མ་གྲུབ་པ། 2023-04-26
སྲིད་པའི་དཀར་ངོགས་འདི་ནས་ཁྱིམ་མཚེས་སུ་སྐྱེས་ཤིང་།།
བྱིས་དུས་འཚོ་བའི་རྩེད་རྡོ་གཞི་གཅིག་ཏུ་བཀོད་དུས།།
ཁྲེལ་ལྡན་ཆུང་གྲོགས་གཉིས་ཀྱི་ཡིད་ངོགས་སུ་བྲིས་པའི།།
སྐལ་པའི་ལན་ཆགས་དེ་ཉིད་འགོག་མེད་དུ་སད་འདུག།
མཚར་སྡུག་ཡིད་འཛིན་བུ་མོའི་དུང་སེམས་ཀྱིས་སྦྲུམ་པའི།།
གཞུང་བཟང་ཚེ་རིང་བུ་ལོ་རྒྱང་རིང་དུ་ཕེབས་ཀྱང་།།
ལུས་སེམས་འབྱུང་བཞི་འཁྲུག་པས་རང་ཡུལ་དུ་སླེབས་ན།།
མཐོང་མེད་གནམ་རྒན་མ་ཡིས་བཀོད་སྒྲིག་ཅིག་ཡིན་འདྲ།།
ཡིད་འོང་རི་སུལ་ཚལ་གྱི་རོང་འབྲོག་གི་གཞིས་ཀར།།
དལ་མེད་ལས་ལ་བྲེལ་བའི་མི་ཚོགས་ཀྱི་ཁྲོད་ནས།།
ན་གཞོན་ཕོ་མོ་གཉིས་ཀྱི་སེམས་འཕྲིན་གྱི་ཟུར་མིག།
འདང་བརྩེའི་མེ་ཏོག་བཞད་པའི་བརྡ་ཐབས་ཤིག་ཅི་མིན།།
ཚེ་གཅིག་ལས་ཀྱིས་བརྐོས་པའི་ཆུང་གྲོགས་ཀྱི་མཛའ་བོ།།
འབྲལ་དཀའི་གདུང་བ་དྲག་པོ་སེམས་གཏིང་དུ་ལྷུང་ཡང་།།
བཟློག་མེད་བཙན་གྱིས་དེད་འདྲར་རྒྱང་རིང་དུ་གྱེས་དུས།།
བརྩེ་ལྡན་སྙིང་ཐུབ་བུ་མོའི་སེམས་ཁམས་དེ་སུས་ཤེས།།
ཉེས་མེད་མི་ཁ་ནག་པོའི་ཀློང་འོབས་སུ་ཚུད་ཅིང་།།
མི་འདོད་ཨ་ཕའི་བཀའ་ལ་ཡར་ལྡོག་ཅིག་མེད་དུས།།
དལ་རྟེན་ཚེ་ཡི་མཇུག་མ་ཐག་པ་ལ་བཅོལ་བའི།།
རྩྭ་ཁང་སྐྱ་བོའི་ནང་གི་བུ་མོ་དེ་སྙིང་རྗེ།།
གཤིས་བཟང་རིག་ལྷ་གཉིས་ཀྱི་བཀའ་དྲིན་ལ་བརྟེན་ནས།།
ཕ་ཡུལ་ཕ་མ་གཉེན་ཉེ་རྒྱབ་ཕྱོགས་ལ་བཞག་ནས།།
མཛའ་བོ་སེམས་སུ་སྒོམ་པའི་ཡུལ་བུད་ཀྱི་ན་ཆུང་།།
རྒྱུས་མེད་འགྲིམ་འགྲུལ་ནང་ནས་སྐྱོ་ཉམས་དེ་ཆེ་ཨང་།།
སྙིང་གཅེས་ཨ་མ་དྲིན་མོ་རྒྱབ་ལོག་ཏུ་གཡུགས་ནས།།
མཛའ་མཐུན་སྙིང་ཐུབ་འཚོལ་བའི་ལམ་ཁ་ལ་ཞུགས་དུས།།
སྙིང་ཉེའི་བཟང་སྤྱོད་འཁྲབ་པའི་རིགས་གཅིག་པའི་སོ་ནམ།།
འགྲུལ་འཁོར་གཅིག་ཏུ་འཛོམས་པས་དགའ་སྣང་ཙམ་སྐྱེས་འདུག།
སོ་ནམ་ནག་གདོང་དེ་དང་ལྷན་གཅིག་ཏུའགྲོགས་ནས།།
གནའ་མཁར་ཟི་ལིང་བརྒྱུད་ནས་སྐུ་འབུམ་མཇལ་སོང་མཐར།།
བར་ཆད་སྤྲིན་ནག་མཐུག་པོས་སྒྲིབ་པ་དང་བསྟུན་ནས།།
མ་བསམ་རྐང་བགྲོད་དགོས་པའི་བརྒྱུད་རིམ་ཞིག་བྱུང་བཞག།
ཞི་བའི་ལུག་ལྤགས་གྱོན་པའི་གདོང་ནག་གིས་བུ་ལོས།།
རོ་སྒེག་འཛུམ་སྟོང་གྲོལ་བའི་གཞོན་སྐྱེས་མའི་ལང་ཚོ།།
རི་སྐྱེས་ཡུ་མོ་རྨས་མའི་ངང་ཚུལ་ལྟར་སྟོན་དུས།།
མེ་ཏོག་མི་ལ་ཤོར་བའི་ལྷ་སྐྱིད་དེ་སྙིང་རྗེ།།
ལས་སྨོན་ཤིན་ཏུ་དམན་པའི་ན་ཆུང་གི་ལྷ་སྐྱིད།།
མཛའ་བོ་མ་འཕྲད་གོང་ནས་ལང་ཚོ་དེ་ཤོར་བས།།
སྐྱོ་གདུང་དྲག་པོའི་ངང་ནས་བརྒྱལ་བ་ལས་སད་དུས།།
ལས་མཉམ་ཇོ་མོ་སྒྲོལ་མས་སྲུང་བ་དེ་མཐོང་འདུག།
ནང་སེམས་བརྩེ་བའི་ས་བོན་གཞི་གཅིག་ཏུ་བཏབ་པའི།།
མཛའ་བོ་ཚེ་རིང་ན་ཟླ་འཕྲད་འདོད་ནི་ལྕི་ཡང་།།
མེ་ཏོག་མི་ལ་ཤོར་བས་ཐུག་སྤོབས་ནི་མེད་དུས།
སྡུག་བསྔལ་དགུ་འབུམ་བརྩེགས་པའི་ན་ཟུག་དེ་སུས་ཐེགས།
མགོ་རིལ་སྒྲོལ་མ་རྒན་མོའི་གཟན་སྣེ་ལ་འཇུས་ནས།།
དབེན་པ་རི་དང་བྲག་ཕུག་ཉམས་ལེན་ལ་སྦྱོར་དུས།།
དམིགས་པ་ཆུང་གྲོགས་ཚེ་རིང་གདོང་གཟུགས་ལས་མེད་ཅིང་།།
དྲན་པ་མཚོ་མོས་སྐྱོམ་པས་གཟུགས་བཞི་ཡང་རིད་སོང་།།
ཁ་ནས་ཇོ་མོ་དགོས་པ་ལེན་གྲངས་སུ་བཤད་ཀྱང་།།
དྲན་གདུང་དྲག་ཏུ་འཕྱོ་བའི་ངང་ཚུལ་དག་མཐོང་དུས།།
ལས་མཉམ་རབ་བྱུང་སྒྲོལ་མའི་ནང་སེམས་ཀྱི་ཀློང་ནས།།
ཤ་ཚའི་མིག་ཆུ་ཕྲེང་བ་གྲངས་མེད་དུ་བགྲང་བཞག།
དེ་ལྟར་ཞག་ཟླར་མཐུད་པ་དུ་མ་ཞིག་བརྒལ་ཡང་།།
འདང་བརྩེའི་སེམས་ཉིད་དཀར་པོའི་གཞན་དབང་དུ་གྱུར་ཅིང་།།
སུམ་སྦྲེའི་དགའ་དུང་གཤིས་ལ་མཛའ་བོའི་མིང་བརྐོས་པའི།།
བརྩེ་ལྡན་བུ་མོ་འདི་ལ་ཡིད་སྨོན་ཞིག་ཤོར་སོང་།།
རྩོམ་གསར། 10