—ཀྲུང་གོ་གུང་ཁྲན་ཏང་བཙུགས་ནས་ལོ་ངོ་བརྒྱ་འཁོར་བའི་འཁྲུངས་སྐར་ལ།

དཀའ་ཚེགས་ཆེ་བའི་ལོ་ཟླ་རྫོགས་མེད་ཅིག་རྒྱབ་ལ་བཞུད་པའི་དེ་རིང་།འོད་ཀྱིས་གོང་བུ་ཞིག་སེར་ལམ་ལམ་དུ་ཤར་བྱུང་།འདི་ནི་རྒྱལ་ཁའི་འཁྲུངས་སྐར་དུ་སླེབས་པའི་གཟི་བྱིན་གྱི་ལོ་བརྒྱ་ཡིན།རྔུལ་ཆུས་བརླན་པའི་དུས་རབས་ཤིག་ལ་བཞི་ཤད་བཀོད་པའི་སྐབས་འདིར།རྟག་བརྟན་གྱི་བདེ་སྐྱིད་ཅིག་རྒོད་པོ་ལྟར་འཕུར་བྱུང་།འདི་ནི་ས་ཆེན་གྱི་ཟེ་བ་སྒུལ་བའི་སྤོབས་སེམས་ཀྱི་ལོ་བརྒྱ་ཡིན།

འདས་ཟིན་པའི་བགྲང་བྱ་བརྒྱ་ཡི་གོ་རིམ་ནི།ཕོ་རབ་ཅིག་གི་སྙིང་སྟོབས་ལ་བརྒྱུས་པའི་ཀི་རྒྱང་དེ་ཡིན་ལ།ཀི་སྒྲ་དེ་ཡི་གནམ་སའི་བར་སྣང་འགང་པར་བྱས་མྱོང་ཞིང་།འགྲན་ཟླ་བྲལ་བའི་སྤོབས་པ་དེ་དག་གིས་མཐའ་མི་མངོན་པའི་སྐམ་ས་ཆེན་མོ་འདིར།ཡིད་ཆེས་དང་སྙིང་སྟོབས།མདུན་བསྐྱོད་སོགས་ཀྱིས་བཞུད་ལམ་གསར་བ་ཞིག་དལ་གྱིས་ཕྱེས་བྱུང་།གཞན་གྱི་གཉའ་གནོན་དང་བཙན་འཛུལ་གྱི་མེ་དཔུང་དྲག་ཏུ་འབར་རུང་།ཞུམ་མེད་ཆོད་སེམས་བརྟན་ཅིང་དཀའ་སྡུག་ཕྲག་པར་ཁུར་བའི་རླབས་ཆེན་གྱི་མི་བུ་དག་གིས་རྒྱལ་ཁབ་ཅིག་གི་སྣང་བརྙན་ས་སྒང་འདིར་གསོན་དུ་བཅུག་ལ།མི་རིགས་ཤིག་གི་ལམ་ཁ་བདེ་བའི་ཐང་དུ་བསྒྱུར།

ལོ་རྒྱུས་ཀྱི་གླེགས་བམ་སྟུག་པོའི་ཤོག་ལྷེ་རེ་རེ་དལ་གྱིས་ཀློག་དུས།ང་ཚོས་ད་གཟོད་མདུན་ཕྱོགས་ཀྱི་ལམ་ཆེན་དེ་ནི་དཀའ་སྡུག་གི་ཀློང་ནས་ཐོབ་པའི་འབྲས་བུ་ཞིག་ཡིན་པ་ཤེས་ཤིང་།ང་ཚོའི་ད་ལྟའི་བདེ་སྐྱིད་ཀྱི་ཉི་གཞོན་ནི་འདས་ཟིན་པའི་རླབས་ཆེན་གྱི་གུང་ཁྲན་ཏང་མི་རྣམས་ཀྱིས་དཀའ་སྡུག་གི་ཀློང་ནས་འབད་འཐབ་བྱས་ལ།རང་སྲོག་བློས་བཏང་གི་སྙིང་སྟོབས་ལས་བསྐྲུན་པ་ཡིན་པ་ཡིད་ལ་ངེས་བྱུང་།རྒྱབ་རི་བཞིན་འགྱིང་བའི་མི་བུ་དེ་དག་གིས་བདེན་དོན་གྱི་མེ་ལོང་ངོས་སུ་བརྐོས་བའི་ལེགས་བྱས་ཀྱི་བཀོད་པ་རེ་རེ་ནི་ད་ལྟའི་དུས་འདིའི་མཛད་བཟང་གི་མེ་ཏོག་ཕོན་པོ་དེ་ཅི་ལ་མིན།

ལོ་ཟླའི་བསྔགས་བརྗོད་ཀྱི་ཏོག་དང་ང་རྒྱལ་གཟི་བྱིན་གྱི་དཔལ་དུ་སྦྲུམ་པའི་ལོ་ངོ་བརྒྱ་ནི་འཕེལ་རྒྱས་དང་རེ་བས་ཁེངས་བའི་དུས་ཚོད་ཅིག་ཡིན་པར་མ་ཟད།གཉའ་གནོན་དང་བཤུ་གཞོག་གི་ངང་ནས་བསྐྱལ་བའི་ལོ་ཟླ་ཞིག་ཀྱང་ཡིན། གསུབ་མེད་དྲན་ངོས་ཀྱི་རི་མོ་འདི་ལས་ལོ་ངོ་བརྒྱ་ཡི་ལང་ཚོའི་གཟི་བྱིན་རྡོ་རིང་བཞིན་རྔམ་བརྗིད་ཀྱིས་འགྱིང་དུ་བཅུག་ཡོད་པས།བཞུད་ཟིན་པའི་དཀའ་ཁག་དང་སྡུག་རུས་མཐའ་དག་གིས་ད་ལྟའི་དུས་འདིར་བདེ་སྐྱིད་ཀྱི་སྐལ་བ་བཟང་པོ་ཞིག་འུ་ཅག་གི་འཚོ་བའི་ཀློང་རིམ་ན་རྡོལ་དུ་བཅུག་ཡོད་པ་མ་ཡིན་ནམ།

མཚར་སྡུག་དང་རེ་སྨོན་གྱི་ཀློང་ནས་ལོ་ངོ་བརྒྱ་ཡི་འཁྲུངས་སྐར་བསུ།འབྱོར་ཕྱུག་དང་དམངས་གཙོའི་རླབས་རྒྱུན་གྱིས་གཡོག་ཡོད་ཅིང་།རིག་གཞུང་དང་འཆམ་མཐུན་གྱི་བསིལ་རླུང་གང་སར་ཁྱབ།འདི་ནི་ལོ་ངོ་བརྒྱ་ཡི་མཛེས་སྡུག་གི་གོམ་སྟབས་ཡིན་ལ།ལོ་ལྔའི་འཆར་འགོད་བཅུ་བཞི་བའི་དབུ་ཁྱུད་ཀྱང་ཡིན།དེའི་ཕྱིར་མེས་རྒྱལ་རླབས་ཆེན་བསྐྱར་དར་གྱི་བགྲོད་ལམ་སྟེང་གི་ལམ་ཚད་རྡོ་རིང་མཚོན་པའི་ལོ་འདིར།ང་ཚོས་སྤོབས་པའི་དར་ཆ་མཐོ་རུ་བསྒྲེངས་ནས་ལོ་བརྒྱའི་འཁྲུངས་སྐར་ལ་རྟེན་འབྲེལ་ཞུ་བ་དང་ལོ་རྒྱུས་ཀྱི་དུས་རིམ་འདིར་རང་ཉིད་ཀྱི་བློ་གྲོས་དང་སྟོབས་ཤུགས་མེས་རྒྱལ་གྱི་ཆེད་དུ་འབུལ།འདི་ནི་ལོ་རྒྱུས་ཀྱིས་ང་ཚོར་སྤྲད་པའི་འགན་འཁྲི་ཡིན་ལ།དུས་རབས་ཀྱིས་ང་ཚོར་བཏོན་པའི་རེའང་ཡིན་ནོ།།