སྙན་རྐང་གླིང་། 2024-02-05
ཕར་ལྟས་སྙིང་པོ་དབེན་པའི་བརྩེ་སེམས་ཀྱི་འཚོ་བ། །
ཚུར་ཡོང་སྙིང་ཤའི་དབར་ལ་རེག་པ་དེ་བྱས་དུས། །
གཅེས་པའི་རང་བློ་མངོན་པའི་སྐྱིད་ཉམས་ཀྱི་དུང་བ། །
ཕན་ཚུན་བློ་ངོར་འཁྱིལ་བའི་བསླུ་མེད་ཀྱིས་ཁེངས་ཡོད། །
གཞན་གྱི་བརྩེ་བར་ཡིད་སྨོན་འཆོར་དོན་རང་དབེན་ཅིང་། །
རང་རང་འགྲམ་ལ་ཡོད་པའི་བརྩེ་བ་ཡི་འདང་ཆེན། །
གཅིག་སེམས་གཅིག་ཏུ་སྦྲེལ་ཏེ་ཡིད་ཆེས་ཀྱི་སེམས་པ། །
ཕན་ཚུན་ལྷད་མེད་བཅང་ན་གཞན་དག་ལ་མི་སྨོན། །
དུས་རབས་གསར་པའི་མི་སེམས་རྒྱུ་འབྱོར་གྱིས་བཅོམ་ལ། །
དེང་དུས་ཕོ་མོའི་མཛའ་བརྩེ་སྒོར་མོ་ཡིས་བསླུས་པས། །
དེ་ལྟར་མི་འགྱུར་བརྩེ་བའི་རང་མདངས་ཀྱི་འོ་མ། །
གཅིག་སེམས་གཅིག་ཏུ་གནས་འདྲ་བརྩེ་བ་དེ་འབད་དགོས། །
མི་ཁའི་ཡག་སྡུག་སྐད་ཆ་གློག་ཞགས་ལྟར་འཁྱུགས་ལ། །
དྲང་བདེན་སྐད་ཆའི་སྙིང་པོ་རྭ་ཁ་ལྟར་བཀྱེས་ཀྱང་། །
རྣ་བ་ཨེན་ཙམ་མི་གཏད་རང་རང་གི་བརྩེ་བ། །
རིང་ནས་རིང་དུ་འཚོ་བའི་ལས་དབང་ལ་འབད་འགྲོ། །
མགོ་སྐོར་གཡོགས་པའི་བསམ་པ་རྨང་གཞི་ནས་དོར་ལ། །
རྒྱབ་ནས་རྫུན་ཚིག་སེམས་ཀྱི་མདའ་མོ་དེ་མི་གཏད། །
ཕན་ཚུན་ཡང་ཡང་གཅེས་པའི་སེམས་པ་ཡི་ཀློང་ནས། །
དྲན་གདུང་སྙིང་དུ་ཉར་བའི་སེམས་པ་རང་སྦར་དགོས། །
འཚོ་བ་ཁྲ་ཁྲའི་སྒལ་ཚིགས་ཡངས་མོ་ཡི་གྲོང་ན། །
མི་བརྟན་བརྩེ་བའི་འགྱུར་བ་སྣ་སོགས་སུ་གྲུབ་ཀྱང་། །
རང་སེམས་གཏིང་ནས་གཅེས་པའི་དགའ་མ་ཡི་པང་ན། །
དངུལ་དཀར་བརྩེ་བའི་མདངས་ཆགས་ཟོལ་མེད་དུ་འཇོག་པ། །
སྐད་ཅིག་འཇིག་རྟེན་བདེ་སྡུག་འཇའ་རིས་ཀྱི་འོག་ན། །
བརྩེ་བའི་དྭངས་གཙང་ལྷད་མེད་མི་སེམས་ལ་ཟུག་ཅིང་། །
ཤ་དང་རུས་པའི་མཐིལ་ལ་བྲལ་མེད་དུ་བསྟིམས་པས། །
དུང་སེམས་འོ་མའི་རང་མདངས་འཛུམ་པ་རང་གྲོལ་སོང་། །
དགའ་ན་ཞལ་གྱི་འཛུམ་དཀར་སྟོན་ས་ཡི་བདག་མོ། །
སྡུག་ན་མིག་ཆུ་འཛད་མེད་བཞུར་ས་ཡི་དགའ་མ། །
དགའ་སྡུག་བསླས་མའི་འོག་གི་མཉམ་གྲོགས་ཀྱི་མི་ལ། །
མི་བྲལ་བརྟན་ཚིག་ཟབ་མོ་གསེར་ཡིག་ཏུ་བྲིས་པ། །
ཚེ་ཡི་སྐལ་བ་རྫོགས་ན་བེམ་རོ་ཡི་རྣམ་ཤེས། །
ཁྱོད་ཀྱི་པང་ན་འཁོར་བའི་སྟ་གོན་རང་བརྩོན་ཏེ། །
མི་རྟག་འཁོར་བའི་གྲོང་ནས་མཉམ་རོལ་དུ་བྱས་པས། །
སེམས་ཀྱི་འཆར་སྒོ་ཚིམ་པའི་སྣང་བ་རུ་སྒོམ་ཡོད། །
མཐུན་པའི་གསེར་ཀྱི་སྐུད་པ་ཡིད་སེམས་ལ་སྦྲེལ་ཏེ། །
སྐུད་པའི་མདུད་པ་མ་ལྷོད་དམ་སྦྲེལ་དུ་བྱས་ཤིང་། །
སེམས་ཀྱི་ཕུགས་འདུན་ཁ་ཕྱོགས་གཅིག་པ་རུ་གཏད་ནས། །
ཡིད་ཀྱི་སྨོན་པའི་ཚིག་གིས་རམ་འདེགས་སུ་བྱས་ཡོད། །
མི་འགྱུར་བརྩེ་བའི་དམ་བཅའ་མནའ་ཚིག་ཏུ་སྐྱེལ་ཏེ། །
སྐྱབས་གནས་དམ་པའི་ལྷ་ལ་བསྔོ་བ་རུ་བགྱིས་ནས། །
དུང་སེམས་གཡོ་ཟོལ་དབེན་པའི་ཕན་ཚུན་དུ་འཁྱུད་ལ། །
མི་ཚེ་མཉམ་དུ་སྐྱེལ་བའི་ཕུགས་འདུན་རེ་སོམས་ཡོད། །
རྩོམ་གསར། 10