མཐོན་མཐིང་གི་མཁའ་དབྱིངས་སུ།

རླུང་འཚུབ་ཀྱི་བཞུར་རྒྱུན།

དམར་པོ་ཡི་ལོ་རྒྱུས།

གསར་གཏོད་ཀྱི་གླུ་དབྱངས།

ཡིད་དགའ་བའི་མེ་ཏོག་གི་ཆར་པ།

ཀུན་ཕན་གྱི་སྦྲང་རྩི། མདོར་ན།

ལོ་ལེགས་ཀྱི་སྙེ་མ་འཇོ་བའི་ཁྲོད་ན།

ལང་ལོང་དུ་འཁྲིགས་པ་ནི།

རྒྱལ་ཁམས་ཕྱོགས་མེད་དུ་འཕྱོ་བའི།

ཚངས་མགུར་ནང་ལ་ཐིམ་པའི་རྦབ་ཆུ་རེད།

ཚངས་དབྱངས་རྒྱ་མཚོ།

ཁྱེད་ཀྱི་ཆུ་ཤེལ་དང་འདྲ་བའི་སེམས་པ།

ཚངས་མགུར་ནང་ཐིམ་པས།

ལན་རེར་མེ་ཏོག་གི་ཆར་པ་འབབ་ཅིང་།

ཆུ་འཛིན་གྱི་འདབ་མ།

མཐོ་ཞིང་བརྗིད་པའི་མཁའ་ཀློང་ནས།

ཆིལ་ཆིལ་དུ་ལོག་ཡོང་དུས།

ཁྱོད་ནི་རྡོ་ལ་བྲིས་པའི་ལོ་རྒྱུས་ཀྱི་མིག་ཆུ་རྡོག་

གཅིག་སྟེ།

ཧི་མ་ལའི་གླེགས་བམ་གྱི་གསེབ་ལ་བཅུག་པའི།

བདུད་རྩི་ནད་འཇོམས་ཀྱི།

ཚངས་མགུར་ནང་ལ་ཐིམ་པའི་དྭངས་

གཙང་གི་བཅུད་ལྡན་དེ་ཡིན།

ཚངས་དབྱངས་རྒྱ་མཚོ།

ཁྱེད་ནི། བླ་མཁར་གྱི་རྩིག་ནས་རྙེད་པའི་

པོ་ཏི་ཡུག་གཅིག་སྟེ།

ཕྲག་ཏུ་འཁུར་ཚེ།

ཡུལ་གྱུར་གྱི་ལྟོགས་སྐོམ་གསོ་བའི།

དྲོད་མ་ཡལ་བའི་སྦྲང་དཀར་རྩམ་པ་དང་།

ཞོགས་པའི་མདུན་སྐྱོད་དུ།

འོད་སྣང་དང་དྲོད་སྐྱིད་སྩོལ་བའི།

རྙེད་པར་དཀའ་བའི་ལོ་རྒྱུས་ཀྱི་སྙིང་རྩ་

དམར་པོ་དེ་ཡིན་ཨང་།