག་རེད། ཆུང་སློབ་ཆུང་ནས་དམའ་སློབ་འབྲིང་གི་བར་དུ་ངེད་གཉིས་དགེ་རྒན་གཅིག་གི་སློབ་མ་ཡིན་ལ། སློབ་ཁང་གཅིག་གི་སློབ་གྲོགས་ཡིན། མཐོ་འབྲིང་སྐབས་སུ་ཡང་སློབ་གྲྭ་གཅིག་གི་སློབ་གྲོགས་ཡིན། འདི་ལྟར་མ་བསྒྲིགས་རང་འགྲིག་གི་ལས་འཕྲོ་ཡི་མདུད་པ་ཞིག་གིས་ངེད་གཉིས་ཕན་ཚུན་ནར་སོན་གྱི་ལོ་ཟླའི་ཁྲོད་ནས་ཆེས་ཁྱད་པར་གྱི་མི་བུ་ཞིག་ཏུ་གྱུར། སྤྱིར་ཁོ་བོ་ནི་སློབ་གྲོགས་བུ་མོ་ཚོ་ལ་འབྲེལ་འདྲིས་དང་དོ་ཁུར་བྱེད་པར་ཆེས་མི་གོམས་མཁན་ཞིག་ཡིན་ཡང་། མོ་ནི་ནམ་ཡང་ཁོ་བོའི་ཁྲ་ཆུང་མིག་གི་ལྟ་ས། དམར་ཆུང་སེམས་ཀྱི་དྲན་ས་གཅིག་པུ་དེ་ཡིན། མོ་དང་མཉམ་དུ་ཆེས་ཐོག་མའི་བརྩེ་དུང་གི་དབུ་ཁྱུད་བྲིས་པ་ནས་བཟུང་། མོ་ནི་ནམ་ཡང་དྲན་པའི་དཀྱིལ་ན་ཉར་བའི་ཆུང་འདྲིས་སྙིང་གི་ནོར་བུ་གཅིག་པུ་ལགས།

ཆེས་ཐོག་མའི་ཁྱད་པར་གྱི་ཚོར་བ་སྟེར་མཁན་གྱི་མི་བུ་དེ་ཡོད་པ་རང་གི་གོམས་གཤིས་སུ་ཆགས་བརྗེས། ད་གཟོད་བརྩེ་དུང་ནི་འདོད་རྔམ་དང་ཆགས་སྲེད་ཁོ་ནས་གྲུབ་པ་ཞིག་མ་ཡིན་པ་གཞི་ནས་རྟོགས་ཐུབ། ཆེས་དུང་མ་ལྷད་མེད་དང་དགའ་བ་དྭངས་མ་ཡིས་གཅེས་མྱོང་བའི་མི་བུ་དེར་ནམ་ཡང་བརྩི་བཀུར་དག་མ་དང་གཅེས་སྐྱོང་རྣལ་མ་ཞིག་གིས་བསྲིང་ངེས། བརྩེ་བ་ནི་སེམས་དང་སེམས་པ་གོམས་འདྲིས་གཏོང་བའི་ཁྱད་པར་གྱི་གོམས་གཤིས་ཤིག་དང་། ཡིད་ཆེས་དང་ཡིད་ཆེས་ལ་གོ་སྐབས་བསྩལ་བའི་ཟོལ་མེད་བློ་དཀར་གྱི་འགན་འཁྲི་ལ་འབྲེལ་བ་ཟབ་མོ་ཡོད་པ་རྟོགས་ཐུབ།

མོ་དང་འབྲེལ་འདྲིས་བྱེད་པའི་བརྒྱུད་རིམ་དེ་ནི་དགའ་སྤྲོ་དང་འཚབ་འཚུབ། བདེ་སྐྱིད་དང་མཚར་སྣང་སྟོང་གིས་ཕྱུག་པའི་སྨྲ་བསམ་བརྗོད་འདས་ཀྱི་བརྒྱུད་རིམ་ཞིག་རེད། ང་ཚོའི་མི་ཚེའི་གྱེས་བྲལ་གྱི་བར་ཐག་ཁྲོད་ནས་མི་བུ་མང་པོ་ཞིག་དང་འབྲེལ་འདྲིས། ངོ་ཤེས་སུ་གྱུར་དང་འགྱུར་བཞིན་པ་ཡིན་མོད། ཁྱད་པར་གྱི་དགའ་བདེའི་ཚོར་བ་དེ་དབྱར་དགུན་འགྱུར་མེད་ལྷ་ཤིང་ཤུག་པ་བཞིན་སྟེར་མཁན་གྱི་མི་ནི་སྐྱེས་ཕོ་སར་ནང་གི་གེ་སར། སྨན་བུ་མོའི་ཁྲོད་ཀྱི་འབྲུག་མོ་ལྟ་བུ་ཞིག་ལས་དཀོན་པའི་རྒྱུ་རུ་གྱུར་ཡོད། མོ་དང་གཤིབ་པ་ནས་བཟུང་། ཤ་ཁྲག་རུས་གསུམ་གྱི་བར་མཚམས་ལས་བརྒལ་བའི་མི་བུ་ཞིག་ལ་འདི་ལྟ་བུའི་ལྷད་མེད་ཀྱི་བརྩེ་བའི་འབྲུ་འོས་བསྙལ་བའི་འདང་ཆེན་གྱི་ཞོ་ཞིག་ཆགས་རྒྱུ་ཡོད་པའང་གཞི་ནས་ཤེས་བྱུང་།

མོ་ནི་བློ་རིག་གྲུང་པོ་ཅན་ཞིག་མ་ཡིན་ཡང་། བརྩོན་འགྲུས་དང་སྡུག་རུས་ཐུབ་པའི་བུ་མོ་མགོ་རྣ་ཅན་ཞིག་རེད། ཁོ་མོ་ནི་སྟོབས་ཆེན་འཇོན་པོ་ཅན་ཞིག་མ་ཡིན་ཡང་། གཞུང་དྲང་དང་ལ་རྒྱ་སྲོག་བཞིན་འཛིན་པའི་དྲང་ལྡན་མ་ཞིག་རེད། མོ་ནི་གཞན་པའི་མིག་ནང་གི་མཛེས་མ་དེ་མ་ཡིན་ཡང་། ཁོ་བོའི་སེམས་དམར་པོའི་ནང་གི་འདང་ཆེན་མ་དེ་ཡིན་ཤ་སྟག་རེད། མོ་དང་འདྲིས་ཤིང་གོམས་པའི་ལོ་ཟླའི་ཁྲོད། ད་གཟོད་དྲན་གདུང་ཟེར་བའི་བཟི་ཁ་རྒོད་པའི་ནས་ཆང་དེའི་ཁ་བསྐྱུར་ལྡན་པའི་བྲོ་བ་ཡང་ཡང་མྱོང་དགོས་བྱུང་། འདང་ཆེན་གྱི་མཚོ་མོ་སྐོམ་མི་འགྱུར་ན། དྲན་གདུང་གི་ཉ་མོའི་འཁྱུག་རྩལ་རྫོགས་མཐའ་བྲལ། ཐུག་བཞིན་ལ་ལྷག་ཏུ་ཐུག་དྲན་པ་ཞིག་དང་། འཆད་བཞིན་ལ་ལྷག་ཏུ་འཆད་འདོད་པ། ཐུག་མ་ཐུབ་པ་དང་བརྗོད་མ་ནུས་པའི་སེར་སྣ་དང་སེམས་ཁྲལ་ཞིག་གིས་འགྱོད་པ་བསྐྱེས་སུ་བཅུག་ནུས། མོའི་ཞི་འཇམ་གྱི་གཤིས་ཀས་ཁོ་བོའི་སེམས་ཀྱི་རྟ་རྒོད་གཡུང་དུ་བཏང་མྱོང་ལ། མོའི་ཡིད་འོང་གི་འཛུམ་དཀར་དང་འཛུམ་ཀོང་ནི་རྒུན་ཆང་དམར་པོ་ཇི་བཞིན། ཁོ་བོ་ཡང་ནས་ཡང་དུ་བཟི་རུ་བཅུག་མྱོང་། མོ་དང་ཉེ་རུ་གཅར་ཐེངས་རེ་ལ། སེམས་ལ་བརྗོད་མི་ཐུབ་པའི་བདེ་ཚོར་དང་ལྷིང་འཇགས་ཀྱི་སེམས་ཚོར་ཟབ་མོ་ཞིག་དབང་ལྔ་སྣོད་དྲུག་ཏུ་ཁྱབ་ནས་བྲིད་འགྲོ། རང་ཁྱིམ་ཞེས་པའི་ཐ་སྙད་དྲོན་མོ་འདིའི་ཕར་བརྒྱབ་ན་ད་དུང་རང་གཤིས་གཉུག་མ་དང་། བཅོས་མིན་གྱི་ངོ་གདོང་རྣལ་མ་དེ་སྟོན་ཆོག་པའི་མི་བུ་གཞན་ཞིག་ཡོད་པ་ཚོར། དེའི་མིང་ལ་ཆུང་འདྲིས་ཟེར་ལ། དེའི་མིང་ལ་སྙིང་སྡུག་ཟེར། མོ་ནམ་ཡང་སུས་ཀྱང་ཚབ་པར་མི་ནུས་པའི་ཆུང་འདྲིས་ཡིན། ནམ་ཡང་སུས་ཀྱང་འགྲན་པར་མི་ནུས་པའི་སྙིང་སྡུག་ཡིན། གཅེས་ནོར་ནི་ནམ་ཡང་ཉུང་ཤས་ཤིག་ལ་མ་གཏོགས། མང་ཤོས་ཤིག་ལ་ཡེ་ནས་འགྲེལ་མི་ཐུབ་པ་ལྟར། ཆུང་འདྲིས་ཀྱང་དེ་བཞིན་ནོ། །

འབྱུང་འགྱུར་གྱི་ལས་དབང་གང་ལ་ཕྱོགས་ན་ཡང་། ཁྱོད་ནི་ནམ་ཡང་ཁོ་བོའི་དམར་ཆུང་སྙིང་གི་བྱུ་རུ་རྡོག་པོ་དེ་ཡིན། དཀའ་སྡུག་གི་ལོ་ཟླ་ཇི་ལྟར་བཙན་ན་ཡང་། ཁྱོད་ནི་ནམ་ཡང་ཁོ་བོའི་མིག་ཁྲ་ཁྲའི་ནང་གི་གཟུགས་ཅན། སེམས་དམར་པོའི་ནང་གི་འདང་ཆེན་དེ་ཡིན། ལས་དབང་གི་གོ་གླགས་ཉམས་མ་གྱུར་ན། རྣམ་དག་གི་བརྩེ་བ་ལས་བལྟམས་པའི་གོམས་གཤིས་དང་། ལྷད་མེད་ཀྱི་དུང་བ་ལས་ཐོབ་པའི་ལྷག་བསམ་གྱི་འགན་འཁྲི་ཡིས་གཞུང་བསྲིངས་ཤིང་། དུང་མ་ལྷད་མེད་དང་དགའ་བ་དྭངས་མ། བརྩི་བཀུར་དག་མ་དང་གཅེས་སྐྱོང་རྣལ་མ་ཞིག་གི་བརྒྱུད་ནས་གཏན་གྱི་འདུན་མ་བཅོལ་ཆོག་པར་སྨོན།

༼ ངག་དབང་བཀྲ་ཤིས། ༽