༡

མིག་མདུན་དུ་དྲན་པ་ཉེ་བར་བཞག་པའི་

ཡིད་ཀྱི་ལྗོངས་འདིར་ལུས་པའི་ཁེར་རྐྱང་གི་རྒྱ་སེ།

ཞེ་འདང་གི་ནམ་མཁའ་འདི་ནས་ཁྱོད་ཁོ་ནའི་

བདེ་བ་གླེང་།

༢

ཉི་ཟླའི་བརྩེ་བ་འཁྱིལ་ས་ནས།

ཡིད་གཞུང་གི་གཙང་པོའི་བཞུར་རྒྱུན་རིང་།

ངག་སྒོ་ནས་དྲན་པའི་སྒོ་གླེགས་བརྡུངས་རྗེས།

ཁྲེལ་གཞུང་ཕྱི་ཐག་གི་དར་སྐུད་རིང་བ་ཆོས་ཉིད་རེད།

༣

མཚོ་ཁར་འགྲེང་བའི་ཞེན་ཆགས་ཅི་ཞིག་མཆིས།

དགའ་སྐྱོ་ཟུང་གི་དབུགས་རིང་རྒྱང་ལ་འཕེན།

ཁུ་སིམ་པའི་ལྷིང་འཇགས་སྣ་ཚོགས།

མཚན་མོ་དེའི་ངང་ཚུལ་ལ་འཁོར་བར་འཁྱམས།

༤

སེམས་ཆུང་དྲོད་ཀྱིས་རུམ་ནས་ཉི་མ་འདེ།

དུངས་སེམས་ཨ་ལོང་སྦྲེལ་ནས་མདུད་པ་རྒྱག

རྟོག་བཏགས་ཀྱིས་བཞེངས་པའི་

ཞེ་འདང་མེ་རུ་སྒྲོན་པའི་ཐ་སྙད་སྣ་ཚོགས།

དབྱངས་གསལ་གྱི་ལྷ་ཚོགས་འཁྱུད་པའི་རྣམ་ཤེས།

༥

འཚོ་བའི་སྡུག་ཡུས་དང་འཁང་ར་འཐེན་ཞོར།

གུ་དོག་པའི་མི་ཚོགས་ཀྱི་ངོ་གདོང་ཕྲད་རྗེས།

སུ་ཞིག་གིས་ད་དུང་གསུང་གླེང་མཛད་ཀྱིན་འདུག

༦

སྲོད་ཀྱི་མཚམས་སུ་བཏེགས་པའི་དྲན་གདུང་།

ཁེར་རྐྱང་གི་གནས་མལ་ན་ཁྱོད་རང་ཅི་ཞིག་ལུས་ཡོད།

༧

ལས་དབང་གི་ཁ་གཏད་འགྲེང་བའི་མི་རབས།

ཨུ་ཚུགས་ཀྱིས་འཁོར་བའི་ཚལ་དུ་གྲུབ་རྗེས།

མིག་ཟུང་ཅེར་ནས་ག་ལེར་ཕྱོགས།

༨

དབྱངས་ཀྱི་ཟིལ་བ་ཆགས་པའི་གཞས་དེ།

གཙང་འགྲམ་གྱི་རོལ་རྩེད་དང་ལྷན་དུ།

བྲེལ་འཚུབ་མ་བྱས་པར་ཡུན་རིང་རྣ་བར་སྙན།

༩

བྲིས་མ་ཚར་བའི་ཐ་སྙད་དེ་དག།

ཡུན་རིང་ཞིག་ལ་ཁྱོད་ཀྱི་གམ་དུ་ལྷག།

མི་ཚེའི་ཐ་གུ་རིང་མོ་རྒྱང་རིང་ལ་འཐེན་ཡང་།

ཐོད་པའི་ཡང་སྙིང་ངམ་ཡང་ན་གཞན་ཞིག་གིས།

སྙིང་པོ་མཐའ་དག་གཏམ་རྒྱུད་རེ་རེའི་ཁུད་ན་བསྐུངས།

༡༠

མིག་ཟུང་གཉོམ་པོ་འདིའི་

ལྡེབས་ངོས་སུ་བཀར་བའི་དངོས་པོ་དག

རྣམ་སྨིན་གྱིས་བསྡུས་པའི་ཕུང་པོ་འམ་

སྡིག་སྒྲིབ་ག་ཙམ་ཞིག་རང་གི་ཉེ་སར་འདྲུད་ཡོང་།

༡༡

མཁའ་དབྱིངས་སུ་བཏེགས་པའི་བྱ་ཁྱུ།

དྲན་གདུང་གིས་མ་བཟོད་པར།

མཚོ་དང་མཚེའུ་ངོགས་སུ།

ཕྱིར་མིག་གི་ཞེན་ཆགས་ཤོར།

༡༢

རེ་སྨོན་གྱི་བྱེ་བ་བརྒྱ་ཕྲག།

མིག་མཐའི་ཆར་རྒྱུན་རིང་མོ།

རང་གི་ས་ཚུགས་གཅིག་སྲུང་ཐབས་བྱས།

༡༣

རེ་སྒུག་གི་དགུ་ཚིགས་ཀློང་ན།

རླབས་ཀྱིས་སྒུལ་བའི་མི་ཚེ་ཧྲིལ་བོ།

མ་འོངས་པའི་ལྟག་རྒྱབ་ཀྱི་མག་མོག་མཐོང་ཨེ་བྱུང་།

༡༤

སྣང་བའི་ངོས་ཀྱི་རྡུལ་སྨག་ཡོད་ཚད།

སྐྱེ་འཆིའི་གོ་རིམ་བརྒྱུད་པའི་ན་ཚ་དེས་བདུངས།

ཡུད་ཙམ་ལ་ངག་ལྐུགས་རྗེས།

འདོད་སྲེད་ཀྱི་རུས་པ་མཁྲེགས་པོ་དེ།

ཨུ་ཚུགས་ཀྱིས་ཞེ་སྡང་འགགས་པར་གྱུར།

༡༥

རྗེས་འདེད་ཀྱི་གྲིབ་མ་བཞིན།

ཡུན་རིང་གི་ལག་དམར།

ཉོན་མོངས་པའི་ཙག་གིས་བསྡམས།

༡༦

དབུགས་ཀྱི་ཁ་རླངས་ཡལ་བའི་

འཆི་ཁར་རླུང་བུ་དམར་པོ་གང་སར་ལྡང་།

༡༧

རེ་དོགས་ཀྱིས་སྦྲིད་པའི་ལུས་པོ།

ན་ཟུག་གི་མེ་ཏོག་ཁྱོར་བ་གང་བཏབ་རྗེས།

ཕལ་བའི་རྨི་ལམ་གྱི་ནགས་ཚལ་སྟུག་པོ་དེ་དག།

༡༨

གཟུགས་མེད་ཀྱི་དྲན་གདུང་ནི་

སེམས་ཀྱི་གཏིང་རུམ་དུ་ལུས་འདུག།

རྒོད་པོ་མཐུར་མེད་ཀྱི་ང་ཡི་རྟ་ཕོ།

འུ་གཉིས་བློས་བསླངས་ཀྱི་ཕོ་ཉ་དེའོ།།

༡༩

ཡར་ཀླུང་གཙང་པོའི་བཞུར་རྒྱུན་དང་འདྲེས་ཏེ།

གསེར་མིག་ཉ་མོའི་བརྩེ་བ་དང་མཉམ་དུ།

མཛེས་སྡུག་ཆ་ཤས་ཤིག་བཞེངས་པའི་སྒྱུ་འཕྲུལ།

༢༠

སྐྱོ་གདུང་མེད་པའི་མཚན་ཡུགས་དེར།

འཛུམ་མདངས་ཀྱི་ཞལ་ཁ་གྲོལ་བའི་རྗེ་བཙུན།

ངའི་རྨི་ལམ་མཐའ་དག་མཛའ་

བརྩེ་ཡི་བྲང་གཞུང་དུ་འཁྱིལ།

༢༡

མེ་ལོང་དུ་ངོ་གདོང་མཐོང་རྗེས།

མིག་ཟུང་ལ་ཐོགས་པའི་ཞེན་ཆགས་ཀྱི་སྣེ་རུ།

ཉི་ནུབ་ཀློང་གི་ཡིད་གར་འོང་བའི་

བྱ་ཁྱུ་ལྡིང་སྐོར་བྱས།