ངའི་ཨ་མ་ནི་མེ་ཏོག་ཅིག་ཡིན། མེ་ཏོག་ཡོད་ཚད་ཀྱི་ནང་ནས་ཆེས་མཛེས་ཤོས་དེ་ཡིན་ལ། ཆེས་དྭངས་གཙང་དང་། ཆེས་ལྷད་མེད་པ་དེ་ཡིན། རེད་ལགས། ངའི་ཨ་མའི་མིང་ལ་པད་མ་ཟེར། མེ་ཏོག་པད་མ་དང་མིང་དོན་མཚུངས་པའི་བུད་མེད་དེ་ནི་ངའི་ཨ་མ་ཡིན། དེ་ལས་ཀྱང་མངོན་པར་གྲུབ་པ་ནི་ངའི་སྙིང་ཉེ་ལ་དྲིན་ཆེ་བའི་ཨ་མ་ཡིན། འདམ་ནས་སྐྱེས་ཀྱང་འདམ་གྱི་དྲི་མས་མ་གོས་པའི་མེ་ཏོག་ནི་པད་མའོ། ། ངའི་ཨ་མ་ནི་ཨོང་བ་དང་འདམ་གྱི་ཁྲོད་ནས་འཚར་ལོངས་བྱུང་བའི་དྭངས་གཙང་གི་འབྲོག་མོ་ཞིག་ཡིན།ངའི་ཨ་མ་ནི་འོ་ཟོམ་ལག་ཏུ་བཟུང་ནས་འབྲི་མོ་གཡུ་ཆུང་མ་དང་མཉམ་དུ་གཤིབ་ནས་ལང་ཚོ་དར་བའི་རྩྭ་ཐང་གི་འབྲོག་མོ་ཞིག་ཡིན། ངའི་ཨ་མ་ནི་མེས་པོ་རྣམས་དང་འདྲ་བར་དབྱར་དགུན་སྟོན་དཔྱིད་གང་དུའང་སྦྲ་ནག་སྨུག་པོའི་ནང་འཚོ་བའི་མཐོ་སྒང་གི་འབྲོག་མོ་ཞིག་ཡིན།དེ་ཡང་མཐར་གཏུགས་ན། ངའི་ཨ་མ་ནི་འཛམ་གླིང་གི་སྐྱེས་མ་ཀུན་དང་འདྲ་བར། ནམ་ཡང་བུ་ཕྲུག་གི་ཆེད་དུ་སྐུ་ལས་བསྐྱོན་མཁན་གྱི་དྲིན་ཆེན་དེ་དག་གི་གྲས་གཅིག་གོ །

ཨ་མ་ལགས། ངར་ད་བར་དུ་ཁྱེད་ལ་རྒྱུས་མངའ་དཔྱིས་ཕྱིན་པ་ཞིག་མེད་པ་འདྲ། གང་ཡིན་ཟེར་ན། ངས་ཁྱེད་ལ་འཕྲད་པའི་དཀའ་ཚེགས་ཆེ་ཤོས་ཀྱི་ལོ་ཟླ་དེ་དག་མི་གཞན་ཞིག་བརྒྱུད་ནས་ཤེས་དགོས་པས་ཡིན། དེས་མ་ཟད་མི་དེའང་ངེད་ཚོ་དང་འབྲེལ་བ་ཟབ་པོ་དེ་ཙམ་མེད་པ་ཞིག་ཡིན་པས་སོ།། དེ་སྔ་ངའི་བསམ་པར་ཨ་མ་ཁྱེད་ཀྱང་ང་དང་འདྲ་བར་ཆུང་སྦར་མོ་གང་ནས་ཕ་མ་གཉིས་ཀྱི་བྱམས་སྐྱོང་འོག་སེམས་ཁྲལ་ཅི་ཡང་མེད་པར་འཚར་ལོངས་བྱུང་བ་རེད་བསམས། འོན་ཀྱང་། ངས་མི་གཞན་དང་གླེང་མོལ་བྱས་རྗེས། ད་གཟོད་ཁྱེད་ནི་དེ་འདྲ་ཞིག་གཏན་ནས་མིན་པ་ངས་རྟོགས་བྱུང་། ཨ་མ་ལགས། ཁྱེད་ཀྱི་ཨ་མ་སྟེ་ངའི་རྨོ་མོ་གྲོངས་སྐབས། ཁྱེད་ནི་ད་ལྟའི་ངའི་ལོ་ཚོད་ཙམ་ལས་མེད་པར་འདྲ་ལ། དེ་དུས་ཁྱེད་ལ་ད་དུང་བསམ་མེད་ཀྱི་གཅུང་པོ་ཞིག་མཆིས་ཟེར། ཧ་ཅང་ཉམ་ང་བའི་དུས་སྐབས་དེར་ཁྱེད་ཀྱིས་འོ་དོད་ཙམ་ཡང་མ་བྱས་པར། ཕྱི་ནང་གི་ལས་ཀ་ཡོངས་རང་ཉིད་ཁོ་ནའི་ཕྲག་ཏུ་ཁུར་བ་དང་། ཉེ་དུ་ཚོས་གཅུང་པོ་གསོ་རྒྱུའི་སེམས་གསོ་བྱས་རུང་། ཁྱེད་ཀྱིས་ཁས་མ་བླངས་པར་གཅུང་པོ་དེ་རང་གི་བུ་ལྟར་བསྐྱངས་མྱོང་ཟེར། སྐད་ཆ་དེ་དག་ཐོས་སྐབས་ངའི་མིག་ཟུང་བརླན་པར་གྱུར།

ཁ་ཉིན་ངས་གཅེན་པོའི་སྐད་འཕྲིན་གྱི་རྒྱབ་ལྗོངས་ངོས་སུ"ཨ་མའི་རེ་བ་སེམས་ཀྱིས་བསུ"ཟེར་བ་ཞིག་བཞག་ཡོད་པ་མཐོང་བྱུང་། དང་ཐོག་ངས་དེ་ནི་ཅི་འདྲའི་སྙིང་ལ་རྗེ་བའི་སེམས་གཏམ་ཞིག་རེད་བསམ། འོན་ཀྱང་ད་ལྟ་ངའི་སྣང་ངོར་དེ་ནི་ཧ་ཅང་རྒྱང་ཐག་རིང་བའི་ཚིག་འབྲུ་སྐམ་པོ་ཞིག་ཡིན་པ་ཚོར་འོང་། གང་ཡིན་ཟེར་ན་ངའི་ཨ་མ་ནི་ཆུང་དུས་ནས་སློབ་གྲྭར་འགྲོ་རྒྱུའི་གོ་སྐབས་མ་ཐོབ་པའི་འབྲོག་མོ་ཞིག་ཡིན་སྟབས། ཀ་མད་སུམ་ཅུའང་མི་ཤེས་མཁན་ཞིག་ཡིན་པས། དེང་དུས་སྐྱེ་འགྲོ་ཕལ་མོ་ཆེས་བེད་སྤྱོད་པའི་སྐད་འཕྲིན་ཟེར་བ་དེ་ལའང་རྒྱུས་མངའ་མེད་མཁན་ཞིག་ཡིན། དེས་རྐྱེན་པས། ངའི་ཨ་མར་མཁོ་བ་ནི་ཁྱིམ་ལ་སྡོད་སྐབས་ཁོང་ལ་རོགས་པ་མེད་ཀྱང་སེམས་གཏམ་འཆད་མཁན་ཞིག་དང་། སློབ་གྲྭར་སྡོད་སྐབས་བློ་རྩེ་གཅིག་སྒྲིམ་གྱིས་སློབ་ལ་བརྩོན་མཁན་ཞིག་གམ། ཕ་མའི་རེ་བ་ཆུད་ཟོས་སུ་མི་གཏོང་མཁན་གྱི་བུ་ཕྲུག་བཟང་པོ་ཞིག་ཡིན་དགོས་ངེས་རེད། དེ་བས་ངས་གཅེན་པོར་འཁང་ར་བྱས་པ་མིན་ལ་རང་ཉིད་ལ་སྐྱོན་འཛུགས་བྱས་པ་ཡང་མིན།

ཨ་མ་ལགས། ཁྱེད་ཀྱིས་ཆེད་དམིགས་ཀྱི"སློབ་གསོ"ཟེར་བ་ཞིག་མྱོང་མེད་རུང་། ཁྱེད་ཀྱིས་སྒྲོལ་མའི་བསྟོད་པ་དང་རྟེན་འབྲེལ་བསྟོད་པ། ད་དུང་བར་ཆད་ལམ་སེལ་སོགས་ཀྱི་ཞལ་འདོན་མང་དག་ཅིག་ཞོགས་པའི་སྦྲ་གུར་ནང་ཐབ་ལས་དག་ལས་ཞོར་དུ་འདོན་དུས། ངས་ད་གཟོད་ཁྱེད་ལ་བོད་མི་ཡོད་དོ་ཅོག་ལ་ལྡན་པའི་གཉུག་གཤིས་ཤིག་ཡོད་པ་ཚོར་བྱུང་སྟེ། མདོར་ན་ཡོད་ཚད་བྱིན་རླབས་སུ་བསྒོམས་ནས་ཞལ་འདོན་བྱེད་པའི་སྐད་གཅིག་རེ་རེ་ནི་མ་གྱུར་སེམས་ཅན་ཐམས་ཅད་ལ་ས་སྒང་གི་ཆེས་མཐོ་ས་ནས་སྨོན་ལམ་ཚིག་རེ་རེ་འདེབས་པ་དང་གཉིས་སུ་མེད་ཨང་། ཁྱེད་ནི་ནམ་ཞར་བུ་ཕྲུག་གིས་ཆེད་དུ་འཚོ་བ་ཙམ་མ་ཟད། མི་གཞན་ལ་ཕན་གདག་རྒྱུར་ཧ་ཅང་དགའ་མཁན་ཞིག་ཡིན། དེའི་རྒྱུ་མཚན་གྱིས་ཁྱིམ་མཚེས་ཚོས་ཁྱེད་ལ་བརྩི་བཀུར་བྱེད་པ་དང་། ང་དང་ན་མཉམ་གྱི་ཕྲུ་གུ་ཚོས་ཁྱེད་ལ་ཧ་ཅང་དགའ་བས་རྟག་པར་ཁྱེད་ལ་འཁོར་འཁོར་བྱེད། གྲོང་མི་ཚོས་ཁྱེད་ལ་སྦྱངས་འབྲས་ལེགས་པའི་ཕྲུ་གུ་གསུམ་ཡོད་པར་ཧ་ཅང་སྨོན་གྱི་ཡོད། འོན་ཀྱང་ངས་ནི་དེ་དག་ཡོད་ཚད་ཁྱེད་ཀྱི་བཀའ་དྲིན་ཡིན་པ་ཤེས་ལ། དེས་མ་ཟད་ཁྱེད་ཀྱི་བྱམས་སྐྱོང་དང་བཀའ་སློབ་འོག་ད་གཟོད་ང་ཟེར་བ་ཞིག་ཡོད་པའི་ངེས་ཤེས་ནི་སྔོན་མ་སྔོན་མ་ནས་ཡོད།

ཨ་མ་ལགས། མེ་ཏོག་པད་མར་ལྡན་པའི་དགེ་མཚན་མཐའ་དག་གིས་ཁྱེད་ཀྱི་དཀར་གཙང་གི་རང་གཤིས་དེ་མཚོན་མི་ཐུབ་ལ། གཡོ་དང་ཟོལ་ཀྱིས་མ་འབགས་པའི་སེམས་པ་དེ་ནི་དེ་བས་ཀྱང་བསྒྲུན་མི་ཐུབ། དེ་ལྟར་བསམ་བསམ་པའི་མཐར། ཨ་མ་ལགས། ཁྱེད་ཀྱི་བཀའ་དྲིན་ནི་རི་བོའི་གཏོས་དང་མཉམ་ལ་ཆུ་མོའི་རྒྱུན་ལས་རིང་། ཁྱེད་ཀྱི་བྱམས་སྐྱོང་ནི་རྟ་བདུན་དབང་པོའི་འོད་ལས་དྲོ་བས་ངའི་སེམས་པར་དྲོད་འཁོལ་ལྷོག་ལྷོག་བྱིན་ལ་བདེ་སྐྱིད་ཟེར་བའི་ཐ་སྙད་གཏིང་ཟབ་པོ་ཞིག་ཀྱང་ཁྱེད་ཁོ་ནས་ཕྲན་ལ་གནང་བྱུང་། དེའི་རྐྱེན་པས་ཨ་མ་ལགས།ཁྱེད་ནི་ངའི་སེམས་ཁོངས་ཀྱི་ཆེས་ལྷད་མེད་དང་ཆེས་དྭངས་གཙང་། ཆེས་མཛེས་ཤོས་ཀྱི་མེ་ཏོག་ཅིག་ཡིན་ནོ། ། ཀྱེ་ཀྱེ་བདག་གི་ཨ་མ་ལགས་་་་་་