ལོ་ཟླ་ནད་པ་དེས་འཚོ་བ་ནད་པར་སྐྱེས་ཉིན། མི་ཚེ་འདི་རིང་ཡང་ཐུང་ཡང་སྨན་བཅོས་ཀྱི་གོ་རིམ་ཞིག་རེད།དགའ་སྡང་སྐྱོ་འཇིགས་དང་འདོད་ཆགས་ཞེ་སྡང་གི་ཁ་རླངས་ཁྲོད།འཚོ་བར་སྐྱེས་པ་ཡང་དོན་སྙིང་ལྡན་པ་ཞིག་ཅི་ལ་མིན།ལོ་ཟླས།འཆི་མེད་རིལ་བུ་བཞིན་དྲན་ཤིང་གི་རྡོ་རིང་བཞག་ནས་སོང་།

གཙང་པོ་ཇི་ལྟར་བཞུར་བ་བཞིན།ཆུང་ཆུང་གི་རྩེད་ར་སྒྲུག་པ་ནས་ས་རྡུལ་དང་རླུང་དམར་འགམ་ཞིང་།མེ་ཏོག་དང་འཇའ་ཚོན་བདས།མཁའ་ཡི་མེ་ཏོག་དང་ས་ཡི་འཇའ་ཚོན།ལོ་ཟླས་ཁྲིད་ནས་ཉིན་མཚན་གྱི་དཀར་ནག་འགྲེལ་ཞིང་།འགྲུལ་བཞུད་ཀྱི་རྐང་རྗེས་བཞག། རྐང་རྗེས། ཕ་ཡུལ་གྱི་ཞོགས་པར་ཡོད།ཞོགས་པའི་ཁ་བ་དཀར་པོའི་ཁྲོད་ན་ཡོད།

དགུན་ཟླ་ཚེས་སོང་། ཕྱི་རོལ་ཏུ་ཁ་བ་སྲབ་མོ་ཞིག་བབས། ཁ་བའི་ཐོག་ཏུ་བྱེའུ་འགས་རྒུམ་བུ་འཐུ་བཞིན་འདུག། གློ་བུར་དུ།ཚ་བོ་སྔུན་དུ་ཡོང་སྟེ། ཨ་ཁུ་ཅི་བྱེད་ཀྱིན་ཡོད།མི་འཁྱག་ནི་ཨེ་རེད་ཟེར།ངས་ད་གཟོད་ཁ་བའི་ཁྲོད་དུ་ལག་རྗེན་གྱིསནད་ཅེས་པའི་ཡིག་འབྲུ་ཞིག་བྲིས་འདུག་པ་ཚོར། ལོ་ཟླ་འདིར་རྨ་ཁ་མེད་པའི་ན་ཟུག་ཅི་ཞིག་ཐེབས་མིན་ལའང་འདང་རྒྱག་བྱུང་།

སྣང་བའི་ཕྱི་ནང་བརྒལ་བའི་འཚོ་བའི་བྱེའུ་དེ་དག་སྔར་ནས་འཕུར་འདུག། འཆར་ཡན་གྱི་རྨི་ལམ་འཐུས་ནས་ཡུན་རིང་སོང་མཐར།བདག་གི་ནམ་མཁའ་དང་ནམ་མཁའི་མཐའ་ན་རང་སྣང་གི་ཉི་ཟླ་ཡོད།འདི་ནི་མངར་ལ་སྐྱུར་བའི་འཚོ་བ་ཡིན།འཚོ་བའི་གཙང་པོ་ཞེ་ལ་ཆགས་ཤིང་སེམས་སུ་བཞུར་ཚུལ་ཡང་ཡིན།

སེམས་ངོ་ཟིན་ཙམ་ནས་བཟུང་།ཕ་ཡུལ་དུ་ནད་པ་ཧ་ཅང་མང་།ང་ཕ་ཡུལ་དུ་ཡོད་པས།ཕ་ཡུལ་གྱི་ནད་པ་ང་ཡིན།ངས་ཡུན་རིང་ཞིག་ལ།ནད་གཞི་ཤེས་མཁན་གྱི་སྨན་པ་ཞིག་བཙལ་མྱོང་།བཙལ་ནས་ཉིན་གྱིས་ཞག་དེད་ཅིང་ཟླ་ཡིས་ལོ་ཟོས་ནས་ཡོང་།ད་ཚོད་ཅིག་ལ།བསམ་བློ་བཞི་གསུམ་བཅུ་གཉིས་བཏང་བ་དང་།བློ་རྩེ་ཉི་ཤུ་རྩ་ལྔ་བསྒྲིམས་མཐར།ཕུགས་བསམ་ཁྲོད་ཀྱི་སྨན་པ་རང་ཉིད་ཡིན་འདུག། ཤི་གསོན་གྱི་མཐའ་ལ་ཐུག་ཡང་།འཚོ་བ་གླུ་རུ་ལེན་པའི་ང་ཚོ་ཚང་མ་ཡིན་འདུག།