བྱིས་དུས་ཞེས་པའི་ས་རྩེད་རྡོ་རྩེད་ལ་གཡེང་བའི་དུས་ཚོད་དེ་རྫོགས་རྗེས། ངས་འཇིག་རྟེན་གཞན་ཞིག་ངོས་ཟིན་སོང་བ་འདྲ་སྟེ། དེ་ནི་ཁ་དོག་མང་བའི་སེམས་ཀྱི་འཇིག་རྟེན་རེད། ཁ་དོག་དེའི་ནང་དུ་དགའ་སྐྱོ་དང་འཚོ་བ་བརྩེ་ཞེན་དང་གསང་བ་སོགས་མང་པོ་མང་པོ་ཞིག་འདུས་ཡོད། འདི་ནི་ང་རང་ཁོ་ནའི་འཚར་ལོངས་བྱུང་བའི་གོ་རིམ་མིན་པ་མི་ཚེ་ཞེས་པའི་ལོ་ཟླ་འདི་དག་འགྱུར་ལྡོག་འགྲོ་ཚུལ་དང་བྱིས་པ་ནས་གཞོན་པ་གཞོན་པ་ནས་རྒས་པའི་གོ་རིམ་ཞིག་ཡིན་ངེས།

དུས་ཚོད་ཅེས་པ་འདིས་ང་རང་བསྒྱུར་བཅོས་བཏང་ཟིན་པས། དངོས་གནས་ཐབས་བཀོད་མི་འདུག། ང་ལ་འཁང་ར་དང་ཁྲེལ་མེད་ཅེས་མ་བརྗོད་རོགས། འདས་ཟིན་པའི་མི་ཚེའི་མཛེས་སྡུག་མཐའ་དག་རྟག་བརྟན་དུ་གནས་མི་སྲིད། དེ་ནི་མི་ཚེའི་གོ་རིམ་སྟེ། སོས་ཀ་མེ་ཏོག་དབུས་མགོ་རྩོམ་ཞིང་དབྱར་དུས་མཛེས་སྡུག་གི་ལོ་མ་བཞད། སྟོན་མཇུག་འདབ་ལོ་ས་ལ་འཐོར་བ་ནི་ཅིས་ཀྱང་བཟོད་དཀའ་བ་ཞིག། འོན་ཀྱང་སུ་ལའང་ལྡོག་ཐབས་མེད་པའི་དོན་དངོས་ནི་དེ་ལྟར་ལགས།

ངས་རང་ཉིད་ཇི་ལྟར་འགྱུར་བ་མ་ཤེས། མི་ཚོས་བཤད་ན་ལོ་ཟླ་འགྱུར་བར་མ་ཟད་ང་རང་བྱད་གཟུགས་གྱུར་འདུག་ཟེར། སེམས་ཀྱི་ལྟ་ཚུལ་སྣ་ཚོགས་འགྱུར་ལྡོག་བྱུང་འདུག་ཟེར། འགྱུར་ལྡོག་ཅེས་པ་འདིས་ང་རང་གང་དུ་ཁྲིད་འགྲོ་འམ། ངས་ངོ་མ་མི་ཤེས། མ་འོངས་པ་ཞེས་པ་འདི་ནི་མདུན་དུ་འཐེན་པའི་ལམ་བུ་ཀྱག་ཀྱོག་འདི་གང་དུ་ཡོད་པ་མི་ཤེས།

ངས་ངོ་མི་ཤེས་པའི་མི་ཚོགས་ཤིག་ལ་འཕྲད་ཅིང་ཡང་བསྐྱར་དེ་དག་དང་གྱེས་ཤིང་དེ་དག་དང་འཕྲད་ཙམ་བྱེད། དེ་དག་ནི་རང་རང་སོ་སོ་དང་ང་ཡང་ང་ཡིན་པ་ལས་འཚོ་བའི་ཁྲོད་ནས་འབྲེལ་བ་ཡོད་མཁན་མང་པོ་མ་རེད། ངས་ངོ་མི་ཤེས་པའི་མི་ཚོགས་ནང་ནས་ཐོག་དང་པོར་ཁྱོད་དང་འཕྲད་དུས་ངས་ཁྱོད་ལ་དབྱར་ཁ་ལྟ་བུ་མི་ཚེ་ཞིག་སྦྱིན་ཐུབ་ན་སྙམ། སད་དང་སེར་བ།རླུང་དང་ལྷགས་པ་གང་ཡང་མྱོང་མི་དགོས་ཤིང་། མི་ཚེ་དེའི་དུས་ཚོད་མཐའ་དག་མཛེས་སྡུག་གིས་བཞད་ན་སྙམ། འོན་ཀྱང་།ང་གྱུར་ཚར། ང་འགྱུར་བས་མ་ཡིན་ཏེ། འཇིག་རྟེན་འདིས་ང་རང་བསྒྱུར་འགྲོ། ངའི་དགའ་སྐྱོ་དང་བསམ་བློ་ཡོད་ཚད་བསྒྱུར་འགྲོ། དགོངས་པ་མ་ཚོམས། ངས་ཨ་གསར་དང་ཁྲེལ་མེད་བྱས་པ་མིན་ཡང་འདས་པའི་འཚོ་བ་མཐའ་དག་གྱུར་ཟིན། ད་ནི་འདས་དོན་གྱི་ཆེད་དུ་སེམས་མ་སྐྱོ། ང་ཚོ་ལ་རྟག་ཏུ་དབང་ཐུབ་པ་ནི་ཅི་ཡང་མི་འདུག་པས། ངས་ཁྱོད་ལ་བདེ་སྐྱིད་ཀྱི་འཚོ་བ་ནི་རང་ཉིད་ཀྱིས་རོལ་ཐུབ་པའི་སྨོན་ལམ་རྣམ་དག་ཅིག་འདེབས་པ་ལས། ངས་ཁྱོད་ལ་རྟག་བརྟན་གྱི་བདེ་བ་ཞིག་འབུལ་མ་ཐུབ།