དགེ་གྲྭ་རྒྱལ། 2023-07-13
མིའི་ལང་ཚོ་ཅི་འདྲ་མཛེས་ན་ཡང་། །
མིག་ལྡེམ་པ་ཙམ་ལས་རྒུད་འགྲོ་ཀི །
རྒྱུ་འབྱོར་བ་ཅི་འདྲ་ཆེ་ན་ཡང་། །
ཚེ་ཉོ་པའི་རིན་ཐང་ཡོད་མ་ཡིན། །
ཕྱི་མཛེས་པའི་མེ་ཏོག་འདྲ་ན་ཡང་། །
ནང་སེམས་པ་ཉི་ཤུའི་མུན་ནག་རེད། །
ངོ་གདོང་ལ་འཛུམ་ཞིག་བཞད་ན་ཡང་། །
ནང་སེམས་པ་མེ་ཏོག་དུག་ལྡན་བཞིན། །
ཡུལ་མི་རྟག་འཇིག་རྟེན་འཁོར་གྲོང་ན། །
མི་བཟང་ངན་མེ་ཏོག་དགའ་ཚལ་འདྲ། །
ཁ་ཚིག་འཇམ་པི་ཝང་སྒྲ་ལས་སྙན། །
སེམས་ཞི་འཇམ་ཡོད་པ་ཉིན་སྐར་བཞིན། །
ཕྱི་ལུས་གཟུགས་རྒུད་ནས་ཤི་ལ་ཁད། །
གདོང་གཉེར་མའི་གང་རུང་སེམས་གསོན་འདུག །
ཡུལ་མི་རྟག་འཇིག་རྟེན་གྲོང་ཁྱེར་ནས། །
སེམས་ཞེན་སའི་དངོས་པོ་གང་དང་གང་། །
གདོང་འཛུམ་ཞིག་བཞད་ནས་ལས་ལ་ཉེ། །
ཁ་ཞི་འཇམ་ཚིག་སྙན་བཟི་ཁ་ཅན། །
གྲོགས་སྤུན་ཟླའི་ཐ་སྙད་སྤྱད་ན་ཡང་། །
སེམས་གཡོ་སྒྱུ་ཡོད་མེད་སུ་ཡིས་ཤེས། །
རྩོམ་གསར། 10