གཡུ་སྔོན་མོའི་ནམ་མཁའ།  དངུལ་དཀར་པོའི་ཆུ་འཛིན།  གསེར་སེར་པོའི་ཉི་མ།   གངས་རི་ཤེལ་གྱི་མཆོད་རྟེན།   མཚོ་མོ་གཡུ་ཡི་མེ་ལོང་།   ས་གཞི་གཏེར་གྱི་བང་མཛོད།   རྩི་ཤིང་མེ་ཏོག་ར་བ།   འབྲུ་དྲུག་ནས་ཀྱི་ཕ་ས།   མཐོ་སྒང་ནོར་ནག་དར་ཡུལ་ཏེ་འདི་དག་ནི་ཁོ་བོ་ཡན་ལག་བརྒྱད་ལྡན་གྱི་གངས་ཆུ་བསིལ་མ་དང་འཚོ་བཅུད་ཕུན་སུམ་ཚོགས་པའི་མར་རྩམ་ཞིམ་པོའི་དྲིན་གྱིས་ཡོངས་སུ་བསྐྱངས་པའི་མ་ཡུམ་གངས་ལྗོངས་ཀྱི་ཕྱི་ཚུལ་ཡིད་དབང་འཕྲོག་པ་རྣམས་ཡིན་ལ།  འགྲོ་བ་མིའི་རིགས་སུ་གྱུར་པ་ཐམས་ཅད་ཀྱིས་ཡིད་སྨོན་འཆོར་ཞིང་ཡང་ཡང་ཕེབས་བཞུད་བྱེད་པའི་རྒྱུ་མཚན་དང་པོ་ལགས།
ལོ་རྒྱུས་ཀྱི་ཆུ་མོ་རིང་།  རིག་གནས་ཀྱི་བྲོ་བ་ཆེ།  ཡུལ་སྲོལ་གྱི་རྣམ་གྲངས་མང་།  དྲང་བདེན་གྱི་གོམས་གཤིས་བཟང་།  ཆོག་ཤེས་ཀྱི་ནོར་བུ་མཛེས།  རྒྱུ་འབྲས་ཀྱི་དབྱེ་ཞིབ་མཁས།  རྣམ་དཔྱོད་ཀྱི་རིག་པ་རྣོ་བ་སྟེ་འདི་དག་ནི་སྲིད་འདིར་རྒྱུ་རྫས་ཀྱིས་ཉོ་ཐབས་བྲལ་བའི་མ་ཡུམ་གངས་ལྗོངས་ཀྱི་ནང་སྙིང་རྣམས་ཡིན་ཏེ་འགྲོ་བ་མིའི་རིགས་སུ་གྱུར་པ་ཐམས་ཅད་ཀྱིས་རྟོགས་འདོད་ཆེ་ཡང་འགྲན་བཟོད་མེད་པའི་རྒྱུ་མཚན་གཉིས་པ་ལགས།  མཐོང་ན་སྤྲོ་བ་བསྐྱེད་ཅིང་ཐོས་ན་ཡིད་འགུལ་ཐེབས་པ།  མྱོང་ན་མི་ཚེའི་དོན་འབྲས་ཪྙེད་པའི་བདེ་ལྡན་གྱི་ཞིང་ཁམས་འདིར་ད་དུང་འཛམ་བུ་གླིང་གི་སྐྱེ་བོ་མཁས་བླུན་བར་མ་ཐམས་ཅད་ཀྱིས་ནམ་ཡང་རྟོགས་ཐབས་བྲལ་ཞིང་བསམ་ཡུལ་འདས་པའི་གསང་བ་གསུམ་པ་ཞིག་མཆིས་པ་སྟེ།   གངས་ལྗོངས་མ་ཡུམ་གྱི་སྐུ་གཟུགས་ཡོངས་རྫོགས་སུ་སེམས་ཁོང་གི་དད་པའི་རྟེན་ས།   དགོས་འདོད་ཀྱི་བདེ་འབྱུང་ནོར་བུ།   རང་སེམས་གསོ་བའི་མ་མ།  ཐར་འདོད་རྣམས་ཀྱི་གྲུ་བཟང་སྟེ་ནང་ཆོས་བདུད་རྩི་མངར་མོས་ཐིམ་གྱི་ཡོད་པས་དེའི་བྱིན་བརླབས་ལས་རི་ཀླུང་སྲོག་ཆགས་ཀུན་ལ་ཐུན་མོང་མ་ཡིན་པའི་གསོན་ཉམས་ཤིག་ཆགས་ཀྱི་ཡོད།   ལྷག་པར་དེའི་བུ་རྒྱུད་རྣམས་ལ་བསོད་ནམས་དབང་ཐང་ཆེ་ཞིང་།   རང་རྒྱུད་ཞི་ཞིང་དུལ་བ།