རྫ་ཤུལ་བློ་བཟང་། 2023-07-12
མཛེས་པའི་གདོང་ལ་སྨིན་མ་སྒེག་པ། །
སྤྱན་ཟུང་མིག་གིས་ཟུར་མདའ་འཕེན་མཁན། །
ཞི་བའི་གདངས་ལ་དྲེགས་པའི་ཉམས་ཅན། །
དབྱངས་ཅན་ལྷ་མོ་བདག་བློའི་དགའ་མ། །
མ་བཅོས་ཞལ་དཀར་ཁ་བའི་མདངས་འཛིན། །
ལེགས་པའི་མཆུ་སྒྲོས་བྱུ་རུའི་ཁ་དོག །
ཚེ་རབས་ཀུན་སྐྱོང་དབྱངས་ཀྱི་ལྷ་མོ། །
བྱིན་རླབས་འོད་ཀྱི་དྭངས་མ་འཕྲོས་སོང་། །
ལང་ཚོ་འཁྲི་ཤིང་གར་གྱིས་སྟངས་སྟབས། །
མཛེས་པའི་བྲང་ལ་མྱོས་བུམ་དོད་པའི། །
བརྩེ་སེམས་སྤྲིན་དཀར་འཕྱོ་བའི་ལྷ་མོ། །
བདག་མགྲིན་ཡིད་ཀྱི་ཁབ་ཏུ་ཕེབས་མཛོད། །
འཇམ་མཉེན་རེག་བྱའི་བསིལ་འཇམ་ལྡང་བས། །
ལྷག་མེད་ཡིད་ཀྱི་རྨོངས་མུན་སེལ་མཁས། །
རིས་མེད་ཀུན་གཟིགས་བྱམས་ཀྱི་བདག་མོ། །
སྙིང་རྗེའི་འོད་ཟེར་བདག་ལ་སྩོལ་ཅིག །
དྲི་ངད་བདུད་རྩིའི་ཟིལ་མངར་འཐུལ་ཞིང་། །
ཚེམས་དཀར་དུང་ཕྲེང་མུ་ཏིག་བརྒྱུས་པའི། །
ཡེ་ཤེས་དབྱངས་ཀྱི་ཤེས་རབ་ལྷ་མོ། །
རིག་རྩལ་གློག་གི་འཕྲུལ་འཁོར་སྩོལ་ཤོག །
མཛེས་པའི་ཉམས་ལ་ཞི་བའི་རྗེས་ཆགས། །
འཛུམ་ཆུང་པདྨའི་འདབ་ཁ་གྲོལ་བའི། །
དབྱངས་ཀྱི་མེ་ལོང་ཐོགས་པའི་རིག་མ། །
སྙན་འཇེབས་སྟོང་གི་ཆོ་ལོ་གནོངས་མཛོད། །
ཡེ་ཤེས་མེ་ལོང་གསར་པའི་ལང་ཚོ། །
དབྱངས་ཀྱི་ཐིག་ལེའི་ཕྲ་རྒྱན་འཆར་འདྲ། །
ཤེས་རབ་འོད་ཀྱི་གུར་ཁང་ཕུབ་འདྲ། །
རྒྱལ་བ་དབྱངས་ཀྱི་ངག་དབང་སྲས་མོ། །
ངེས་འབྱུང་གསེར་གྱི་ཡིག་འབྲུ་སེར་པོ། །
དད་འདུན་དབྱངས་ཀྱི་ཁ་བཏགས་བཅས་པར། །
རྣམ་དག་ཡིད་ཀྱིས་ཡོངས་སུ་སྤྲུལ་ནས། །
སྐྱེ་རྒུའི་གཙུག་རྒྱན་ཁྱེད་ལ་ཕུལ་ཡོད། །
རེ་བའི་དངོས་གྲུབ་བསྩལ་བར་མཁས་པའི། །
ཟླ་བའི་སྲིང་མོ་ཡིད་བཞིན་ནོར་གཏེར། །
སེམས་ཀྱིས་དད་ཅིང་མཇལ་བར་མོས་ཚེ། །
སྒྱུ་འཕྲུལ་གར་གྱི་གསང་ཡུམ་ཆེན་མོ། །
རྟོག་ཚོགས་ཐ་སྙད་དབྱངས་ཀྱི་ཐང་ཁ། །
མཚོ་བྱུང་ལྷ་མོའི་འཛུམ་རས་བྲིས་ཡོད། །
སྲིད་ཞིའི་མཛེས་སྡུག་ལང་ཚོ་སྨིན་མ། །
ཚེ་རབས་སྟོང་གི་རིག་བྱེད་ལྷ་མོ། །
རྩོམ་གསར། 10