བོད་རབ་རྒྱན་ཆུ་ཕོ་སྟག་གི་ལོར་ཕུལ་བའི་ལོ་སར་ཤིས་ཚིག

སྟག་དམར་ཡག་འཛུམ་དྲུག་ཐིག་ལེ་བཀྲ།།

དྲག་གད་རྒྱངས་བསྒྲགས་ན་ས་གསུམ་གནོན།།

ཟིལ་རྔམ་བརྗིད་གདོང་ལྔའི་དཔལ་ལ་འགྲན།།

བོད་ཆུ་ཕོ་སྟག་གི་ལོ་སར་བཟང་།།

ཡབ་མེས་པོའི་དཔའ་སྟོབས་རྒྱས་ས་དང་།།

སྲིད་དམ་པོའི་དབུ་འཕང་མཐོ་ས་སྟེ།།

སྟོད་མངའ་རིས་སྐོར་གསུམ་ལོ་སར་བཟང་།།

སྲིད་འབྱོར་བ་དར་བའི་བཀྲ་ཤིས་ཤོག།

རིགས་འགྲོ་དྲུག་མ་རུ་སྒོམ་པ་སྟེ།།

སྒོས་སེམས་ཅན་མཆོག་ཏུ་བསམ་པ་ཡི།།

བར་དབུས་གཙང་རུ་བཞི་ལོ་སར་བཟང་།།

ཆོས་རྒྱལ་བསྟན་ནུབ་མེད་བཀྲ་ཤིས་ཤོག།

བུ་དཔའ་བོའི་དཔའ་མཛངས་གླིང་ལ་གྲགས།།

དགྲ་ངར་མའི་དགྲ་མགོ་ཐོ་བས་མནན།།

སྨད་མདོ་ཁམས་སྒང་དྲུག་ལོ་སར་བཟང་།།

རུས་མི་འགྱུར་བརྟན་པའི་བཀྲ་ཤིས་ཤོག།

བོད་ནང་བསྟན་ཆོས་གཞུང་རིན་པོ་ཆེ།།

མཆོག་ཤཱཀྱའི་རྗེས་མཇུག་གྲུབ་མཐའ་བཞི།།

སྐད་ཡི་གེ་སྲོག་གི་ཀ་བ་སྟེ།།

གཏན་མི་འགྱེལ་སྐྱེས་མཆོག་ལོ་སར་བཟང་།།

མཐོ་སྒང་བ་རི་དང་ལ་ལུང་དུ།།

གནས་རྩུབ་རུང་ཡེ་ནས་གཞིས་ཆགས་པ།།

གདོང་སྨུག་མདོག་ཅན་གྱི་ཞིང་ཕྱུགས་བདག།

བོད་ཁ་བའི་མི་རྣམས་ལོ་སར་བཟང་།།

སྐད་མི་གཅིག་མི་འདྲ་སྣ་མང་དང་།།

ཡིག་མི་མཚུངས་ཡ་མཚན་གྲངས་མང་ལ།།

ཤ་དཀར་སེར་ནག་མདོག་ཕྱི་ནང་གི།།

གཞིས་བྱེས་ཀྱི་ནང་མིའི་ལོ་སར་བཟང་།།

ཡུལ་འཛམ་བུ་གླིང་གི་གོང་ཕྱོགས་དང་།།

གནས་ཨེ་ཤ་ཡ་ཡི་དཀྱིལ་དབུས་ན།།

རྒྱལ་ཀྲུང་ཧྭའི་སྲིད་འབྱོར་རིག་གསུམ་དར།།

རིགས་ང་དྲུག་སྤུན་ཟླའི་ལོ་སར་བཟང་།།

ནང་མི་ལ་ནད་མེད་ཚེ་རིང་ཤོག།

ཕྱིའི་ཕྱུགས་ལ་གོད་མེད་འཕེལ་ཁ་ཤོག།

བར་གཡང་ར་སྒོ་བཞི་བརྟན་པར་ཤོག།

དུས་ཉིན་མཚན་དྲུག་ཏུ་བཀྲ་ཤིས་ཤོག།

ལོ་རྒན་པའི་སྐུ་ཚེ་རྒྱལ་མཚན་བརྟན།།

ཆུང་བྱིས་པའི་བློ་རིག་རི་མོ་བཀྲ།།

མཐུན་བཟའ་ཚང་སྐྱིད་པའི་དགོད་སྒྲ་མཆེད།།

ཁྱིམ་དྲོན་མོ་སྐྱིད་ལ་བཀྲ་ཤིས་ཤོག།

བོད་རབ་རྒྱན་ཆུ་ཕོ་སྟག་གི་ལོར།།

ཏོག་ནད་ངན་ཡལ་བའི་བཀྲ་ཤིས་ཤོག།

རིགས་རུ་དར་བརྟན་པའི་བཀྲ་ཤིས་ཤོག།

བོད་གངས་ཅན་སྐྱིད་ལ་དར་བར་ཤོག།

ནང་སྤུན་ཟླ་མཐུན་སྒྲིལ་དམ་པར་ཤོག།

ཤ་ཉེ་རིང་ལྷན་དུ་འཛོམས་པར་ཤོག།

སྐྱིད་ཟླ་བ་མཁའ་ལ་འཆར་བར་ཤོག།

སྡུག་མུན་པ་མཐའ་ནས་སངས་པར་ཤོག།

ཆོས་སྲིད་འབྱོར་དབྱར་མཚོ་རྒྱས་པར་ཤོག།

ཕྱི་ནང་གི་སྣོད་བཅུད་བཀྲ་ཤིས་ཤོག།

སྐྱིད་ཉི་མ་འདྲ་ཞིག་འཆར་བར་ཤོག།

གཡང་མཚོ་མོ་འདྲ་ཞིག་འཁྱིལ་བར་ཤོག།