བདེ་སྟོང་ཉམས་འགྱུར་རོལ་པ་ཟག་མེད་སྐུ།།

སྣང་སྟོང་ཆོས་དབྱིངས་འགག་པ་མེད་པའི་གསུང་།།

ཟབ་ཡངས་རྒྱ་མཚོའི་གཏེར་གྱུར་མཁྱེན་པའི་ཐུགས།།

ངག་དབང་དཔལ་གྱི་ལྷ་མོས་དུས་ཀུན་སྐྱོངས།།

སྤྲོས་བྲལ་སྒྱུ་མའི་ཡེ་ཤེས་རང་མདངས་ལས།།

འཆར་བའི་མེ་ལོང་ཟླ་ཤེལ་གསར་བའི་ཚེས།།

སྤྱན་རས་ཨུཏྤལ་འཛུམ་པའི་ཡིད་འཕྲོག་མ།།

ངག་རིག་དབྱངས་ཀྱི་རྒྱལ་མོ་ད་ཚུར་བྱོན།།

ངག་དབང་དབྱངས་ཀྱི་དགེ་མཚན་འོད་སྟོང་འབུམ།།

དབང་བསྐུར་གདམས་པའི་སྙན་བརྒྱུད་གཏེར་གྱུར་པ།།

དབྱངས་ཅན་རིག་པའི་འདོད་འཇོ་སེམས་དཔའ་མ།།

ལྷ་མོ་རིག་འཛིན་མྱུར་མ་དཔལ་མོར་འདུད།།

རབ་ཡངས་མཁྱེན་པའི་ནམ་མཁའ་ཏིལ་གྱི་གོང་། །

རབ་མང་ངག་རིག་སྟོང་གསུམ་རྡུལ་གྱི་ཁམས།།

རབ་དཀར་སྟོན་ཟླའི་སྤྲིན་ཕུང་གཅིག་འདུས་པའི། །

རབ་མཛེས་ཚངས་པའི་སྲས་མོ་ད་ཚུར་བྱོན།།

སྐུ་བཞིའི་གོ་འཕང་མཆོག་གི་བང་རིམ་ལ།།

སོར་རྟོག་ཤེས་རབ་བརྩེགས་པའི་སྣང་བ་ཆེ།།

གཉིས་མེད་ཉམས་འགྱུར་སྒྱུ་འཕྲུལ་དྲ་བ་ལ།།

ཤིན་སྦྱངས་ཤེས་པའི་རྟོགས་པ་ད་སྩོལ་ཅིག།

ཟབ་འཇམ་ཡང་བའི་ལྷ་ཡི་གོས་བཟང་གིས།།

སྤུད་པའི་དྲི་ཟའི་རོལ་བ་འབུམ་གྱི་གཟི།།

བཅོམ་པའི་དཀར་གསལ་ཟླ་བའི་ལང་ཚོ་མ།།

འཇམ་དབྱངས་མཉེས་པའི་དགའ་མ་ཁབ་ཏུ་རོལ། །

ཞལ་རས་ཟླ་བ་གཞོན་ནུའི་འཇོ་སྒེག་གིས།།

རབ་དཀར་བྱང་སེམས་པདྨོ་ལྷུག་པར་གྲོལ།།

ཉ་རྒྱས་ལང་ཚོ་རྫོགས་པའི་དཀྱིལ་འཁོར་ལྟར།།

ཆོས་དབྱིངས་ལྷ་མོས་མཛེས་པར་བྱིན་གྱིས་རློབས། །

འཕྲུལ་གྱི་སོར་རྩེ་འཁྱུག་པའི་གར་སྟབས་ཀྱིས།།

སྙན་འཇེབས་རྒྱུད་མངས་ཆོས་ཀྱི་རང་སྒྲ་བ།།

སྐྱེ་རྒུའི་ཡིད་འོང་བརྟན་པ་འཕྲོག་བྱེད་མ།།

མ་གཅིག་ཆོས་ཀྱི་བདག་མོས་ཤིས་པ་སྩོལ།།

དམིགས་མེད་བརྩེ་བའི་དབྱིག་གི་ནོར་འཛིན་མར། །

ངག་རིག་འདབ་སྟོང་བཞད་པའི་ཡོན་ཏན་གཏེར། །

མ་སྨད་རིན་ཆེན་བྱེ་བའི་དཔལ་སྟེར་མཁན།།

ངག་དབང་ལྷ་མོ་དགྱེས་བཞིན་གར་ལ་བྱོན།།

དབྱངས་ཀྱིས་སྙན་ལ་བཏབ་པའི་འགྱུར་ཁུག་དང་།།

ཁམས་གསུམ་ཟིལ་གནོན་གདངས་ཀྱི་སྙན་ཆ་བ།།

སྒྱུ་རྩལ་ཚིག་སྦྱོར་རིས་སུ་སྡེབ་པའི་འཇེབས།།

ངག་དབང་དབྱངས་ཅན་ལྷ་མོས་ལམ་སྣ་དྲོངས།།

བདེན་པའི་གཏམ་གྱི་བདུད་རྩིའི་དོག་པ་འབུམ།།

གེ་སར་རྡུལ་མང་བརྩེགས་པའི་གསེར་གྱི་མངལ།།

མིག་སྟོང་བགྲད་པའི་མི་ངོམས་སྙན་པའི་དབྱངས། །

ངག་གི་དབང་ཕྱུག་དཔལ་གྱི་ལྷ་མོས་སྲིངས།།

དྲང་པོར་བཏེགས་པའི་རྣམ་ཤེས་བསྡུས་གཟིགས་དང་།།

ཚ་གདུང་སྨན་པའི་བསིལ་གྲིབ་ཡོངས་འདུའི་ཤིང་།།

དམིགས་གཏད་གང་ལ་ཅི་འདོད་ཡིད་བཞིན་ནོར། །

ཚིག་རྒྱན་སྲོག་གི་དབྱངས་ཀྱི་བདག་མོར་འབོད།།

ཕུན་ཚོགས་བདུད་རྩིའི་སྙན་པ་གྲགས་པའི་ཆར།།

སྐལ་ལྡན་ཐར་འདོད་དྭངས་མའི་འཇུག་ངོགས་སུ། །

མ་ནོར་ལེགས་པའི་སྒོ་བརྒྱ་འབྱེད་པའི་མིག།

ཤེས་རབ་དཔལ་གྱི་བདག་མོས་དུས་ཀུན་སྲུངས།།

ཀུན་རྟོག་མུན་པ་རླུང་གིས་བཟའ་བའི་སེམས།།

ཐབས་ཤེས་འཕྲུལ་གྱིས་རྩེན་པའི་ཟློས་གར་ལུས།།

དཔྱད་འཇོག་འབྲེལ་བའི་སེམས་ཉིད་དྭངས་མ་ལ། །

ཤེས་རབ་སྣང་བའི་འོད་ཀྱིས་འགྲོ་རྣམས་ཟུངས།།

རྩེ་གཅིག་ཏིང་འཛིན་དམིགས་པའི་རྣལ་འབྱོར་གྱིས།།

བདག་མེད་སྟོང་ཉིད་ཉམས་རྟོགས་གོམས་པ་ལ།།

དྲང་བདེན་མངོན་གྱིས་བཙལ་བའི་ང་རོ་ཡིས།།

ངེས་དོན་གཏམ་གྱིས་འགྲིམ་པར་ལྷུར་ལེན་ཤོག།

དགའ་བདེ་ཆོས་ཀྱི་བུམ་བཟང་སྦྲང་རྩིའི་བཅུད།།

མེར་བའི་གདམས་ངག་ལྟ་བ་དབུ་མའི་མགུར།།

བསྔགས་པ་དོན་མཐུན་ཕུང་བོ་གཅིག་འདུས་པའི། །

རིག་བྱེད་ངག་རིག་འཛམ་གླིང་རྒྱན་དུ་ཆོས།།

བདག་བློ་དགའ་བའི་ཀུ་མུད་རབ་བཞད་ཅིང་།།

བདག་ཡིད་འཕོས་པའི་བློ་རྨོངས་རབ་འཇོམས་པ། །

བདག་སོགས་འཁོར་གྱི་ཉོན་མོངས་བསལ་ཕྱིར་དུ། །

བདག་གཞན་སྣང་བའི་ཤེས་རབ་འཕེལ་དུ་གསོལ། །

ཤེས་རབ་རབ་ཀྱི་ལྷ་ཆེན་མཁྱེན་པའི་གཏེར།།

ངག་དབང་དབང་གི་དབང་ཕྱུག་མཚོ་བྱུང་མ།།

མདོ་རྒྱུད་རྒྱུད་སྡེ་ཟུང་འཇུག་བདེ་ཆེན་ཁམས།།

མ་ལུས་ལུས་སེམས་ཆོས་ལ་སྒྱུར་བར་ཤོག།

ཚངས་དབྱངས་སྙན་པའི་གཞུང་བཟང་དར་བོ་ཆེ། །

ཕྲལ་སྦྱོར་ཚིག་གིས་བསྲིངས་པའི་གོས་བཟང་ཅན། །

དོན་གྱི་ཕོན་པོར་ཕྱུག་པ་མཛེས་པའི་རླབས།།

རིན་ཆེན་རིག་བཅུའི་སྙིང་པོ་ངག་རིག་རྒྱལ།།

བདེ་ཆེན་རྡོ་རྗེ་གླུ་ཡི་འགྱུར་ཁུགས་དང་།།

ཏིང་འཛིན་སྔགས་དྲུག་ཕྱག་རྒྱས་མ་བཏབ་རུང་། །

མི་ཕྱེད་དད་པས་ཕུལ་པའི་ཞུ་མཆིད་འདི།།

ཀུན་བཟང་སེམས་ཀྱི་མཆོད་སྤྲིན་ངོ་མ་ཡིན།།

དེ་ལྟར་སྣང་བའི་གཟུགས་རིས་ཚིགས་བཅད་འདི། །

ཚིག་སྦྱོར་སྙན་པའི་མཛེས་ཆ་མི་མངོན་རུང་།།

མ་བཅོས་སྨོན་པའི་ཕྱི་ནང་གསང་གསུམ་གྱིས།།

དབྱངས་ཅན་ལྷ་མོར་ཕུལ་བའི་མཆོད་པ་ལགས།།