མཆོག་གསུམ་རྒྱལ། 2021-11-10
བརྗིད་ཆགས་ཁྱུང་མགོན་རི་ལ་བྱ་རྒོད་ལྡིང་།།
དམར་ཡག་བཙུན་མོའི་གཞོང་པར་ན་བུན་འཕྱོ།།
དཔྱིད་ཀའི་དཔལ་ཡོན་མཛེས་སྡུག་འཛིན་མའི་ཀློང་།།
སྙིང་སྡུག་ལྷ་གཅིག་མིག་གི་གར་དུ་བྱོན།།
མི་ཚོགས་རྒྱུ་སྐར་བཀྲ་བའི་རྦ་རླབས་དབུས།།
བསླུ་བྲིད་རྒྱབ་གཟུགས་ཕྲ་མོའི་ལྡེམ་མྱུར་འཁྱུག།
ངོ་མཚར་ལྷ་མོའི་མཛེས་སྡུག་ཕྲན་བུ་ཡང་།།
མཐོང་ཙམ་ཉིད་ཀྱིས་མིག་གི་བཅུད་ལེན་ནོ།།
ཟླ་བཞིན་ཨུཏྤལ་མིག་འབྲས་མཚར་བ་ཅན།།
འབྲས་ལྡན་ནུ་མའི་དོ་ཤལ་རྒྱན་དུ་འཆང་།།
གཞོན་ལུས་ན་ཚོད་དར་བའི་ཡང་རྩེ་མ།།
གསེར་ཉ་ཐང་དུ་མཇལ་བའི་ལྷ་གཅིག་རེད།།
སྐྲ་ཚོགས་རླུང་གིས་བསྐྱོད་ཅིང་གཡོ་བ་དང་།།
གོམ་ཆུང་དལ་ཅིང་འཕྲོག་བྱེད་དགའ་བའི་ལུས།།
མི་ཚོགས་བུ་ཡུག་ཁྲོད་དུ་སྒེག་ཅིང་འཕྱོ།།
རྗེས་མེད་དྲན་འཛིན་སྙིང་གར་འཛུམ་གྱིན་ཐོན།།
མི་ཡི་ལུས་ལ་ལྷ་ཡི་མཛེས་སྡུག་ལྡན།།
ལྷ་ཡི་གདོང་ལ་ཡིད་འཕྲོག་འཛུམ་ཆུང་མངོན།།
འཛུམ་པའི་མདངས་ལ་ཆགས་པའི་ལྐོག་མིག་དོད།།
ལན་གཅིག་འཕྲད་པས་ཡིད་སེམས་གདུང་བར་བྱས།།
ཡུན་ཐུང་དུས་འདི་ལོ་བཞིན་རིང་ན་ཨང་།།
མཇལ་བའི་སྐབས་ཤིག་སླར་ཡང་བྱུང་ན་སྙམ།།
ཁོ་བོས་དགའ་བྱེད་རཱ་མ་ཎ་བཞིན་དུ།།
སྲིན་ཡུལ་ལན་གཅིག་ཉུལ་ཡང་ངལ་བ་ཅི།།
ཐང་ཆུང་གསེར་ཉའི་ཡིད་འོང་དགའ་ཚལ་ལ།།
དགའ་བའི་དགའ་སྟོན་རྣམ་པར་རྒྱས་པ་ན།།
གཞོན་ནུའི་མིག་དཀྱུས་རིང་དུ་བཏང་བ་ཡི།།
དུང་བའི་མཛའ་བ་སྙན་ངག་ཁོ་ནར་སྨྲ།།
རྩོམ་གསར། 10