2023-08-18
དོ་ཞག་ནམ་ཟླའི་ཙག་རླུང་རྒོད་དྲགས་པས། །
མི་སེམས་རླུང་གི་དར་ལྕོག་གཡོ་ནས་ཟེགས། །
སྣང་བའི་ཡོ་ལང་འཁྲུག་ནས་འདར་ཞིང་སྔངས། །
གདོང་ལ་མིག་ཆུ་བཏབ་པའི་ལན་ཆགས་ལྕི། །
སྨུག་པ་རི་ལུང་རྒྱུ་བའི་སྲིད་པའི་ཁམས། །
ལས་ཀྱི་ཕྱིར་མིག་འདི་ཡང་རྒྱང་ལ་བསྲིངས། །
དོ་ནུབ་ཟླ་བ་ཁེར་རྐྱང་སེམས་སུ་ལྷུང་། །
སེམས་ཀྱི་ཏིང་འཛིན་དཀྲོག་པའི་རི་དྭགས་མིག །
ཡིད་གཞུང་གཙང་པོའི་ངོགས་སུ་འཛུམ་ཁ་གྲོལ། །
སྙིང་རུས་པད་མའི་ཚལ་གྱི་མདངས་མཛེས་པ། །
ཆ་བྱད་དཀར་དམར་འཁྱུད་པའི་མཆུ་སྒྲོས་དེ། །
འཚོ་བའི་བྲང་གཞུང་ཁུད་ན་རྟག་ཏུ་འཛུམ། །
བདག་གི་ནམ་མཁའི་ངོས་ཀྱི་འཆར་སྣང་འདི། །
མཚན་ཞག་རྨི་ལམ་བརྒལ་བའི་རྟ་ཁྱུ་ཡིན། །
སྤྲིན་པ་ལྷོ་ལམ་ཞོགས་པའི་ངང་ཚུལ་དེ། །
དྲན་པའི་ལྟེང་ཀ་ཞུགས་ནས་ལྡིང་སྐོར་རྒྱག །
ལན་གཅིག་སྙིང་ལ་སིམ་པའི་ཡིད་ཀྱི་ངོར། །
སྐྱེ་བ་ཚེ་རབས་སྟོང་གི་སྙིང་ཚིལ་ཡིན ། །
༼ ཇེང་། ༽
དོ་སྣང་ཆེ་བའི་རྩོམ།
རྩོམ་གསར། 10