རྫ་ཤུལ་བློ་བཟང་། 2024-01-19
གཤིས་བཟང་ཉམས་ཀྱི་གོམ་སྟབས་ལྡན་པའི། །
ཉམ་ཆུང་ཚུལ་མཐུན་སྨན་ཆུང་གཞོན་ནུ། །
འཛུམ་གྱི་མདངས་ལ་ཉི་ཟླ་ཉིས་བྲིས། །
དབྱངས་ཀྱི་ལྷ་མོ་འདྲ་བའི་བུ་མོ། །
ཨུ་དུམ་ཝ་ར་འཁྲུངས་དང་མཚུངས་པར། །
ཡིད་འཕྲོག་དུང་ཟླའི་གཟི་མདངས་ཁྱེར་མཁན། །
གང་ཞིག་འཛིན་པའི་མིག་མདའ་རྣོན་པོས། །
སེམས་ཀྱི་ཕྱི་ནང་འབིགས་པའི་ཚུལ་བསྟན། །
ཞལ་སྒོ་འོ་མའི་མདངས་ཀྱིས་བསྒོས་འདྲ། །
རབ་དཀར་དུང་སོ་ཕྲེང་བར་བགྲངས་ནས། །
ཉི་འོད་འབུམ་གྱིས་འོད་ཟེར་འཕོས་འདྲ། །
བདག་ཡིད་འཁྲུལ་བའི་སྣང་ཚུལ་ཡིན་ནམ། །
མཛེས་པའི་གདོང་ལ་ཡག་སྣང་མ་ཤར། །
སྤྱོད་བཟང་མངོན་པ་དེ་ཀས་བཟི་སོང་། །
ཉམས་འགྱུར་སྟོང་གི་རྫུ་བག་མི་འདུག །
ངག་འཇམ་ཚིག་ལ་ཡིད་སེམས་ཤོར་སོང་། །
བཅོས་མའི་སྐུ་འབག་གྱོན་པ་མ་མཐོང་། །
མ་བཅོས་གཤིས་དཀར་ལྡན་པ་མཐོང་སོང་། །
ངན་སྨྲས་ཚིག་གིས་བསྲེས་པ་མ་ཐོས། །
མཛངས་མའི་ཡོན་ཏན་ཡོད་ཚུལ་ཐོས་སོང་། །
བརྩེ་བའི་ཟུར་མིག་མདའ་མོ་ལམ་ལམ། །
འཇམ་མཉེན་ངག་གི་དབྱངས་རྟ་ལྷང་ལྷང་། །
བསླུ་བྲིད་ཚིག་གིས་ལུས་སེམས་མ་བརླན། །
བསླུ་མེད་དུང་བའི་བརྩེ་བ་ཀྱོམ་ཀྱོམ། །
ཡིད་ཀྱི་དགའ་བ་བཏེགས་པའི་བུ་མོ། །
ལང་ཚོའི་མེ་ཏོག་རྟོག་པས་བཏགས་ནས། །
སྤྲོས་པའི་སྦྲ་ནག་ནང་དུ་བཤམས་ཡོད། །
རྗེ་བཙུན་སྒྲོལ་མའི་ཞལ་ཐང་འདྲ་བ། །
ཐོབ་པའི་སྨོན་འདུན་སེམས་སུ་བཅངས་ན། །
རེ་བའི་ཨུཏྤལ་འཁྲིས་སུ་བཞད་ནས། །
ལས་ཀྱི་ཁ་དོག་མགུལ་དུ་དཔྱངས་ཏེ། །
འཁོར་བའི་བརྡ་གླུ་མགྲིན་པར་བསུས་ཡོད། །
ཟུངས་ཁྲག་དྭངས་མོའི་བརྩེ་བ་འདྲ་བའི། །
དུང་སེམས་མདུད་པའི་དམ་བཅའ་བརྟན་པོ། །
བྲིས་པས་མ་ཆོག་བརྐོས་དང་མཚུངས་པས། །
སྙིང་གི་ཟིལ་བ་འཐུ་བའི་བུ་མོ། །
དབྱངས་ཀྱི་མེ་ལོང་ནང་གི་གཟུགས་བཟང་། །
བརྩེ་བའི་འོ་འཛིན་བཏེགས་པའི་བུ་མོ། །
ཚེ་རབས་སྟོང་གི་གསེར་གྱི་མཛུབ་དཀྲིས། །
ལག་པའི་སོར་མའི་རྒྱན་དུ་བྱས་སོང་། །
དོ་སྣང་ཆེ་བའི་རྩོམ།
རྩོམ་གསར། 10