དཔྱིད་རླུང་འཇམ་པོས་ལན་བུ་དཀྲོལ་གྱིན་ལྷོད་ཤུར་ཤུར་གྱིས་ལྡང་ཡོང་ན།།

སྨིག་རྒྱུའི་འོག་གི་མེ་ཏོག་གློ་ཁ་དལ་ལྷོད་ལྷོད་ཀྱིས་སྐྱེས་ཡོང་ན།།

འདི་ནས་རྒྱང་རིང་ཡུལ་ཕྱོགས་ཤིག་གི་ཆུང་གྲོགས་དེ་ཚོ་དྲན་ཡོང་ན།།

སྐྱོ་བ་སྨུག་སྤྲིན་ཁོར་མོ་འདྲ་བོས་གངས་དཀར་སེམས་པ་གཡོག་ཡོང་ལགས།།

དེང་མའི་ཁ་འབྲས་བྱུར་དམར་འདྲ་བོར་ལོ་ཟླས་གས་ཁ་བརྟོལ་ཡོང་ན།།

དེ་དུས་ཁྲེལ་གཞུང་ཆུ་མོ་འདྲ་བོ་འཁོར་བའི་ཐང་ནས་འཛད་ཡོང་ན།།

ན་ཚོད་ལྕང་མའི་འཁྲི་ཤིང་འདྲ་བོར་དུངས་སེམས་ཆར་ཆུས་གདུང་ཡོང་ན།།

དམ་ཚིག་ཤེལ་གྱི་བུམ་པ་འདྲ་བོར་སྐྱོ་བའི་རྡུལ་དག་ཆགས་ཡོང་ལགས།།

སྟོད་ཀྱི་རི་ནས་རི་དྭགས་སྐོར་ཞིག་རྡུལ་འཚུབ་འཚུབ་ཀྱིས་འདྲོག་ཡོང་ན།།

སྨད་ཀྱི་མཚོ་ནས་ངང་ཆུང་ཟུང་ཞིག་ལྡེམ་ལྡེམ་ལྡེམ་གྱིས་འཕུར་ཡོང་ན།།

ང་ཡི་ལས་ཀྱི་སྨུག་ཆུང་ཡུ་མོ་གར་འགྲོ་འདིར་སྡོད་མེད་ཡོང་ན།།

ཤིན་ཏུ་གཉོམ་པའི་མིག་ཟུང་ལས་ནི་མཆི་མའི་གཙང་པོ་བྲུག་ཡོང་ལགས།།

གཡུ་ལུང་ཁ་ཡི་རྟ་ཕོ་རྐྱང་རྒོད་རྟོད་ཐག་བཅད་ནས་ཤོར་ཡོང་ན།།

རྔོག་མའི་ཚེ་མདུད་རླུང་གིས་སྐྱོད་ཀྱིན་ཐུར་མདའ་དྲུད་ནས་འདྲོག་ཡོང་ན།།

ན་ལུང་ནང་གི་རྟ་ཁྱུ་དེ་ཚོ་ཕྱི་དྲོའི་དུས་ལ་འཚེར་ཡོང་ན།།

བྲེལ་རྟབ་རྨིག་སྒྲ་རླུང་ལ་བརྒྱུས་ཏེ་འདུ་བྲལ་རབ་ཁ་བརྒལ་ཡོང་ལགས།།

ལས་དང་ལམ་གྱི་འཁྲེན་པ་མེད་ཀྱང་ཐུན་མཚམས་དུས་ལ་རྨིས་ཡོང་ན།།

ཆུང་ནས་འདྲིས་པའི་ཆུང་གྲོགས་མིན་ཡང་འདང་གི་རུ་མ་འཁྱིལ་ཡོང་ན།།

ཚེ་རབས་ལས་ཀྱི་རྙེད་པ་ཡིན་ཡང་ཕྱིན་ཆད་འགྱོད་པ་སྐྱེས་འོང་ན།།

ལས་འཕྲོ་མེད་པའི་བཤད་འཕྲོ་དེ་དག་སྐྱེ་བ་འདི་ལ་དྲན་ཡོང་ལགས།།

སེམས་ལ་བརྐོས་པའི་དམ་ཚིག་རི་མོ་བསུབ་པ་མེད་ཅེས་སྨྲས་ཡོང་ན།།

འདང་ལ་འཐིམ་པའི་དངུལ་དཀར་གདུ་བུ་འབོར་བ་མེད་ཅེས་ཞུས་ཡོང་ན།།

ཚིག་གིས་སྟོང་བའི་དྲན་པ་འདི་ཚོ་དཔྱིད་ཟླ་མཐའ་མས་དཀྲོལ་ཡོང་ན།།

ངག་གི་མེ་ཏོག་སྙིམ་པ་གང་དེར་འདུ་བྲལ་བ་མོས་གདུང་ཡོང་ལགས།།

གང་སར་ཚེས་པའི་དཔྱིད་ཀྱི་དཔལ་མོ་བསམ་པའི་སྟེང་དུ་ཚེས་ཡོང་ན།།

དཔྱིད་ལ་བཞད་པའི་ཨུག་ཆོས་དཀར་པོ་སྙེ་མ་དང་བཅས་ལྡེམ་ཡོང་ན།།

ངང་བའི་ཚོགས་ཀྱང་མགྲིན་པ་གཤིབ་སྟེ་གླུ་དང་གར་ལ་ཆགས་ཡོང་ན།།

སོ་སོའི་མགོ་ཡི་སྤྲིན་དང་སྨུག་པ་ལམ་དང་ལམ་ནས་འཕྲད་ཡོང་ལགས།།

རྩོམ་པ་པོ། ཚོར་རྐང་།

རྩོམ་སྒྲིག་པ། མགར་རྒྱལ་སྲས།