གནའ་ནས་ད་ལྟའི་བར་དུ། །

བཤད་ན་ལོ་རྒྱུས་རིང་ཞིང་། །

ཉན་ན་ཡིད་སེམས་སྐྱོ་བའི། །

མ་སྐྱེས་ཨ་མ་ལོ་ལོ། །

ཁྱེད་ཀྱི་ཞལ་རས་མཐོང་བས། །

ཚངས་དབྱངས་རྒྱ་མཚོའི་རྨི་ལམ། །

ཁྱོད་ཀྱིས་བརྐུས་པ་བདེན་ནམ། །

ཚངས་མགུར་ཡང་ཡང་བཀླགས་པས། །

ཁྱེད་རང་མཛེས་རབས་བཤད་ཀི། །

དངོས་གནས་དེ་འདྲ་ཡིན་ནམ། །

ཡིད་འཕྲོག་ཡིད་ལ་དྲན་པས། །

སེམས་གསོའི་བརྩེ་བ་གནང་ཟེར། །

གལ་ཏེ་བདེན་པར་འདུག་ན། །

ཁྱེད་ལ་ཐུག་ཀྱང་ལོས་ཆོག །

ཕོ་གཞོན་གཏམ་རྒྱུད་སྐྱུར་བོ། །

ལུས་དྲི་ཞིམ་པའི་བུ་མོས། །

ལྷ་སའི་ཁྲོམ་ལ་བཞག་ཟེར། །

ཚངས་དབྱངས་སེམས་པ་ན་བའི། །

ཨ་མའི་ཞལ་རས་སྣུམ་པོར། །

སེམས་པ་ཡང་ཡང་ཤོར་བས། །

བར་བསྐོར་གླིང་ནས་འཁྱམ་ཟེར། །

ངང་པ་འདམ་ལ་མ་ཆགས། །

དུང་བ་སུ་ལ་མ་བྱིན། །

ཁྱེད་དང་ཚོང་འདུས་བུ་མོའི། །

ཚིག་གསུམ་དམ་བཅའི་མདུད་པ། །

རང་རང་ས་ནས་གྲོལ་ཏེ། །

ཁྱོད་རང་གཅིག་པུ་འཁྱམས་ནས། །

ས་མཐའ་བསྐོར་བ་བདེན་ནམ། །

བྱམས་པའི་ལས་འཕྲོ་ཟད་པས། །

བཙལ་ཀྱང་ལས་ཀྱིས་མ་རྙེད། །

བོས་ཀྱང་ཕྱིར་མིག་མ་འཕང་། །

སེམས་སོང་བུ་མོ་མ་བཞུགས། །

དམ་པའི་ཆོས་ལ་ཕེབས་ནས། །

ཕོ་གཞོན་ཁྱེད་ཀྱང་མ་སྡོད། །

རྒྱལ་ཁམས་བསྐོར་བ་བདེན་ནམ། །