༢༠༢༤ལོའི་ཐོན་སྐྱེད་བསྡོམས་འབོར་སྔོན་དཔག་ལྟར་ན་༦%ཡས་མས་འཕར་རྒྱུ། 

   ཞིང་ཆེན་ཡོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་སྔོན་དཔག་གི་དམིགས་འབེན་གཙོ་བོ་ནི། ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་༦%ཡས་མས་འཕར་བར་བྱ་རྒྱུ་དང་། གྲོང་ཁྱེར་དང་གྲོང་རྡལ་དུ་ལས་ཞུགས་མི་གྲངས་ཁྲི༨༥གསར་དུ་འཕར་བ། གྲོང་ཁྱེར་དང་གྲོང་རྡལ་གྱི་བརྟག་དཔྱད་ལས་ཀ་ཤོར་ཚད་༥.༥%ཡས་མས་ཡིན་པ། གྲོང་མིའི་འཛད་སྤྱོད་རིན་གོང་འཕར་ཚད་༣%ཡས་མས་སུ་འཛིན་རྒྱུ། ས་གནས་ཀྱི་སྤྱིར་བཏང་གི་སྤྱི་པའི་སྔོན་རྩིས་ཡོང་འབབ་དང་གྲོང་མིའི་ཡོང་འབབ་འཕར་ཚད། དཔལ་འབྱོར་འཕར་ཚད་བཅས་གཞི་རྩའི་ཆ་ནས་གཅིག་མཚུངས་ཡོང་བ་བྱ་རྒྱུ། འབྲུ་རིགས་ཐོན་ཚད་རྒྱ་མ་དུང་ཕྱུར་༧༡༥ཡན་རྒྱུན་འཁྱོངས་ཐུབ་པ། རྒྱལ་ཁབ་ཀྱིས་སྤྲད་པའི་ནུས་བསྲི་སྙིགས་འཕྲི་དང་ཁོར་ཡུག་སྲུང་སྐྱོང་སོགས་ཀྱི་ལས་འགན་ལེགས་འགྲུབ་བྱ་དགོས་ཞེས་གསུངས།

དཔལ་འབྱོར་འཛུགས་སྐྲུན་དང་སྤུས་མཐོའི་འཕེལ་རྒྱས་ཆེས་གལ་ཆེན་རེད།

    ལོ་ཧྲིལ་བོའི་འཕེལ་རྒྱས་དམིགས་ཚད་གླེང་སྐབས་ཧོང་ཆང་གིས། དཔལ་འབྱོར་འཛུགས་སྐྲུན་གྱི་ལྟེ་བའི་ལས་དོན་དང་འཕེལ་རྒྱས་སྤུས་ཚད་མཐོར་གཏོང་ལས་འགན་ཨང་དང་པོར་འཛིན་ཏེ་དུས་རབས་གསར་པར་དཔལ་འབྱོར་ལས་དོན་ཡག་པོ་བསྒྲུབ་རྒྱུའི་སྐོར་གྱི་ཏང་ཀྲུང་དབྱང་གི་ཆོས་ཉིད་རང་བཞིན་གྱི་ངོས་འཛིན་ཡང་དག་ཁོང་དུ་ཆུད་པ་དང་ཁྱོན་ཡོངས་ནས་བེད་སྤྱོད་བྱེད་དེ། ཕྱི་རོལ་ཁོར་ཡུག་གི་རྙོག་འཛིང་རང་བཞིན་དང་། ཛ་དྲག་རང་བཞིན། འགྱུར་བའི་རང་བཞིན་བཅས་ལ་ཕྱི་རོལ་ཡུལ་དང་མཐུན་པའི་སྒོ་ནས་ལྟ་སྟངས་ཡང་དག་འཛིན་དགོས་ལ། དཔལ་འབྱོར་བསྐྱར་འཕེལ་ལེགས་ཕྱོགས་སུ་འཕེལ་བ་དང་ཡུན་རིང་ལེགས་ཕྱོགས་སུ་འགྲོ་བའི་གཞི་རྩའི་འཕེལ་ཕྱོགས་ཡང་དག་མཐོང་ཐུབ་དགོས། ལྷག་པར་དུ་སི་ཁྲོན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རྨང་གཞི་བཟང་པོ་ཡོད་པ་དང་། སྟོབས་ཤུགས་ཆེ་ཙམ་ཡོད་པ། མ་ཚད་རྒྱལ་ཁབ་ཀྱི་འཐབ་ཇུས་མང་པོ་ལག་བསྟར་བྱེད་པའི་གོ་སྐབས་ཀྱང་ཡོད་པས། ངེས་པར་དུ་དཀའ་ངལ་ལ་མི་འཛེམ་པར་མདུན་དུ་སྐྱོད་པའི་བློ་སྟོབས་ལ་བརྟེན་ནས་ཉེན་ཁ་གོ་སྐབས་སུ་སྒྱུར་བའི་ནུས་པ་ཆེ་རུ་གཏོང་དགོས།  

གཅིག་ནི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཤུགས་རྒྱག་དགོས་པ་བཞི་ཡི་བླང་བྱ་གལ་ཆེན་དེ་རྩ་བའི་གཞི་འཛིན་སར་འཛིན་རྒྱུ་རྒྱུན་འཁྱོངས་བྱས་ཏེ། རང་རྟོགས་ངང་སི་ཁྲོན་གྱི་འཐབ་ཇུས་གོ་གནས་རྒྱལ་ཡོངས་ཀྱི་ཁོང་དུ་ཆུད་པར་བྱེད་པ་དང་། མཐོ་ས་གཉིས་དང་། རྟེན་གཞི་གཉིས། སྲུང་ཡོལ་གཅིག་བཅས་ཀྱི་ལས་འགན་མཐའ་གཅིག་ཏུ་འཁུར་དགོས། 

    གཉིས་ནི་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ནས། འཕེལ་རྒྱས་ཀྱི་གྲུབ་འབྲས་དེ་ལས་ལྷག་པའི་སྒོ་ནས་མང་ཚོགས་ཀྱི་འཚོ་བའི་སྤུས་ཚད་དུ་བསྒྱུར་རྒྱུའི་ཐད་ལ་སྐུལ་འདེད་གཏོང་དགོས། 

   གསུམ་ནི་འཕེལ་རྒྱས་སྤུས་ཚད་མཐོར་གཏོང་རྒྱུ་དེ་དུས་རབས་གསར་པའི་འགྱུར་མེད་ཀྱི་གནས་ལུགས་སུ་བརྩི་རྒྱུ་མཐའ་འཁྱོངས་བྱས་ཏེ། ཞིང་ཆེན་ཡོངས་ཀྱི་སྤུས་ཚད་མཐོ་བའི་འཕེལ་རྒྱས་མངོན་གསལ་དོད་པོས་ལེགས་སུ་འགྲོ་རྒྱུར་སྐུལ་འདེད་གཏོང་དགོས། 

   བཞི་ནི་བརྟན་ཐོག་ཡར་འཕེལ་དང་། མདུན་སྐྱོད་ཀྱིས་བརྟན་ལྷིང་ལ་སྐུལ་འདེད། སྔོན་ལ་དམིགས་འབེན་བཙུགས་ནས་རྗེས་སུ་ལག་ལེན་བསྟར་པ་བཅས་མཐའ་འཁྱོངས་བྱས་ནས། དཔལ་འབྱོར་ཞིང་ཆེན་ཆེན་པོས་དངོས་གནས་ལས་འགན་གལ་ཆེན་འཁུར་བའི་འགན་འཁྲི་ལྕི་པོ་ཕྲག་ཏུ་ཏན་ཏིག་འཁུར་དགོས། 

   ལྔ་ནི་བཅོས་སྒྱུར་སྒོ་དབྱེར་བརྟེན་ནས་འཕེལ་རྒྱས་ཀྱི་ནང་གནས་སྒུལ་ཤུགས་ཆེ་རུ་གཏོང་བར་མཐའ་འཁྱོངས་ཀྱིས་སྒྲིག་སྲོལ་དང་ལམ་སྲོལ་བསྒྱུར་བཅོས་ལ་བརྟེན་ནས་ནང་གི་འཁོར་རྒྱུག་འགག་གནད་སྒྲོལ་ཏེ་སྒོ་དབྱེ་དེ་བས་ཆེ་བ་བྱས་ནས་ཕྱིའི་འཁོར་རྒྱུག་སྤུས་ཚད་མཐོ་རུ་བཏང་སྟེ་སྤྱི་ཚོགས་ཀྱི་གསོན་ཤུགས་འཕེལ་བར་བྱེད་དགོས། 

དྲུག་ནི་འཕེལ་རྒྱས་དང་བདེ་འཇགས་འགུལ་རྣམ་དོ་སྙོམས་དང་། ཕན་ཚུན་སྤེལ་རེས་རྒྱུན་འཁྱོངས་བྱས་ཏེ། སྤུས་ཚད་མཐོ་བའི་འཕེལ་རྒྱས་ཀྱིས་ཆུ་ཚད་མཐོ་བའི་བདེ་འཇགས་ལ་སྐུལ་འདེད་དང་། ཆུ་ཚད་མཐོ་བའི་བདེ་འཇགས་ཀྱིས་སྤུས་ཚད་མཐོ་བའི་འཕེལ་རྒྱས་ལ་འགན་སྲུང་བྱ་དགོས་ཞེས་གསུངས།

ཚན་རྩལ་གསར་གཏོད་ཀྱི་རྒྱབ་སྐྱོར་སྲིད་ཇུས་བཅུ་བཏོན་འདུག། 

     ཚན་རྩལ་གསར་གཏོད་ཀྱིས་དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་བྱེད་པར་སྣེ་ཁྲིད་བྱས་ཏེ། ཐོན་སྐྱེད་ནུས་ཤུགས་གསར་པ་གང་མགྱོགས་ཆགས་པར་སྐུལ་བའི་ཐད་ནས། ཧོང་ཆང་གིས་༢༠༢༤ལོར། གསར་དར་བཟོ་ལས་ཅན་སྐུལ་སྤེལ་དང་། ཁྱོན་ཡོངས་ནས་ལེགས་ཆ་ལྡན་པའི་ཐོན་ལས་ཆེན་པོ་དྲུག་གི་སྤུས་ཀ་མཐོར་འདེགས་གཏོང་བའི་རྒྱབ་སྐྱོར་སྲིད་ཇུས་དོན་ཚན་བཅུ་ལག་ལེན་བསྟར་དགོས།

      བཟོ་སྐྲུན་ལས་རིགས་ཀྱི་གཙོ་གནད་ཐོན་ལས་མ་ལག་སྤུས་མཐོའི་འཕེལ་རྒྱས་ལ་སྐུལ་འདེད་གཏོང་བ་དང་། ཐོན་ལས་ཀྱི་རྨང་གཞི་བསྐྱར་སྐྲུན་ལས་གྲྭ་དང་ལག་རྩལ་སྒྲིག་ཆས་གལ་ཆེན་འགག་སྒྲོལ་ལས་གྲྭ་ལག་བསྟར་བྱེད་དགོས། ཁྲེང་ཏུའུ་དང་ཁྲུང་ཆིང་གི་གློག་རྡུལ་ཆ་འཕྲིན་སོགས་རྒྱལ་ཁབ་ཀྱི་སྔོན་ཐོན་བཟོ་སྐྲུན་ལས་རིགས་ཁྱུ་ཚོགས་གསུམ་སྐྱེད་སྲིང་དང་མཐོ་རུ་གཏོང་བའི་ལོ་གསུམ་བྱ་སྤྱོད་སྤེལ་བ་དང་། སི་ཁྲོན་ཀྲུང་གོའི་ཆང་དཀར་རྟེན་རྫས་བཤམས་མཛོད་ཁང་ཆུ་ཚད་མཐོ་བའི་འཆར་འགོད་འཛུགས་སྐྲུན་བྱེད་པ་དང་། ཕན་ནུབ་རྒྱལ་ཁབ་ཀྱི་འཐབ་ཇུས་ཐོན་ཁུངས་གསར་གཏོད་གསར་སྤེལ་ཚོད་ལྟ་ཁུལ་འཛུགས་སྐྲུན་ཟབ་སྤེལ་བྱེད་དགོས། མིས་བཟོས་རིག་ནུས་ཐོན་ལས་འཆར་འགོད་དང་འཕེལ་རྒྱས་ཤུགས་ཆེན་གཏོང་བ་དང་། སྐྱེ་དངོས་ལག་རྩལ་དང་འཁོར་སྐར་དྲ་བ། ནུས་ཁུངས་གསར་པ་དང་རིག་ནུས་དྲྭ་སྦྲེལ་རླངས་འཁོར་སོགས་གསར་དར་ཐོན་ལས་ཧུར་ཐག་གིས་གསོ་སྐྱོང་བྱས་ནས། ད་ལོ་ངོ་བོའི་རང་བཞིན་གྱི་འཕེལ་རྒྱས་ཡོང་རྒྱུ་བརྩོན་ལེན་བྱ་དགོས། དམའ་མཐོངས་དཔལ་འབྱོར་འཕེལ་རྒྱས་མགྱོགས་སུ་གཏོང་བ་དང་། མི་སྡོད་གནམ་གྲུ་དང་མི་མེད་གནམ་གྲུ། དམག་སྤྱོད་དང་དམངས་སྤྱོད། རྒྱལ་དབང་ཁེ་ལས། དམངས་གཉེར་ཁེ་ལས་བཅས་མཉམ་དུ་ཞུགས་པར་རྒྱབ་སྐྱོར་བྱེད་དགོས། ཅིང་ཏུང་ཧྥང་གི་རབས་༨.༦པའི་ཐོན་སྐྱེད་མ་ལག་དང་། དབྱི་ཆི་དར་དམར་ཁྲེང་ཏུའུ་ཡི་ནུས་ཁུངས་གསར་པའི་རླངས་འཁོར་ཆ་ཚང་བཟོ་སྐྲུན་རྟེན་གཞི་དང་། ཐེན་ཧྥུ་མཉེན་ཆས་གླིང་གི་ལས་རིམ་གཉིས་པ་སོགས་ཐོན་ལས་གལ་ཆེན་གྱི་ལས་གཞི་འཛུགས་སྐྲུན་མགྱོགས་སུ་གཏོང་དགོས་ཞེས་གསུངས།