ཁམས་པ་རབ་དབྱངས། 2024-01-26
མཐོང་བའི་མོད་ལ་ཡ་མཚན་ཞིང་། །
ཁྱེད་ཀྱི་གཟུགས་ནི་ཡིད་འོང་བ། །
སུ་ཡི་མིག་ལ་མཛའ་བ་འདི། །
མཆོད་དགའ་ཁྱེད་ནི་ཤིན་ཏུ་མཛེས། །
ཁྱེད་ནི་ལང་ཚོས་རྣམ་པར་གཡོ། །
གང་གིས་ཉོན་མོངས་ཀུན་ཞི་ནས། །
སྐྱེ་བ་བརྒྱ་ཡི་རྗེས་འབྲངས་ནས། །
ཡིད་ནི་གུས་པས་དང་བར་བྱས། །
རྟག་ཏུ་བསྙེན་བཀུར་བྱས་པ་ན། །
ཟོལ་མེད་ལྡང་བའི་ངང་ཚུལ་གྱིས། །
ཀུན་གྱི་མྱ་ངན་སེལ་བྱེད་པ། །
ཁྱེད་ཉིད་ལྟ་བུ་ཡོད་མ་ཡིན། །
པདྨའི་འཛུམ་ཆུང་གྲོལ་བ་ན། །
རབ་ཏུ་དགའ་བའི་མཆོད་སྦྱིན་མ། །
མེ་ཏོག་རྒྱས་པའི་དྲི་བཟང་གིས། །
ཕྱོགས་མཚམས་ཀུན་ཏུ་ཁེངས་གྱུར་པ། །
གང་ཞིག་ཡིད་ལ་མཛའ་བས་གཉེན། །
པདྨ་དགོད་པའི་མདངས་ཅན་མ། །
ལས་ཀྱི་མཚོ་མོ་མ་བསྲུབ་པ། །
ཁྱེད་ཀྱི་ལང་ཚོ་འཇོམས་མ་ཡིན། །
ཡིད་འོང་གར་སྟབས་འདི་དག་ལ། །
ངོ་མཚར་ལས་ཀྱི་རྨད་བྱུང་བ། །
ཚངས་པའི་སྤྱོད་པ་ལྟ་བུ་འདི། །
ཁྱེད་ལ་མ་གཏོགས་སུ་ལ་མངའ། །
རྒྱལ་བྱེད་ཚལ་གྱི་མངོན་དགའ་ནས། །
བསོད་ནམས་མཐུ་ཡི་ལེགས་བྱས་པ། །
ཉམས་པ་མེད་པའི་གཟུགས་ལྡན་ནི། །
འོད་ཟེར་ལྡན་ཞིང་རབ་ཏུ་མཛེས། །
ཤིན་ཏུ་རྨད་བྱུང་མཛེས་པ་འདི། །
སྐྱོན་བྲལ་དྲི་མེད་རི་བོང་ཅན། །
བཞིན་གྱི་ཟོལ་མེད་དྭངས་མ་འདི། །
གཡོ་ལྡན་མིག་གི་བདུད་རྩི་ཡིན། །
ང་ཡི་སྤྱན་ཟུང་ལྷུང་ཙམ་གྱིས། །
རྗེས་སུ་ཆགས་ཤིང་ཉམས་པར་བྱེད། །
འདུན་པའི་བརྩེ་དགའ་གཡོ་བ་ན། །
རེ་ཞིག་ཁྱེད་ལ་ཚེ་གཅིག་བསྟེན། །
ལེགས་པའི་ཉེས་ཚོགས་ལྡང་བ་ན། །
སེམས་ཉིད་སླད་དུ་རབ་ཞུགས་ཚེ། །
ཏིང་འཛིན་ནམ་མཁའ་བསྒུལ་བ་ན། །
ང་རང་ཡོངས་སུ་བསླུ་བར་གྱུར། །
རབ་ཏུ་རྩེན་པའི་ཁང་བཟང་ནས། །
ཀུན་ཏུ་དྲི་ངད་འཐོར་བ་ན། །
ཐོས་པའི་ཡོན་ཏན་ལྡང་བ་ན། །
ང་རང་ཁྱེད་ཀྱི་དྲུང་དུ་བསྙེགས། །
གང་ཞིག་གདུང་བ་སྐྱོམ་པ་ན། །
ཁྱེད་ཉིད་སླད་དུ་ཅི་ཞིག་འབྲི། །
ཚོར་ཤེས་མག་མོག་འདི་དག་ལ། །
ཁྱེད་ཉིད་རྗེས་སུ་འཛིན་པར་མཛོད། །
མཆོད་བསྟོད་དཔག་བསམ་འཁྲི་ཤིང་ལ། །
སོར་མོའི་འདུ་བྱེད་ཡང་ཡང་འགུལ། །
ཀུན་ཏུ་དགའ་བའི་མཆོག་ལྡན་མ། །
ཚེ་རབས་ལས་ཀྱི་རྗེས་འཛིན་མཛོད། །
རྩོམ་གསར། 10