༼ དབྱངས་ལྡེའུ། ༽ 2024-03-04
རྣམ་མཛེས་འཇའ་ཡི་གཞལ་ཡས་ཁང་ཁྱིམ་དུ། །
རོལ་སྒེག་གར་གྱིས་ཉམས་རྫོགས་རི་དྭགས་མིག །
ངག་རིག་ཨུ་དུམ་ཝཱ་རའི་མགུལ་རྒྱན་ཕྲེང་། །
རིང་བའི་སྙན་ཞེན་བཙུན་པའི་མགུལ་དུ་སྒྲོན། །
འཁོར་འདས་བསིལ་བའི་ཆ་གཏེར་མ་ལུས་ཀུན། །
གཅིག་བསྡུས་འཛུམ་ཕྲེང་དགྱེས་ཞལ་ལུས་དཀར་མ། །
དུག་གསུམ་མུན་པའི་སྨག་རུམ་འཐིབས་པའི་གྲོང་། །
བྱིན་ཆེན་མཛད་སྣང་དཀར་པོའི་བདག་ཉིད་མ། །
རྣམ་དཀར་མཁྱེན་རབ་རབ་གསལ་མེ་ལོང་ངོས། །
འཁོར་འདས་ཇི་སྙེད་ཆོས་ཀུན་ལེགས་གཟིགས་ཤིང་། །
རྣམ་གྲོལ་བདེ་གཤེགས་བྱེ་བའི་འདུས་གྲོང་ནས། །
འཁོར་སློབ་བརྩེ་བའི་དཔལ་སྐྱོང་སྒྲ་དབྱངས་མ། །
ཟླ་དུམ་དབུ་རྒྱན་འོད་ཀྱིས་སྣང་བ་དཀར། །
མ་རིག་སྨག་རུམ་ཡེ་གསལ་མཛད་པའི་ཆ། །
རྣམ་དཀར་ཟླ་བའི་དཔལ་གྱིས་དོ་མིན་པས། །
ངག་དབང་དབྱངས་ཀྱི་ལྷ་ཁྱེད་གཏན་དུ་རྒྱལ། །
མདངས་མཛེས་ཆུ་སྐྱེས་འདབ་མའི་གདན་གྱི་བླར། །
ཟབ་དབྱངས་ཆོས་ཀྱི་འཕང་འགྲོའི་སྐུད་པ་ཕྲར། །
ཕྱག་སོར་རྗེས་ཆགས་བརྩེ་བས་རེག་པའི་དབྱངས། །
རྣམ་དག་ཐར་བའི་གྲོང་དུ་མགྲོན་བརྡ་འཁུམས། །
བྲང་གཞུང་མྱོས་བུམ་དུང་དཀར་ཆ་འགྲིག་འཛིན། །
རབ་དཀར་འོ་མས་ཁུར་གྱིས་མཛེས་དུད་དཔལ། །
མཉེན་ལྕུག་སོར་མོའི་འདབ་མ་ཡངས་པོའི་ངོས། །
རིན་ཆེན་ཕ་ལམ་འོད་ཀྱིས་མཛེས་རྫོགས་ཅན། །
བསྟོད་དབྱངས་སྙན་པའི་ཚིག་གི་བླ་བྲེལ་དཀར། །
དད་གསུམ་ནམ་མཐོངས་ངོས་སུ་བཤམས་པ་ན། །
ངག་རིག་དབྱངས་ཀྱི་འཕྲུལ་མའི་ཚངས་སྲས་མ། །
དགྱེས་འཛུམ་ཚེམས་ཕྲེང་མུ་ཏིག་སྩོལ་མཛོད་ཀྱེ། །
རྩོམ་གསར། 10