ལུག་རྫི། 2023-07-17
ཕྱི་ལོགས་གཡུལ་གྱིས་སྡོད་མི་འཇུག །
ཤི་གསོན་བརྟག་དཔྱད་གཡུལ་ངོར་བྱེད། །
ནང་ལོགས་ནད་ཀྱིས་འགྲོར་མི་འཇུག །
ཤི་གསོན་བརྟག་དཔྱད་ནང་དུ་བྱེད། །
རྨི་ལམ་ཞིང་དུ་སོང་ཤུལ་ལ། །
སྡོང་ལོ་བཞིན་དུ་ཡུལ་བོར་ཅིང་། །
གཡུལ་དང་མལ་དུ་དབུགས་ཆད་པའི། །
སྲོག་སོང་སྐྱེ་བོ་བགྲང་ནུས་སུ། །
ཐད་འཕུར་ཉིན་འཕུར་མཚན་འཕུར་རེད། །
ཅུང་ཙམ་འཁྲུགས་པ་ཨེ་ཡིན་སྙམ། །
ནད་པ་གཅིག་འཕར་གཉིས་འཕར་རེད། །
བརྒྱ་སྟོན་སྒུག་པ་འདྲ་བྱུང་ལ། །
ཐོག་ཁའི་དར་ལྕེ་བསྐྱོད་ཚུལ་འདི། །
རྒྱང་བཞུད་ཕེབས་བསུ་བྱེད་པའམ། །
ཕྱི་མི་རང་ཁྱིམ་རྫོང་བྱེད་པའི། །
བདེ་མོའི་ལག་བརྡ་བྱེད་དང་མཚུངས། །
ཉི་གཞོན་ལྷ་མོས་དགུ་ཐོག་གི། །
ཕྲག་པའི་སྟེང་ལ་མ་ནེ་བཞག །
བརྩེ་བས་འགྲོ་ལ་རྒྱང་གཟིགས་གནང་། །
བྱམས་བརྩེ་འོད་བརྒྱར་སྤྲུལ་ནས་བསྩལ། །
ང་ཡི་གྲུ་མོ་སྒེའུ་ཁུང་ཁར། །
བཙུགས་ནས་ཡུན་གྱིས་ཕར་བལྟས་པས། །
མོ་རང་ངོ་ཚའི་ཟོལ་གྱིས་ནི། །
དལ་བུར་ཁང་བརྩེགས་ཕག་ཏུ་ཡིབ། །
ང་ཡི་མིག་ཟུང་སར་ཕབ་པས། །
གྲང་རེག་བཙན་པོས་དུས་བྱས་པའི། །
སྡོང་ལོ་རྒན་འཁོགས་ཁྱུ་ཚོགས་ཤིག །
ཁང་མདུན་སྤང་ན་འགྱེལ་བ་མཐོང་། །
རྩོམ་གསར། 10