བཀྲ་ཤིས་རྟགས་མཆོག་བརྒྱད་ཀྱིས་ལོ་གསར་བསུ།

འཇུ་རབ་གསལ། 2022-03-03

བཤད་སྒྲུབ་གསེར་གྱི་ཡུ་བ་མཐོན་པོའི་རྩེར།།

ལུང་རྟོགས་ནོར་བུའི་ཏོག་གིས་ལེགས་པར་མཛེས།།

ཕན་བདེའི་བསིལ་གྲིབ་འཇམ་པོའི་དཔལ་འཇོ་བའི།།

རིན་ཆེན་གདུགས་དཀར་དམ་པས་ལོ་གསར་བཟང་།།

ལུགས་གཉིས་ཤེས་བྱའི་སྤྱན་ཟུང་རབ་སྒེག་ཅིང་།།

གནའ་དེང་རིག་པའི་གཤོག་རྩལ་ཀུན་ནས་རྒྱས།།

གཞུང་ལུགས་རྒྱ་མཚོ་བརྒལ་བར་མི་ངལ་བའི།།

རིན་ཆེན་གསེར་ཉ་ཆ་ཡིས་ལོ་གསར་བཟང་།།

ཡང་དག་རྒྱུ་འབྲས་དཀར་པོའི་ཉེར་ལེན་གྱིས།།

སྡེ་བཞིའི་ཕུན་ཚོགས་དགོས་འབྱུང་ནོར་བུའི་མཛོད།།

སྲིད་ཞིའི་དགེ་ལེགས་འཇོ་བར་ལྟོར་འཛིན་པའི།།

རིན་ཆེན་གསེར་གྱི་བུམ་པས་ལོ་གསར་བཟང་།།

བྱམས་དང་བརྩེ་བའི་འདབ་མ་རབ་རྒྱས་ཤིང་།།

ཚུལ་དང་ལུགས་ཀྱི་ཟེའུ་འབྲུ་ཡོངས་སྨིན་ཏེ།།

ཞི་བདེ་སྦྲང་རྩིའི་བསུང་ངད་གོ་ལར་འཐུལ།།

རིན་ཆེན་ཀ་མ་ལ་ཡིས་ལོ་གསར་བཟང་།།

བདེན་པའི་རང་མདངས་གཡས་སུ་ལེགས་འཁྱིལ་བ།།

བདེན་པའི་སྒྲ་དབྱངས་འགག་མེད་སྙན་པར་སྒྲོག།

དགེ་མཚན་གྲགས་པ་སྟོང་གི་རང་རྟགས་ཏེ།།

རིན་ཆེན་གཡས་འཁྱིལ་དུང་གིས་ལོ་གསར་བཟང་།།

མཛའ་གཅུགས་མི་ཤིགས་ཁུག་མདུད་ཀྱིས་མཛེས་ཤིང་།།

བཀྲ་ཤིས་མཚན་མ་འབུམ་གྱི་དཔལ་རྫོགས་ནས།།

ཀུན་ནས་ཤིས་པའི་རེ་ཁ་མངོན་བཀྲ་བའི།།

རིན་ཆེན་དཔལ་གྱི་བེའུས་ལོ་གསར་བཟང་།།

ཞི་བའི་དར་ཆེན་འཛམ་གླིང་ཁྱོན་ལ་གཡོ།།

བདེ་བའི་བླ་བྲེས་འབྱུང་བཞིའི་གཡུལ་ངོ་བཟློགས།།

འཛད་མེད་དགེ་ལེགས་ནོར་བུའི་ཏོག་འབར་བའི།།

རིན་ཆེན་རྒྱལ་མཚན་གསར་པས་ལོ་གསར་བཟང་།།

རྨད་བྱུང་སྙིང་སྟོབས་དུས་མཐའི་རླུང་ཤུགས་ཅན།།

ངོ་མཚར་མཛད་པའི་རྩིབས་སྟོང་མངོན་རྫོགས་ཤིང་།།

ལེགས་བྱས་ལྷུན་འགྲུབ་ས་ཆེན་ཡོངས་བརྒལ་བའི།།

རིན་ཆེན་འཁོར་ལོའི་དཔལ་གྱིས་ལོ་གསར་བཟང་།།