ཉེ་ཆར། དཀར་མཛེས་ནོར་གནག་ཐོན་ལས་ཚན་རྩལ་ཤེས་ལྡན་མི་སྣའི་གསར་གཏོད་ཚོགས་པ་དར་མདོར་བཙུགས་ཡོད། ནོར་གནག་ནི་གོ་ལ་ཧྲིལ་པོའི་མཐོ་སྒང་གྲང་ངར་ཆེ་བའི་ཆ་རྐྱེན་དང་འཚམ་པའི་སྲོག་ཆགས་རིགས་ཆེ་གྲས་ཤིག་ཡིན་ལ། མཚོ་བོད་མཐོ་སྒང་ཡོངས་ཀྱི་ཤ་ཡི་ཐོན་ལས་འཕེལ་རྒྱས་གཏོང་བའི་རྨང་གཞི་གལ་ཆེན་ཞིག་ཀྱང་རེད།

རང་ཁུལ་ནི་ནོར་གནག་གི་ཐོན་ཁུངས་ཆེན་པོ་ཞིག་ཡིན་ཞིང་། བརྒྱད་ཟིལ་ནོར་གནག་དང་ཁྲོམ་ཐར་ནོར་གནག་ནི་རིགས་རྒྱུད་ཧ་ཅང་དཀོན་པོ་ཡིན་པས་ཐུན་མོང་མ་ཡིན་པའི་ལེགས་ཆ་ལྡན་ཡོད། དམངས་འཚོའི་ཐོན་ལས་གལ་ཆེན་ཞིག་ཡིན་པའི་ནོར་གནག་ནི་རང་ཁུལ་གྱི་ཞིང་འབྲོག་པའི་ཡོང་འབབ་འཕར་ས་དང་། ཞིང་སྡེའི་དཔལ་འབྱོར་འཕེལ་རྒྱས་གཏོང་བའི་ཐབས་ལམ་གལ་ཆེན་ཞིག་ཀྱང་ཡིན། ད་སྔར་རང་ཁུལ་གྱི་ནོར་གནག་ཐོན་ཁུལ་གཙོ་བོ་སྲོལ་རྒྱུན་འབྲོག་ལས་དེང་རབས་འབྲོག་ལས་སུ་བསྒྱུར་རིམ་སྤོར་གྱི་འགག་རྩའི་དུས་མཚམས་སུ་འཕྲད་བཞིན་ཡོད་པ་དང་། ཚན་རྩལ་གྱི་འདེགས་སྐྱོར་དང་སྤུས་ཚད་མཐོ་རུ་གཏང་རྒྱུ་དེ་ཁ་ཚ་དགོས་གཏུག་གི་བྱ་བར་གྱུར་ཡོད།

ཤེས་རྟོགས་བྱུང་བར་གཞིགས་ན། དཀར་མཛེས་ནོར་གནག་ཐོན་ལས་ཚན་རྩལ་ཤེས་ལྡན་མི་སྣའི་གསར་གཏོད་ཚོགས་པ་དེ་ཁུལ་ཕྱུགས་རིགས་ཚན་རིག་ཁང་དང་ཁུལ་ཞིང་ལས་ཚན་རིག་ཁང་གིས་སྣེ་ཁྲིད་བྱས་ཏེ། གཙོ་བོ་ནོར་གནག་གསོ་སྤེལ་དང་རིམས་ནད་འགོག་བཅོས། གཟན་རྩྭ་གཟན་ཆག་ཞིབ་འཇུག་གསར་སྤེལ་སོགས་ལག་རྩལ་གྱི་དགོས་མཁོར་དམིགས་ནས་ཞིབ་འཇུག་གཏིང་ཟབ་དང་ལག་རྩལ་འགག་སྒྲོལ་བྱས་ཏེ་གྲུབ་འབྲས་འགྲེམ་སྟོན་དང་དཔེ་སྟོན་སྐུལ་ཁྲིད་ལ་སྐུལ་འདེད་བཏང་བ། དུས་མཚུངས་ཐོན་ལས་འཕེལ་རྒྱས་འཆར་འགོད་དང་ཐོན་སྐྱེད་ལག་རྩལ་ལ་མཛུབ་ཁྲིད་བྱས་ནས་ནོར་གནག་ཐོན་ལས་ཅན་གྱི་སྣེ་ཁྲིད་ཁེ་ལས་དང་། ཞིང་པའི་ཆེད་ལས་མཉམ་ལས་ཁང་། ཁྱིམ་ཚང་ཞིང་ར་སོགས་ཞིང་ལས་གཉེར་སྐྱོང་བྱེད་པོ་གསར་པའི་ཚན་རྩལ་ཞབས་ཞུ་ལ་ཤུགས་བརྒྱབ་སྟེ་ཆུ་ཚད་དེ་བས་མཐོ་བའི་ཚན་རྩལ་གསར་གཏོད་ལ་བརྟེན་ནས་མཐོ་སྒང་ཕྱུགས་ལས་ཀྱི་སྤུས་ཚད་གསར་པའི་ཐོན་སྐྱེད་ནུས་ཤུགས་འཕེལ་རྒྱས་གཏོང་ཐུབ་པ་དང་དཀར་མཛེས་ཁུལ་གྱི་རྒྱལ་ཁབ་རིམ་པའི་ནོར་གནག་ཐོན་ལས་འཛུགས་སྐྲུན་ལ་གཞོན་ནུའི་ཚན་རྩལ་གསར་གཏོད་སྟོབས་ཤུགས་ལེགས་སྐྱེས་སུ་འབུལ་རྒྱུ་རེད།

ནོར་གནག་ཐོན་ལས་གསར་གཏོད་ཚོགས་པ་བཙུགས་རྗེས་དཀར་མཛེས་ཁུལ་གྱི་ནོར་གནག་ཐོན་ལས་འཛུགས་སྐྲུན་གྱི་འབྲེལ་ཐག་ཧྲིལ་པོར་དམིགས་ནས་ཚན་རྩལ་གསར་གཏོད་བྱེད་སྒོ་རབ་དང་རིམ་པ་སྤེལ་རྒྱུ་ཡིན་པ་རེད།།

ཡེ་ཤེས་ཀྱིས་བསྒྱུར།