མི་དམངས་དྲ་བའི་འཕྲིན། ཉེ་ཆར། རྒྱལ་ཁབ་སྨན་བཅོས་འགན་བཅོལ་ཅུས་ཀྱིས《2021ལོའི་རྒྱལ་ཁབ་ཀྱི་སྨན་བཅོས་འགན་བཅོལ་གྱི་སྨན་རྫས་དཀར་ཆག་ལེགས་སྒྲིག་ལས་དོན་ཇུས་གཞི》ཞེས་པ་ཁྱབ་བསྒྲགས་བྱས་པ་དེས་རེས་སྐོར་གསར་པའི་རྒྱལ་ཁབ་ཀྱི་སྨན་བཅོས་འགན་བཅོལ་གྱི་སྨན་རྫས་དཀར་ཆག་ལེགས་སྒྲིག་ལས་དོན་དངོས་སུ་སྤེལ་འགོ་ཚུགས་པ་མཚོན་ཡོད་པ་རེད། འོ་ན་རེས་སྐོར་གསར་པའི་དཀར་ཆག་ལེགས་སྒྲིག་ལ་བཀྲག་མདངས་འཚེར་ས་གང་དག་ཡོད་དམ།
   ཀྲུང་གོའི་འཕྲོད་བསྟེན་སྲིད་ཇུས་དང་དོ་དམ་སློབ་ཚོགས་ཀྱི་ཚོགས་མི་ཡའོ་ཡུས་ཀྱིས། སྐྲན་ནད་འགོག་པའི་སྨན་རྫས་ཁག་གཅིག་དང་།གཅོང་ནད་སྨན་བཅོས་བྱེད་དུས་འགྲོ་གྲོན་ཅུང་ཆེ་བའི་སྨན་ཁ་ཤས་དེའི་ནང་ཚུད་པ་མ་ཟད། ད་དུང་མཐོང་དཀོན་པའི་ནད་ཐད་ཀྱི་སྨན་དང་བྱིས་པའི་ཚན་ཁག་གི་སྨན་ཡང་གཙོ་གནད་ལེགས་སྒྲིག་གི་ཁྱབ་ཁོངས་སུ་བཅུག་ཡོད། གཙོ་བོར་སྨན་བཅོས་ཀྱི་ཕན་ནུས་གཏན་ཁེལ་བྱུང་བ་དང་སྨན་བཅོས་ཀྱི་ཕན་ནུས་ཅུང་བཟང་བ་དང་། ཕྱོགས་གཞན་ཞིག་ནི་རིན་གོང་ཅུང་མཐོན་པོ་མིན་པར་བསམ་གཞིགས་བྱས་པ་ཡིན། ད་ལོའི་བཀྲག་མདངས་འཚེར་ས་ཆེ་ཤོས་ནི་སྨན་རིགས་གསར་པ་ཁག་གཅིག་དཀར་ཆག་གསར་པའི་ནང་བཅུག་པ་དེ་རེད། སྨན་བཅོས་འགན་བཅོལ་ཅུས་ཀྱིས་སྨན་དེ་དག་ཐེངས་གཅིག་གིས་ལེགས་སྒྲིག་དཀར་ཆག་གསར་པའི་ནང་བཅུག་པ་བརྒྱུད་རྒྱལ་ཡོངས་ཀྱི་སྨན་ཁང་གིས་སྨན་དེ་དག་སྤྱོད་ཐུབ་པར་སྐུལ་མ་གཏོང་བ་དང་། རྒྱལ་ཡོངས་ཀྱི་མི་སེར་ཚང་མར་སྨན་གསར་པ་དེ་དག་གི་ཕན་བདེ་འཐོབ་པ་བྱེད་པའི་ཆེད་དུ་ཡིན་ཅེས་བཤད། 
   རིགས་གཅིག་མཁས་ཅན་གྱིས། ད་ཐེངས་དཀར་ཆག་ནང་ལེགས་སྒྲིག་བྱེད་རྒྱུའི་སྨན་རྫས་ནང་2016ལོའི་ཟླ་1ཚེས་1ཉིན་ནས་2021ལོའི་ཟླ་6ཚེས་30ཉིན་བར་རྒྱལ་ཁབ་སྨན་རྫས་ལྟ་སྐུལ་དོ་དམ་སྡེ་ཚན་གྱི་ཆོག་མཆན་ཐོབ་པ་བརྒྱུད་ཁྲོམ་རར་བཏོན་པའི་ཀུན་སྤྱོད་གསར་པའི་སྨན་རྫས་དང་། ནད་འཁེལ་སྨན་རྫས་སམ་ཡང་ན་ནུས་པ་གཙོ་བཅོས་ལ་འགྱུར་ལྡོག་ཆེན་པོ་བྱུང་བའི་སྨན་རྫས་དང་དེ་བཞིན་དུ་ཏོག་གསར་གློ་ཚད་དང་འབྲེལ་བ་ཡོད་པའི་དབུགས་ལམ་མ་ལག་གི་ནད་གཞི་སྨན་བཅོས་བྱེད་པའི་སྨན་ཚུད་ཡོད་ཅེས་བཤད་པ་རེད།
   སྨན་བཅོས་འགན་བཅོལ་སྡེ་ཚན་གྱི་ངོས་ནས་བརྗོད་ན། ཕྱོགས་གཅིག་ནས་སྨན་རྫས་དེ་བས་མང་བ་དང་དེ་བས་ཡག་པ་ཁྲོམ་རར་སྔ་ཙམ་འདོན་པ་དང་། གང་མགྱོགས་ངང་སྨན་བཅོས་འགན་བཅོལ་གྱི་གཏོང་སྤྲོད་ཁྱབ་ཁོངས་ནང་འཇུག་པ། སྔ་ཙམ་ནས་ནད་པར་ཕན་པ་ཐོབ་པ་བཅས་བྱ་རྒྱུའི་རེ་བ་ཡོད། ཕྱོགས་གཞན་ཞིག་ནས་རང་རྒྱལ་གྱི་གཞི་རྩའི་སྨན་བཅོས་འགན་བཅོལ་གྱི་མ་དངུལ་གྲབས་གསོག་ལ་ཚད་གཞི་ཡོད་ཅིང་། 2020ལོའི་ཡུལ་མིའི་སྨན་བཅོས་འགན་བཅོལ་གྱི་མི་རེའི་ཆ་སྙོམས་མ་དངུལ་གྲབས་གསོག་སྒོར་800ཙམ་ལས་མེད་པ་དེའི་གསུམ་ཆ་གཉིས་ནི་ནོར་སྲིད་ཀྱི་ཁ་གསབ་ལས་བྱུང་བས་ངེས་པར་དུ“གཞི་རྩའི་འགན་ལེན་བྱེད་པའི”ལམ་ལུགས་ཀྱི་ངེས་གནས་ཁོང་དུ་བརྟན་པོ་ཆུད་པ་བྱས་ནས། ནད་ཐོག་སྨན་བཅོས་ཀྱི་རིན་ཐང་མཐོ་བ་དང་། རིན་གོང་ལུགས་དང་མཐུན་པ། གཞི་རྩའི་སྨན་བཅོས་ཀྱི་དགོས་མཁོ་སྐོང་ཐུབ་པ་བཅས་ཀྱི་སྨན་རྫས་གཙོ་གནད་ཐོག་དཀར་ཆག་ནང་འཇུག་དགོས་པ་རེད།
    དོ་སྣང་བྱེད་དགོས་པ་ཞིག་ལ། ནད་ཐོག་གི་རིན་ཐང་དང་། འགྱུར་འབྱུང་ངན་པ། སྨན་རྫས་ཀྱི་དཔལ་འབྱོར་རང་བཞིན་སོགས་ཀྱི་རྒྱུ་རྐྱེན་ལ་ཕྱོགས་བསྡུས་ཀྱིས་བསམ་བློ་བཏང་བ་དང་། དཔྱད་དཔོག་བྱས་པ་བརྒྱུད་ཕན་ཆ་ལས་ཉེན་ཁ་ཆེ་བའི་སྨན་རྫས་ཕྱིར་འཐེན་བྱ་རྒྱུ་རེད། ཀྲུང་གོའི་འཕྲོད་བསྟེན་སྲིད་ཇུས་དང་དོ་དམ་སློབ་ཚོགས་ཀྱི་ཚོགས་མི་ཡའོ་ཡུས་ཀྱིས། རིགས་གཅིག་ནི་རྒྱལ་ཁབ་སྨན་རྫས་ལྟ་སྐུལ་དོ་དམ་ཅུས་ཀྱིས་ཆོག་མཆན་ཡི་གེ་མེད་པར་བཟོས་པ་དང་རྩིས་མེད་དུ་བཏང་བའི་སྨན་རྫས་དང་། རིགས་གཉིས་ནི་སྔོན་ཆད་བེད་སྤྱོད་བྱེད་སྐབས་སྨན་བཅོས་ཀྱི་ནུས་པ་དེ་ཙམ་ཡག་པོ་མེད་པའི་སྨན་ཁ་ཤས་རེད། གཞན་ཡང་། སྨན་བཅོས་ནུས་པ་དེ་ཙམ་གསལ་པོ་མེད་པ་དང་རིན་གོང་ཧ་ཅང་མཐོ་བའི་སྨན་ཁ་ཤས་ཏེ། དཔེར་ན་བཅོས་ཡུན་གཅིག་གི་ནང་སྒོར་ཁྲི་10ཡན་གཏོང་དགོས་པ་དག་རེད། སྨན་དེ་དག་གཙོ་གནད་དུ་བཟུང་ནས་དོ་སྣང་བྱེད་ངེས་རེད། རྒྱལ་ཡོངས་ཀྱི་སྨན་ཁང་གིས་བེད་སྤྱོད་གཏོང་རིམ་ནང་གྲངས་འབོར་ཧ་ཅང་ཉུང་བའི་སྨན་རྫས་ཡིན་ཡང་ཕྱིར་འཐེན་བྱ་རྒྱུ་རེད།