2022-03-04
ལོ་ཟླས་ཁུར་པའི་སྨུག་པ་ལང་ལོང་། །
སྒྱུ་མ་ར་བའི་ཤིང་ལོ་ལྡེམ་ལྡེམ། །
རི་རབ་ཉིལ་བའི་སྒྲུང་གཏམ་རིང་རིང་། །
བོད་ལོ་སར་པའི་དུས་སུ་དྲན་པ། །
སྟོང་དབྱིངས་ངོས་སུ་ཁ་བ་ལྷབ་ལྷུབ། །
ཏི་སེའི་དབུ་རུ་ན་བུན་གྱ་གྱུ། །
དཔའ་གཏམ་ངར་མའི་རྫི་གླུ་ལྷང་ལྷང་།
བོད་ལོ་སར་པ་འདི་དག་དྲན་པ། །
བསྐལ་བའི་མཐའ་རུ་ལྕགས་རི་ནག་ནག།
གདོད་མའི་ནགས་སུ་ཟིལ་བ་ཐར་ཐོར། །
གར་མའི་ཞལ་ལ་ལང་ཚོ་རབ་རིབ། །
བོད་ལོ་སར་པའི་ཁུད་ནས་དྲན་པ། །
བགྲེས་པོའི་ཐོད་ཀྱི་གཉེར་བ་ཤིག་ཤིག།
དད་པའི་མཐའ་རུ་དར་ལྕོག་ཤག་ཤག།
ཕྲེང་ཐག་སྟེང་གི་ཕྲེང་རྡོག་ཐོ་ཐོ། །
བོད་ལོ་སར་པའི་དད་པའི་མདངས་ཡིན། །
ལྷོ་སྤྲིན་དཀར་པོའི་འདབ་མ་རེ་རེ། །
ལན་བུ་ནག་པོའི་རལ་བ་འཚུབ་འཚུབ། །
ཆར་བ་སིལ་མའི་ཆུ་རྡོག་ཁྲོག་ཁྲོག།
བོད་ལོ་སར་པ་སྒྱུ་རྩལ་མདངས་ཡིན། །
དབྱངས་གསལ་ཡི་གེའི་འབྲི་ལམ་རིང་ཐུང་། །
ཀླད་པ་དྭངས་པའི་ཤེས་བྱ་མང་ཉུང་། །
སྲོག་ལ་ཁེན་པའི་མུན་པ་ཆེ་ཆུང་། །
བོད་ལོ་སར་པ་ཤེས་བྱའི་མདངས་ཡིན། །
ཤ་མར་ཐུད་ཀྱི་སྡེར་ཁ་མང་ཉུང་། །
ཁ་མཁས་བགྲེས་པོའི་ཁ་གཡང་ཡག་བཙོག།
གར་ལ་མཁས་པའི་གར་སྟབས་ཡག་མིན། །
བོད་ལོ་སར་པའི་མདངས་སུ་འཕྱོ་བ། །
རང་སྣང་ཁྲ་མོའི་ལབ་གླེང་འདར་འདར། །
འཆི་བར་འཇིགས་པའི་གུད་ན་ཡེར་ཡེར། །
འཇིག་རྟེན་བླ་འོག་རྡུལ་སྐྱ་དར་དིར། །
བོད་ལོ་སར་པའི་ཆོས་ཀྱི་འོད་ཡིན། །
ཞག་གཅིག་སྡོད་པའི་གྲོགས་སུ་བཀུག་ན། །
ཚེ་གཅིག་རྟག་པའི་རི་མོ་བྲིས་ན། །
ཟླ་གཅིག་སྐྱི་ལྤགས་ཚ་བ་མེད་ན། །
བོད་ལོ་གཡང་གི་གྲོགས་ཤིག་རྙེད་འདུག།
ཕྱི་སྣོད་འཇིག་རྟེན་དག་པའི་ཞིང་ནས། །
ནང་བཅུད་སེམས་ཅན་རྒྱུ་སྐར་འཕོ་འདྲ། །
སྐྱིད་སྡུག་ཁ་ཆར་འདྲེས་པའི་མདོ་ནས། །
བོད་ལོ་གཡང་གི་བདེ་སྡུག་རྙེད་འདུག།
བྱེ་ཐང་སྨིག་རྒྱུའི་ལ་མོ་བརྒལ་བའི། །
སེམས་ཀྱི་རྟ་ཁ་འཐེན་ཙམ་བྱས་ན། །
གཡོ་ཟོལ་གངས་ཀྱི་གྲུ་གཟིངས་མཐོན་པོས། །
བོད་ལོ་སར་པའི་ཁ་གཡང་ཁྱེར་འདུག །
ཐོབ་ཤོར་ངེས་མེད་རླུང་ཁའི་དར་ལྕོག།
མ་དྲོས་མཚོ་མོའི་ངོས་སུ་འཕྱོ་བའི། །
གསེར་མིག་ཉ་མོ་ཨེ་ཡིན་བསམ་ན། །
བོད་ལོ་སར་པའི་དུས་ཚེ་སྐྱིད་པ། །
སྟེང་ན་རྡུལ་སྐྱ་བར་མེད་འཕུར་བའི། །
འོག་ན་མྱེ་ལྕེ་ལམ་ལམ་ཚ་བའི། །
དུས་ངན་ནང་གི་དུས་ཚེ་བཟང་པོར། །
བོད་ལོ་སར་པར་ཞི་བདེ་འཕེལ་ཤོག།
ཧུན • དུར་རོ།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10