2024-04-10
ཞལ་མཛེས་པ་ཟླ་བའི་གཟི་མདངས་ལ། །
སྤྱན་ཟུར་མིག་འཁྲིལ་བག་རབ་ཏུ་སྒེག །
འཛུམ་མཆུ་སྒྲོས་པད་མའི་ཟེའུ་འབྲུ་ཡི། །
ལྷ་ཆོས་སྐྱོང་སྲུང་མའི་ཡིད་དབང་འཕྲོག །
སྐུ་མཚར་སྡུག་གཞོན་ནུའི་ལང་ཚོ་ཅན། །
སྙིང་ཆུ་སྐྱེས་བཞད་པའི་དཀྱིལ་དུ་བྱོན། །
ཡིད་རྨོངས་པའི་མ་རིག་རྩ་བར་བཅད། །
མ་དབྱངས་ཅན་དངོས་གྲུབ་བདག་ལ་སྩོལ། །
གསུང་སྙན་འཇེབས་སྒྲ་དབྱངས་ཐོལ་གྱིས་བརྡོལ། །
འོག་ལྷ་ཀླུ་རྣམ་ཤེས་ཚོར་བས་བཟི། །
ངག་མ་བཅོས་རང་བྱུང་གསུང་དབྱངས་སྙན། །
ལྷ་མཚོ་བྱུང་མགྲིན་དབྱངས་བདག་ལ་སྩོལ། །
ཐུགས་རབ་འབྱམས་ཤེས་བྱ་ཇི་ལྟར་གཟིགས། །
བྱམས་སྙིང་རྗེའི་འོད་དཀར་ཐུགས་ལ་མངའ། །
ཕྱག་པི་ཝང་རིན་ཆེན་རྒྱུད་མངས་ཀྱིས། །
ཚིག་སྙན་མོའི་ངག་རིག་མདངས་སུ་ལུད། །
༼ དྷཱ་ཏྲཱི། ༽
རྩོམ་གསར། 10