༼ ཨ་ནུ་དད་ཞེན། ༽ 2024-03-04
ལྷང༵་ལྷང༵་ཀ་ལ་པིང་ཀའི་མགྲིན་སྙན་གྱིས། །
ལེགས་ཚོགས་ཆོས་ཀྱི་མཐའ་དག་གསལ་མཛད་དེ། །
དབང་ཕྱོགས་བློ་ཡི་རྟ་བདུན་འཛུམ་པ་འདི། །
སྒྲ་དབྱངས་ཚངས་སྲས་ལྷ་མོས་འདི་སྐྱོངས་ཤིག །
སྡུ་གུའི་དཀྱིལ་འཁོར་མཚན་དཔེའི་མི་ཟད་པའི། །
མཛེས༵་མཛེས༵་ལང་ཚོ་གསར་པ་གཅིག་བསྡུས་པ། །
ལྟ་བའི་མི་ངོམས་རི་དྭགས་མིག་ཅན་མ། །
རིག་བྱེད་སྒྲ་དབྱངས་ལྷ་མོ་ཕྱག་གི་ཡུལ། །
ཟབ་བརླིང་ཤེས་བྱའི་ལེགས་གསུང་དྲི་ཟའི་གླུ། །
མགྲིན་སྙན་ཀ་ལ་པིང་ཀའི་རྗེས་འགྲོ་བའི། །
འཇམ༵་འཇ༵མ་སྒེག་ལྡན་ཕྱག་གི་སོར་མོ་ལས། །
སིལ་སྙན་དབྱངས་ཀྱི་ངོ་མཚར་ཅི་ཡང་བཀྲ། །
གཙུག་ལག་ཤེས་བྱའི་རྣམ་བཞད་བཞིན་རས་ལ། །
ངག་གི་འདོད་འཇོ་བཀྲ་བའི་མིག་དཀྱུས་ཅན། །
རིག་བྱེད་ཡིད་ཀྱི་བརྟན་པ་འཕྲོག་བྱེད་པས། །
གསལ༵་གསལ༵་མཁྱེན་བརྩེ་བཀྲ་བའི་མཚོ་བྱུང་མ། །
གསལ༵་གསལ༵་ཤེས་བྱའི་མཐའ་དག་མཁྱེན་བརྩེ་ཡིས། །
སྙན༵་སྙ༵ན་རིག་བྱེད་ངག་གི་འདོད་འཇོ་ཕྱིར། །
བློ་ཡི་འདབ་མ་རྒྱས་མཛད་མུན་མཐར་བགྲོད། །
ངག་གི་བྱིན་རླབས་འཕོ་བའི་དབྱངས་ལྡན་མ། །
དཀར༵་དཀར༵་བཞིན་གྱི་པད་མའི་འདབ་མ་ལས། །
རྣམ་མཁྱེན་དཀྱུས་རིང་མིག་གི་ཟུར་མདའ་གཡོ། །
ཐུབ་པའི་གསུང་གི་མན་ངག་རོལ་བ་ན། །
སྙན༵་སྙན༵་དྲི་ཟའི་གདངས་དབྱངས་སྲིད་ན་མཐོ། །
ངག་རིག་རྒྱ་མཚོའི་ཕྲེང་བ་རབ་བཟུང་བའི། །
སྙན༵་སྙན༵་དབྱངས་ཀྱི་རླབས་ཕྲེང་སྲིད་རྩེ་ན། །
གསལ༵་གསལ་༵ཤེས་བྱའི་པད་ཚུལ་རྣམ་པར་བཞད། །
ངག་གི་བྱིན་རླབས་སྩོལ་ཅིག་ཚངས་སྲས་མ། །
རྣམ་བཞད་བློ་ཡི་པད་མའི་ཡོན་ཏན་གྱིས། །
གསལ༵་གསལ༵་མང་ཐོས་ངག་གི་འདོད་པ་འཇོ། །
ཚངས་སྲས་ངག་གི་མགྲིན་པ་རབ་སྙན་པ། །
ཡངས༵་ཡངས༵་སྲིད་ཀྱི་ཁམས་ན་རྣམ་པར་གཡོ། །
ཐོར་ཚུགས་མེ་ཏོག་རྒྱན་པའི་མཐོངས་ཡངས་སུ། །
རབ་དཀར་ཟླ་བའི་ཅོད་ཅན་རྣམ་པར་མཛེས། །
མཁྱེན༵་མཁྱེན༵་འཛིན་མའི་སྐ་རགས་གཞལ་དཀའ་བའི། །
གསལ༵་གསལ༵་རྣམ་བཞད་བློ་ཡི་ཆུ་གཏེར་རྒྱས། །
ཡངས༵་ཡངས༵་བློ་ཡི་ཤེས་བྱའི་རྣམ་བཞད་པའི། །
མཁྱེན༵་མཁྱེན༵་རྣམ་དཔྱོད་རྒྱས་པའི་ཆུ་གཏེར་གྱིས། །
གསལ༵་གསལ༵་རི་བོང་འཛིན་གྱི་གཟུགས་བརྙན་བཞིན། །
སྲིད་འདིར་ཟླ་མེད་དཔལ་ཡོན་རྣམ་པར་རྒྱས། །
མཛེས༵་མཛེས༵་རྣམ་པར་བཞད་པའི་བཞིན་རས་སུ། །
དམར༵་དམར༵་བྱི་རུའི་མདངས་ལྡན་ལྷུན་ཆགས་པ། །
སྡུ་གུ་དཔལ་ཡོན་རབ་རྒྱས་དྲི་ཟའི་གླུ། །
ལྷང༵་ལྷང༵་ཐོས་འཛིན་བུ་གར་སྙན་ཞིང་འཇེབས། །
རྒྱས༵་རྒྱས༵་དབྱར་གྱི་རི་བོང་འཛིན་པ་བཞིན། །
མཁྱེན་བརྩེ་སྲིད་ཀྱི་ཁམས་ན་ཟླ་མེད་ངང་། །
འཁྲུལ༵་འཁྲུལ༵་གཟུགས་བརྙན་འཛིན་པའི་རྨོངས་ཚོགས་འགའ། །
མུན༵་མུན༵་རྫོབ་གྱི་མཐར་སྤྲད་མཚོ་བྱུང་ཀྱེ། །
དཀར་འཇམ་བཞིན་གྱི་ཟླ་གསར་ཚེས་པ་ལ། །
མཛེས༵་མཛེས༵་ཚེམས་ཀྱི་འཛུམ་དཀར་གཡོ་མེད་ངང་། །
ཡང༵་ཡང༵་འཛུམ་པ་པད་མའི་ཟིལ་གནོད་གྱིས། །
བརྟན༵་བརྟན༵་སྲིད་ཀྱི་ཁམས་ནས་མཛེས་པ་ཅན། །
མཐོ༵་མཐོ༵་ཁྲི་ཡི་སྟེང་གར་མ་བཞུགས་ཀྱང་། །
གྲག༵་གྲག༵་དབྱར་གྱི་རྔ་སྒྲ་སྒྲོག་པ་བཞིན། །
འཕྲོག༵་འཕྲོག༵་ཡིད་ཀྱི་དྭངས་བ་འདྲེན་མཁན་མ། །
དཀར༵་དཀར༵་ཟླ་མཛེས་ན་ཆུང་ཚངས་སྲས་མ། །
རྩོམ་གསར། 10