མི་ཤིག་དབྱངས་འགྲོས་ཚོར་བའི་ཁམས། །

འགྱུར་མེད་རི་མོ་བརྩེ་བའི་གཤིས། །

འཁོར་བ་མདང་གི་རྨི་ལམ་ལས། །

ལས་ཀྱི་གཏམ་རྒྱུད་རེ་རེ་གླེང་། །

དྲན་པ་རེ་རེ་ཕྱེ་ལེབ་བཞིན། །

རྒྱང་དུ་ཕྱོགས་ཤིང་མདུན་དུ་ལྷག །

སྤྲོས་པ་རེ་འགའ་འཁྲུལ་སྣང་ལྟར། །

ཆུ་གཟུགས་རི་མོའི་ཚུལ་དུ་སྣང་། །

སྐྱེ་བ་ཤེལ་དཀར་རྨུ་ཐག་ལས། །

སྣང་བ་འཇའ་ཡི་དཀྱིལ་འཁོར་དུ། །

བརྩེ་འདང་འོད་ཟེར་སྣ་ལྔ་འཁྱུད། །

མ་བཅོས་ཚིག་གི་མེ་ཏོག་འཁྲུངས། །

མཚན་མོའི་ཟླ་འོད་བསིལ་འཇམ་ལྡན། །

ཀུ་མུད་རྒྱས་པའི་དགའ་ཚལ་ནས། །

ཞལ་རས་དཀར་གསལ་རྒྱས་པའི་མདངས། །

སེམས་ཀྱི་དབུས་སུ་ལྷག་སྟེ་འཚལ། །

སེམས་པ་དངུལ་དཀར་དྭངས་ཤིང་གསལ། །

མཚན་ལྗོངས་ཟླ་འོད་ཡིད་ཁར་བཞེངས། །

ཚོར་བའི་རྒྱུད་སྐུད་ངང་གིས་འཁྲོལ། །

སྡུག་བསྔལ་བྲལ་བའི་གླུ་ཞིག་བླངས། །

གཟུང་འཛིན་སྣང་བ་སྤྲོས་པའི་གར། །

དར་ལྕོག་བཞིན་དུ་སྡེབ་སོང་ངོ་། །

ཁྲག་རྒྱུན་རླུང་གི་རྒྱུ་བ་ཡང་། །

འཁོར་འདས་ཉིན་སྲིབ་དག་ཏུ་འགྲིམས། །

སྐྱེ་འཆི་གཉིས་ཀྱི་ཟ་མ་ཏོག །

ལུས་ཀྱིས་བཏེགས་ཤིང་རུས་པས་ཁུར། །

གྲིབ་མའི་ནང་གི་གཟུགས་བརྙན་དེ། །

དགའ་སྐྱོ་གཉིས་ཀྱི་འདུག་རོགས་ཡིན། །

ལས་ཀྱི་རྟེན་འབྲེལ་དར་དཀར་ལ། །

མིག་ཆུའི་རིན་ཆེན་སྣ་ལྔས་སྤྲས། །

སེམས་ཀྱིས་ཕྱོགས་པའི་ལྷ་མོ་ལ། །

ཕྱག་རྟགས་ཤིག་གི་ཚབ་ཏུ་ཕུལ། །

བཅོས་སུ་ཡོད་ན་ལོས་ཀྱང་བཅོས། །

དགའ་སྐྱོ་དག་ཀྱང་བསྒྱུར་ནས་འགྲོ། །

ནམ་ཞིག་རང་ཉིད་འཆི་བའི་ཚེ། །

ཚེ་ཡི་རྣམ་ཤེས་དཀར་པོར་ངེས། །